सिनेमाघरमा ‘के घर के डेरा २’ र ‘हेल्लो काशीराम’, दोस्रो हप्तामा ‘ऊनको स्वीटर’

काठमाडौं । चलचित्र ‘ऊनको स्वीटर’ शुक्रबारदेखि दोस्रो हप्तामा प्रवेश गरेको छ । सात दिनको अवधिमा देशभरका सिनेमाघरहरूमा दैनिक ३०० भन्दा बढी शोहरूसहित प्रदर्शनमा रहेको यो चलचित्र दोस्रो हप्ता प्रवेश गरेको हो । चलचित्रले रिलिजको पहिलो सातामा पाँच करोड ७५ लाख रुपैयाँ ग्रस कलेक्सन गर्दै धमाकेदार व्यापारिक सफलता आर्जन गरेको छ । निर्माण कम्पनी आर्टमाण्डू नेपाल प्रालिले शुक्रबार बिहान आधिकारिक रूपमा कलेक्सन रिपोर्ट सार्वजनिक गरेको हो । नवीन चौहानको लेखन तथा निर्देशनमा बनेको यस चलचित्रले रिलिजको पहिलो दिनदेखि नै दर्शकको मन जित्दै हलहरूमा हाउसफुल शोहरू दिन थालेको थियो । शुक्रबार जेठ २ गतेबाट नयाँ चलचित्र ‘के घर के डेराः घर नं २’ र ‘हेल्लो काशीराम’ प्रदर्शनमा आएका छन् ।

प्रदर्शनको पूर्वसन्ध्यामा बुधबार काठमाडौंमा ‘के घर के डेराः घर नं. २’ को ‘पब्लिक प्रिमियर’ गरिएको थियो । सडक, मल, बजारजस्ता सार्वजनिक स्थानमा भेटिएका दर्शकलाई प्रिमियरमा सहभागी गराइएको थियो । नेपाली चलचित्रको प्रिमियर दर्शकका लागि आयोजना गरिएको यो नै पहिलोपटक हो । प्रिमियरमा दर्शकबाट चलचित्रलाई सुखद प्रतिक्रिया मिलेको थियो । यो चलचित्र फिल्ममा केकी अधिकारी, निश्चल बस्नेत, खगेन्द्र लामिछाने, आर्यन सिग्देल, उपासना सिंह ठकुरी, प्रकाश घिमिरेलगायतको अभिनय छ । कृष्णबहादुर थापाको डिओपी रहेको चलचित्रको निर्मातामा नकिम उद्दिन, शरद श्रेष्ठ र किरण महर्जन हुनुहुन्छ । काठमाडौंमा घर हुने र भाडामा बस्नेहरूको संघर्षको कथामा आधारित भएर यो चलचित्र बनेको हो ।

त्यसैगरी दिलीप रायमाझी अभिनित ‘हेल्लो काशीराम’ पनि शुक्रबारदेखि सिनेमाघरमा आएको छ । रिमा विश्वकर्माको लेखन र निर्देशनमा बनेको यो चलचित्रले बेरोजगार युवाको कथा भन्छ । आरआर फिल्मस् वितरण रहेको यो चलचित्रमा दिलीप रायमाझी, प्रियंका कार्की, नवज्योति रसाइली, उमेश राई, अर्जुन गुरुङ, लक्ष्मी भुसाललगायत कलाकारको अभिनय छ ।

यम आलेमगरको छायांकन रहेको चलचित्रमा मित्र डी. गुरुङको सम्पादन छ । कविराज गहतराजको नृत्य र शंकर महर्जनको द्वन्द्व रहेको चलचित्र पीबी थापाको लगानीमा निर्माण भएको हो । चलचित्रका लेखक तथा निर्देशक रिमा विश्वकर्मा हुनुहुन्छ । शान्ता ढकाल सहनिर्माता रहेको चलचित्र रेडलाइन्स फिल्म प्रालिको ब्यानरमा निर्माण भएको हो ।

दोस्रो हप्ता करिब दुई सय शोसहित ‘ऊनको स्वीटर’ले प्रदर्शन आरम्भ गरेको छ । दोस्रो हप्ताको पहिलो दिन पनि दर्शकको चासो उत्तिकै कायम रहेको देखिएको छ । दर्शकहरूको स्वतन्त्र समीक्षाबाट चलचित्रले थप चर्चा कमाइरहेको छ । कलाकारहरू विपिन कार्की, मिरुना मगर, परीक्षा लिम्बू, एलेक्स पारस, विल्सनविक्रम राई, सुरज तमु, भावना खपांगी मगर र सुनिल पोखरेलको दमदार अभिनय, जीवन्त संवाद र प्रभावशाली निर्देशनले चलचित्रलाई ‘हिट’ बनाएको दर्शकको प्रतिक्रिया छ ।

यस चलचित्रको पछिल्लो रिलिज गीत ‘चाइनेजो जिन्दगानीमा’ गीतले युट्युब र टिकटकमा सनसनी मच्चाएको छ । त्यसअघि सार्वजनिक भएका ‘फूल’, ‘मखमली’ र ‘काफ्ले’ जस्ता गीतहरूले पनि करोडौं श्रोताको मन जितिसकेका छन् । यसको ट्रेलर पनि युट्युब ट्रेन्डिङको पहिलो स्थानमा छ ।

यसैबीच, हलमा दर्शकको उत्साहजनक उपस्थिति कायम रहँदा दोस्रो साताबाट देशव्यापी कलाकार परिचय तथा प्रचार भ्रमण थालिने भएको छ । निर्देशक नवीन चौहानका अनुसार भ्रमण दमौलीबाट सुरु भई पोखरा, चितवन, बुटवल, दाङ, नेपालगञ्ज, धनगढी, दमक, धरान, विराटनगर र इटहरीसम्म विस्तार हुनेछ । भ्रमणमा अभिनेता विपिन कार्की, अभिनेत्री परीक्षा लिम्बू, एलेक्स पारस, गायक सुजन चापागाईं सहभागी हुनेछन् ।

‘ऊनको स्वीटर’को यो उल्लेखनीय सफलता नेपाली चलचित्र उद्योगका लागि उत्साहजनक सन्देशका रूपमा हेरिएको छ, जसले गुणस्तरीय सामग्री, प्रस्तुति र सशक्त प्रचारमार्फत् दर्शकलाई हलसम्म ल्याउन सकिने स्पष्ट प्रमाण प्रस्तुत गरेको छ ।