सही विचारबिना धेरैतिर फर्किएकाहरूलाई एकतामा ल्याउन सकिँदैन : ओली

काठमाडौं । मदन-आश्रित स्मृति दिवसका अवसरमा आयोजित विभिन्न कार्यक्रमहरूमा वामपन्थी नेताहरूले कम्युनिष्ट आन्दोलनलाई सुदृढ बनाउन वैचारिक स्पष्टता, एकता र सशक्त संगठनको अपरिहार्यता औँल्याउँदै दक्षिणपन्थी अवसरवादी प्रवृत्तिको विरोध गरेका छन् । प्रधानमन्त्री तथा एमाले अध्यक्ष केपी शर्मा ओलीले सही विचारबिना वाम एकता सम्भव नरहेको बताउँदै जनताको बहुदलीय जनवादलाई राष्ट्रिय नीतिको रूपमा स्थापित गर्न सफल भएको उल्लेख गर्नुभएको छ भने पूर्वप्रधानमन्त्री झलनाथ खनालले क्रान्ति सम्भव हुन सर्वहारा वर्गको एउटै एकीकृत पार्टी आवश्यक रहेको धारणा व्यक्त गर्नुभएको छ ।

ओलीले सही विचारबिना धेरैतिर फर्किएकाहरूलाई वामपन्थी एकतामा ल्याउन नसकिने बताउनुभएको छ । शनिबार मदननगर बल्खुमा आयोजित कार्यक्रमलाई सम्बोधन गर्दै प्रधानमन्त्री ओलीले एकताका लागि एकता नभई सही विचारमा अरूलाई सहमत गराएर पार्टीमा ल्याउने नीति लिनुपर्ने बताउनुभएको हो । ‘सही कुरालाई पनि विरोध गरेर बखेडा निकाल्ने प्रवृत्ति कम्युनिष्ट आन्दोलनमा इतिहासदेखि नै देखापर्दै आए । खास वैचारिक भिन्नता नभए पनि व्यक्तिगत स्वार्थका आधारमा दुई लाइनको कुस्ती चलाइयो । पार्टी विभाजन गरेर नामका लागि एकीकृत राख्ने प्रवृत्ति पनि छ,’ उहाँले भन्नुभयोे, ‘पार्टी प्रवृत्ति भने सही धारमै जान खोज्दै आयो । मदन भण्डारीको अगुवाइमा ल्याइएको जनताको बहुदलीय जनवादको विचारले कम्युनिष्टहरू निरंकुश हुन्छन् भन्ने हामीमाथिको आरोपलाई खण्डन गर्‍यो । यो विचार राजनीतिक लोकतन्त्रका लागि मात्र होइन आर्थिक र सामाजिक तथा मानव अधिकारका प्रश्नमा समेत राष्ट्रिय नीतिका रूपमा स्थापित भइसकेको छ ।’ प्रधानमन्त्री ओलीले आफूहरूले शक्तिका स्रोत जनता नै हुन् भन्ने मान्यताका साथ जनताको शासन कायम गर्न खोजेको बताउनुभयो । देशभक्ति, राष्ट्रिय स्वाधीनता र राष्ट्रिय अखण्डताको मार्गलाई आफूहरूले कहिल्यै नछोडेको उहाँको भनाइ थियो । आफ्नोे नेतृत्वमा सरकार रहेकाले राजतन्त्र फर्काउने प्रतिगमनको प्रयास असम्भव र अस्वीकार्य भएको पनि उहाँको जिकिर थियो ।

प्रधानमन्त्री ओलीले एमालेको नेतृत्वलाई बदनाम गरेर ढाल्न सकिने पार्टी ढाल्न सकिन्छ भन्ने तत्वरूले अनेक षड्यन्त्र गरे पनि एमाले हरेक परिस्थितिको सामना गर्न तयार रहेकाले कार्यकर्ताहरूलाई एकताबद्ध भएर ढुक्कसाथ अघि बढ्न आग्रह गर्नुभयो । विगतमा आफूले सरकारको नेतृत्व गर्दा पार्टीभित्रकै विग्रहवादी तत्वका कारण सरकार ढाल्ने र अदालतको आदेशबाट सरकार गठन गराउने गलत अभ्यास भएको पनि उहाँले टिप्पणी गर्नुभयो । यसैगरी, (एमाले)का महासचिव शंकर पोखरेलले एमाले जनताको बहुदलीय जनवादकै जगमा देशको प्रमुख राजनीतिक शक्ति बन्न सफल भएको बताउनुभएको छ । नेता पोखरेलले तत्कालीन महासचिव मदन भण्डारीको नेतृत्वमा विकास भएको जबजकै जगमा पार्टीले २०५१ सालमा संसद्को सबैभन्दा ठूलो दल बनेको उल्लेख गर्नुभयो । ‘एमाले त्यसयता निरन्तर राष्ट्रिय राजनीतिको एक निर्णयकारी शक्तिका रूपमा रहनुमा जबजको मुख्य योगदान छ’, उहाँले भन्नुभयो । निरंकुश राजतन्त्र समाप्त गर्न तथा जातीय भड्काउ तथा हिंसात्मक नीतिहरूलाई परास्त गर्न पनि जबजले मद्धत गरेको उहाँको भनाइ थियो । पार्टीमाथिको प्रतिबन्धलगायत विभिन्न समयमा चुनौतीको सामना गर्दै पार्टी अघि बढिरहेको उहाँले उल्लेख गर्नुभयो । मदन भण्डारी र एमालेका तत्कालीन संगठन विभाग प्रमुख जीवराज आश्रित पार्टी कार्यको सिलसिलामा पोखराबाट चितवनतर्फ जाँदै गर्दा २०५० साल जेठ ३ गते दासढुंगामा भएको सवारी दुर्घटनामा परी निधन भएको थियो ।

मदन भण्डारी हत्याको छानविन हुनुपर्छ : नेपाल
नेपाल कम्युनिष्ट पार्टी (समाजवादी) का अध्यक्ष माधवकुमार नेपालले मदन भण्डारी हत्याको सत्यतथ्य छानविन गर्न सरकारसँग माग गर्नुभएको छ । मदन-आश्रित स्मृति दिवसको अवसरमा शनिबार नेकपा (एस)ले आयोजना गरेको कार्यक्रममा उहाँले मदन र आश्रितको रहस्यमय हत्या भएको बताउँदै त्यसको सत्यतथ्य छानविन हुनुपर्ने सरकारसँग माग गर्नुभयो । मदन-आश्रित हत्या प्रकरणका एक मात्र साक्षी ड्राइभरको पनि रहस्यमय तरिकाले हत्या गरिएको बताउँदै उहाँले त्यसले पनि मदन-आश्रितको मृत्यु दुर्घटनामा नभई हत्या भएको पुष्टि भएको बताउनुभयो । उहाँले भन्नुभयो, ‘सत्यतथ्य छानविन गरी अपराधीलाई कानुनी दायरामा ल्याउन सरकारलाई ध्यानाकर्षण गराउन चाहन्छु ।’ अध्यक्ष नेपालले उनीहरूले पार्टीलाई वैचारिक रूपमा अगाडि बढाएको धारणासमेत राख्नुभयो । पार्टीका तत्कालीन महासचिव मदन भण्डारीले आफ्नो राजनीतिक जीवनकालमा नयाँ-नयाँ चुनौतीको सामना गर्दै अगाडि बढेको स्मरण गर्दै अहिले आफू पनि त्यस्तै चुनौतीहरूको सामना गर्दै अगाडि बढिरहेको धारणा राख्नुभयो । नेपाली विशेषताको समाजवादलाई आत्मसात गर्दै अगाडि बढ्नुपर्ने बताउँदै उहाँले देशको परिस्थितिको आधारमा कसरी अगाडि बढ्दा कम्युनिष्ट आन्दोलनलाई बचाउन सकिन्छ त्यसमा छलफल गर्नुपर्ने आवश्यकता रहेको बताउनुभयो ।

कम्युनिष्ट पार्टी एकताबद्ध हुनुपर्छ : खनाल
पूर्वप्रधानमन्त्री झलनाथ खनालले सर्वहारा श्रमिक वर्गको एउटै पार्टी नबनाएसम्म देशमा क्रान्ति सम्भव नरहेको बताउनुभएको छ । शनिबार पार्टी केन्द्रीय कार्यालय आलोकनगरमा आयोजित मदन–आश्रित स्मृति दिवसको कार्यक्रमलाई सम्बोधन गर्दै उहाँले यस्तो बताउनुभएको हो । उहाँले आजको अन्तरविरोधलाई चिरेर सही ढंगले निक्र्योल गर्न जरुरी रहेको जिकिर गर्नुभयो । कुनै पनि देशमा सर्वहारा श्रमिक वर्गको एउटै पार्टी नबनेसम्म क्रान्ति गर्न सम्भव नरहेको उहाँको भनाइ थियो । आजका अवस्थामा आफूहरूको निशाना को हो ? कसका विरुद्ध समाजवादी क्रान्ति गर्छौं नेपालमा ? भन्ने कुरालाई स्पष्ट पारेर समाजवादी क्रान्तिलाई सम्पन्न गर्नुपर्ने बताउनुभयो । त्यसका लागि कम्युनिष्ट पार्टीलाई अझ बढी सही वैचारिक राजनीतिक कार्यदिशा, नीति र सिद्धान्तको आधारमा एकताबद्ध बनाउनुपर्ने आवश्यकता रहेको उहाँको भनाइ थियो । साना-साना राजनीतिक दलहरू खोलेर सानो-सानो कसौँडीमा दाल पकाएर खाने खालको अवस्था बनेको भन्दै यसलाई तोड्नुपर्ने उहाँको सुझाव थियो ।

माओवादीलाई कांग्रेस एमालेले सरकारमा पुर्‍याएका होइनन् : प्रचण्ड
नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले दलाल र बिचौलियाविरुद्ध संघर्ष गरेकै कारण आफू नेतृत्वको सरकारलाई हटाइएको दाबी गर्नुभएको छ । माओवादी केन्द्रको जनतासँग माओवादी-मध्यपहाडी लोकमार्ग केन्द्रित जागरण अभियानका क्रममा शनिबार डोटीको दीपायलमा आयोजित सभालाई सम्बोधन गर्दै अध्यक्ष प्रचण्डले सरकारबाट हट्नुको कारणमा पुनः सोही कुरा दोहो¥याउनुभएको हो । यद्यपि, माओवादी केन्द्रलाई तीन-तीन पटकसम्म सरकारमा पुर्‍याएको कांग्रेस र एमाले नभएको उहाँले जिकिर गर्नुभयो । ‘हामीलाई सिंहदरबारमा पुर्‍याउने, विस्तृत शान्ति सम्झौतामा पुर्‍याउने, हामीलाई तीन-तीनपटक सरकारको नेतृत्व गर्ने ठाउँमा पु¥याउने कांग्रेसहरू एमाले होइन । गरिब, मजदुर किसान र उत्पीडित वर्ग, समुदायले पुर्‍याएको हो,’ उहाँले भन्नुभयो । तर, यसबीचमा जति जनताको नजिक जानुपर्ने र उनीहरूको कुरा सन्नुपर्ने हो, त्यहाँ कमजोरी भएको अध्यक्ष प्रचण्डको बताउनुभयो । ‘त्यो आत्मसमीक्षा गरेर फेरि तपाईंको साथमा तपाईंहरूका पीडा सुनेर त्यसलाई राष्ट्रव्यापी रूपमा स्थापित गर्ने उद्देश्यका साथ आएका छौँ,’ उहाँले भन्नुभयो । उहाँले माओवादी केन्द्र बलियो हुँदासम्म देशका महिला, दलित, मजदुर, किसानहरू, आदिवासीहरू, जनजातिहरू, थारूहरू सबै शक्तिशाली हुने बताउनुभयो । तर, माओवादी केन्द्र कमजोर भए सबैको अधिकार खोसिने खतरा हुने उहाँको भनाइ थियो ।