जनताले मुन्ट्याएको राजतन्त्र फर्कन सम्भव छैन : प्रधानमन्त्री

काठमाडौं । प्रधानमन्त्री केपी शर्मा ओलीले जनताले फालेको राजतन्त्र फर्कने कुनै सम्भावना नरहेको बताउनुभएको छ । पोखरामा शुक्रबारदेखि सुरु भएको राष्ट्रिय युवासंघ नेपालको १०औँ महाधिवेशन उद्घाटन सत्रमा एमाले अध्यक्षसमेत रहनुभएका ओलीले राजावादीले राजा फर्काउने मिति फेरि सार्ने भन्दै कटाक्ष गर्नुभयो । उहाँले घरमै सिंहासन बनाएर राख्न भन्दै व्यंग्यसमेत गर्नुभयोे ।

‘यही आउने १५ गते राजालाई सिंहासनमा राख्छन् रे ! घरैमा सिंहासन बनाएर राखे भो । देशको राजसिंहासन भनेको गइसक्यो,’ उहाँले थप्नुभयोे, ‘नेपाली जनताले उल्टाएर फालिसके । कहाँ हराइसक्यो । संविधान अर्को बनिसक्यो । संसद् छ । राष्ट्रपति छ । न्यायालय छ । संविधान छ । लोकतान्त्रिक व्यवस्था छ ।’ राजतन्त्र फर्काउने राजावादीको अभियानपछि समाप्त हुने उहाँले बताउनुभयो । ‘भदौ लागेपछि भ्यागुता ट्वार-ट्वार गर्छ । भदौ सकिएपछि ट्वार-ट्वार समाप्त हुन्छ,’ प्रधानमन्त्री ओलीले भन्नुभयोे, ‘त्यसो भएर कुनै प्रकारका भ्रममा पर्नुपर्ने आवश्यकता छैन । यी ट्वार-ट्वारहरू अलि समयका हुन् । पछि समाप्त हुन्छन् ।’

कुण्डली हेरेर पूर्वराजा ज्ञानेन्द्र शाहलाई फेरि राजा बन्ने सपना डा. जगमान गुरुङले देखाएको प्रधानमन्त्री ओलीले टिप्पणी गर्नुभयो । उहाँले आफूसहित नेताहरूको कुण्डली पनि हेर्न भन्दै व्यंग्य गर्नुभयोे । ‘ज्ञानेन्द्रको कुण्डली हेर्नुभयो रे ! राजा बन्ने देख्नुभयो रे ! उहाँलाई म मेरो पनि कुण्डली पठाइदिन्छु एकपटक हेर्नुस् अनि थाहा पाउनुहुन्छ । एउटाको कुण्डली हेरेर हुन्छ ? यहाँ त थुप्रो मान्छे छन्,’ उहाँले भन्नुभयो । झुटा लाञ्छना लगाएर जनतालाई एमालेबाट टाढा बनाउन विभिन्न शक्ति लागेको उहाँले बताउनुभयो ।

प्रहरीले बुझायो तीनकुने घटनाको अनुसन्धान प्रतिवेदन
गत १५ चैतमा तीनकुने प्रदर्शनका क्रममा भएको आगजनी, तोडफोड र लुटपाटसँग सम्बन्धित अनुसन्धान पूरा गरी प्रहरीले रायसहितको अनुसन्धान प्रतिवेदन बुझाएको छ । घटनामा संलग्न ६१ जनालाई प्रतिवादी बनाउने प्रहरी सिफारिश छ । प्रहरी प्रतिवेदनअनुसार अब आइतबार मुद्दा दायर हुने भएको छ । उनीहरूविरुद्ध आपराधिक उपद्रव, राज्यविरुद्धको कसुर, संगठित अपराध कसुर, ज्यान मार्ने र ज्यान मार्ने उद्योगअन्तर्गतका चार कसुर लगाउने तयारी छ । सरकारी वकिल कार्यालय काठमाडौंका प्रमुख सहन्यायाधिवक्ता रामहरि काफ्लेले प्रहरीको प्रतिवेदन प्राप्त भएको र आइतबार अदालतमा मुद्दा दर्ता गरिने बताउनुभयो । जिल्ला प्रहरी परिसर काठमाडौैंले गत १५ चैतदेखि नै घटनाको अनुसन्धान गर्दै आएको छ । घटनामा हालसम्म १७० भन्दा धेरै पक्राउ परेका थिए । जसमध्ये ५३ अभियुक्त प्रहरी हिरासतमै छन् । उनीहरूविरुद्ध बिहीबार मात्रै दुई दिनको म्याद थप भएको थियो ।

गत १५ चैतमा राजसंस्था पुनस्र्थापनाका लागि संयुक्त जनआन्दोलन समितिले गरेको प्रदर्शन हिंसा, तोडफोड, आगजनी र लुटपाटमा परिणत भएको थियो । दुईजनाले ज्यानसमेत गुमाएका थिए । तीनकुने घटनामा राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्र, महामन्त्री धवलशमशेर राणा, जनआन्दोलन समितिका कमान्डर दुर्गा प्रसाईंलाई मुख्य प्रतिवादी बनाउन लागिएको छ ।

आन्दोलन अनुगमन गरिदिन आयोगलाई राजावादीको आग्रह
राष्ट्रिय प्रजातन्त्र पार्टी (राप्रपा)का नेता र समितिका संयोजक नवराज सुवेदीसहित आयोग पुगेर १५ वैशाखको आन्दोलन अनुगमन गरिदिन अनुरोध गरेका छन् । उनीहरूले मानव अधिकार आयोगका अध्यक्ष टपबहादुर मगरलाई भेटेर पत्रसमेत बुझाएका हुन् । आफ्नो आन्दोलन शान्तिपूर्ण हुने बताउँदै समितिले सरकारका तर्फबाट घुसपैठ हुनसक्ने आशंका गर्दै अनुगमन गरिदिन अनुरोध गरेको बताएको छ ।

आयोगलाई बुझाएको पत्रमा भनिएको छ, ‘२०८१ चैत्र १५ गते काठमाडौंको तीनकुनेमा भएको जनप्रदर्शनमा सरकारले जसरी नियोजित रूपमा आक्रमण गरी प्रदर्शनलाई अराजक र हिंसात्मक बनाउने कार्य गर्‍यो । त्यसैगरी, जेठ १५ गतेबाट गरिने आन्दोलनको सन्दर्भमा राष्ट्रवादी नेता तथा अभियन्ताहरूलाई सो आन्दोलन अगावै अनेकौँ बहानामा धरपकड गरिने सम्भावनासमेत देखिएकाले तत् सम्बन्धमा विशेष चनाखो रही अनुगमन गरिदिन हुन सादर अनुरोध गर्दछौँ ।’

१५ जेठमा हुने आन्दोलनमा सरकारले दमन गर्ने संकेत देखिएको भन्दै पत्रमा लेखिएको छ, ‘जेठ १५ बाट तय भएको शान्तिपूर्ण जनआन्दोलनको सन्दर्भमा सरकारबाट नेपाली जनताको मानव अधिकार, प्रजातान्त्रिक अधिकार कुण्ठित हुने सम्भावना र संकेतहरू देखापरेका छन् ।’ आन्दोलनको अनुगमनसँगै आवश्यक परेको खण्डमा हस्तक्षेप गर्दिन पनि राजावादीले आयोगलाई अनुरोध गरेका छन् । ‘नागरिकको मानव अधिकार, प्रजातान्त्रिक हक अधिकार संरक्षण र सुनिश्चित गर्न हालैबाट अनुगमन गरिदिन हुन र आवश्यकताअनुरूप हस्तक्षेपकारी भूमिकासमेत निर्वाह गरिदिन हुन अनुरोध गर्दछौँ,’ समितिले आयोगलाई बुझाएको पत्रमा लेखिएको छ ।