काठमाडौं । लामो समयदेखि अवरुद्ध रहेको प्रतिनिधिसभा अब आज (आइतबार)देखि सञ्चालनमा आउने संकेत देखिएको छ । संसद् सञ्चालनको लागि सत्तापक्ष र प्रतिपक्षबीच संवादको गतिमा सुधार आएसँगै सहमतिको सम्भावना बलियो बन्दै गएको हो । सभामुख देवराज घिमिरेले आइतबारको बैठक सहज रूपमा सञ्चालन हुने विश्वास व्यक्त गर्नुभएको छ । सभामुख घिमिरेले सत्तापक्ष र प्रतिपक्षबीच गम्भीर बहस नहुनु चिन्ताको विषय भएको उल्लेख गर्नुभयो । ‘हामी संसद् सुचारु गर्ने निष्कर्षमा पुग्दै छौँ,’ उहाँले भन्नुभयोे, ‘आइतबारको बैठकमा जरुरी सूचना र विधेयकहरूमाथि काम गरिनुपर्ने थियो, त्यसैले संवादलाई निष्कर्षमा पुर्याउन गम्भीर प्रयास भइरहेका छन् ।’
संसद् अवरोधको मूलकारण त्रिभुवन अन्तर्राष्ट्रिय विमानस्थलको अध्यागमन कार्यालयमा भएको भिजिट भिसा काण्ड र त्यसमा गृहमन्त्री रमेश लेखकको राजीनामाको माग हो । प्रमुख विपक्षी दल रास्वपा उक्त मागमा अडिएको छ भने माओवादी केन्द्र र एकीकृत समाजवादी भने केही लचिलो देखिएका छन् । सुरुवाती चरणमा गृहमन्त्रीको राजीनामा माग गरेको माओवादी केन्द्र अहिले अख्तियारले प्रारम्भिक छानविन गरेपछि मात्र संसदीय समिति बनाउने सत्तापक्षको प्रस्तावमा सहमत हुने देखिएको छ । माओवादी अध्यक्ष पुष्पकमल दाहाल ‘प्रचण्ड’ले समेत यसबारे पार्टीभित्र छलफल थाल्नुभएको छ । उहाँले पार्टी बैठकमा ‘कति दिनसम्म यो तन्काउने ?’ भन्दै अवरोध अन्त्य गर्ने बाटो खोज्नुपर्नेमा जोड दिनुभएको थियो ।
तर, रास्वपा भने अझै आफ्ना मागमा स्पष्ट अडिएको छ । पार्टीका प्रमुख सचेतक सन्तोष परियारले ‘हामी उच्चस्तरीय छानविन समिति हाम्रो न्यूनतम माग हो,’ भन्दै अख्तियारको छानविनपछि मात्रै समिति बनाउने प्रस्तावप्रति असन्तुष्टि जनाउनुभएको छ । संसद् सञ्चालन गर्नका लागि नेपाली कांग्रेसले विशेष भूमिका लिँदै आएको छ । कांग्रेस उपसभापति पूर्णबहादुर खड्काले रास्वपा र माओवादी केन्द्रसँग सक्रिय छलफल गरिरहनु भएको छ । एमालेले पनि संसद्मा गृहमन्त्रीले जवाफ दिनुपर्ने र त्यसपछि अन्य विषयमा छलफल गर्न सकिने भन्दै लचकता देखाएको छ ।
‘सेफ ल्याण्डिङ’को तयारी
सत्ता-प्रतिपक्षबीचको संवाद र समन्वयलाई मध्यमार्गी मोडमा लैजाने प्रयास भइरहेको देखिन्छ । सभामुख घिमिरेले पनि सत्ता र प्रतिपक्षले अहिलेको परिस्थितिलाई अवसरका रूपमा लिँदै संसद्लाई प्रभावकारी बनाउनुपर्ने धारणा राख्नुभएको छ । ‘प्रतिगामी शक्तिहरू सल्बलाइरहेका बेला संसद्लाई कमजोर बनाउनु उपयुक्त हुँदैन,’ उहाँले भन्नुभयो । अख्तियारले छानविन गरेपछि मात्रै संसदीय समिति गठन गर्ने लिखित प्रतिबद्धताको सन्दर्भमा कांग्रेस, माओवादी केन्द्र र एकीकृत समाजवादी सहमत जस्तो देखिए पनि रास्वपाको अडानका कारण अवरोध पूर्ण रूपमा हट्नेमा अन्योल कायमै छ । यद्यपि, छलफल जारी रहेकाले आइतबारसम्ममा निकास आउने विश्वास सत्तापक्षमा छ । अहिले सिंगो संसद् ‘सेफ ल्याण्डिङ’को मोडमा प्रवेश गरिरहेको आभास भइरहेको छ, जसले आइतबार संसद् सुचारु हुने संकेत प्रष्ट पारेको छ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच