अहमदाबादमा एयर इण्डियाको विमान दुर्घटनाग्रस्त

काठमाडौं । भारतमा २४२ जना सवार विमान दुर्घटनाग्रस्त भएको छ । अहमदाबादको सरदार बल्लभभाइ पटेल अन्तर्राष्ट्रिय विमानस्थलबाट बिहीबार दिउँसो १ः३८ बजे उडान भरेको एयर इण्डियाको बोइङ-७८७ विमान मेघनीनगरको आवासीय क्षेत्रमा दुर्घटनाग्रस्त भएको हो । उड्नेबित्तिकै उचाइ लिन नसक्दा विमान केही मिनेटमै दुर्घटनामा परेको भारतीय सञ्चारमाध्यमहरूले जनाएका छन् ।

विमानमा क्याबिन क्रुसहित २४२ जना सवार रहेको एयर इण्डियाले एक्समार्फत जानकारी दिएको छ । जसमध्ये दुईजना पाइलट, १० जना क्याबिन क्रु सदस्य र २३० यात्रु रहेका थिए । जसमध्ये १६९ जना भारतीय यात्रु रहेका छन् । त्यस्तै, बेलायतका ५३ जना, पोर्चुगलका सातजना र क्यानडाका एक यात्रु रहेको एयर इण्डियाले जनाएको छ । विमानमा गुजरातका पूर्वमुख्यमन्त्री विजयी रूपाणी पनि सवार हुनुहुन्थ्यो । उहाँ छोरी भेट्न बेलायत जान लाग्नुभएको थियो । उहाँको निधनको पुष्टि पनि भारतीय सरकारले गरिसकेको छ ।

विमान विस्तारै तल तल खसेर एउटा घरमाथि खसेको थियो । उक्त घर बिजे मेडिकल कलेजका इन्टर्न डाक्टरहरू बस्ने आवासीय भवन हो । घटनामा ४१ जना घाइते भएको विवरण सार्वजनिक भएको छ । घाइते अधिकांश डाक्टर र उनीहरूको परिवारका सदस्य रहेको बताइएको छ । यो समाचार तयार पार्दासम्म क्षतिको सम्पूर्ण विवरण आइसकेको छैन ।

दुर्घटनापछि सरदार बल्लबभाइ पटेल अन्तर्राष्ट्रिय विमानस्थल अर्को सूचना जारी नभएसम्मका लागि बन्द गरिएको थियो । शव संकलन गरेर त्यहाँको सरकारी अस्पतालमा राखिएको छ । मृतकहरूको पहिचान हुन नसक्ने गरी शव जलेको भनिएको छ । डिएनए टेक्स गर्ने काम भइरहेको छ । जसका लागि परिवारका सदस्यहरूसँग स्याम्पल मागिएको छ ।

एयर इण्डियाले दुर्घटनापछि सामाजिक सञ्जालमा आफ्नोे प्रोफाइल ब्ल्याकआउट गरेको छ । भारतीय नागरिक उड्डयन कार्यालयको मौसम पूर्वानुमान शाखाका अनुसार त्यो समय आकाशमा कालो बादलधरी लागेको थिएन । र, ठूलो हावाहुरीको पनि कुनै सम्भावना थिएन । यसका बाबजुद विमानस्थलको धावनमार्ग छाडेको केही मिनेटमै विमान किन आकाशमा अडिइरहन सकेन र त्यो जमिनतिर हुर्रियो भन्नेमा धेरैको चासो छ ।

बिबिसीका अनुसार यो विमानले उड्नेबित्तिकै एयरट्राफिक कन्ट्रोलमा सम्पर्क गरेर आपतकालीन सूचना (मे-डे कल) दिएको थियो । लगत्तै विमानको सम्पर्कविच्छेद भयो । एयर ट्राफिक कन्ट्रोलले सोध्दा पनि जवाफ फर्काएन । बिबिसीले फ्लाइट राडारलाई उद्धृत गर्दै लेखेको छ, ‘विमान धावनमार्ग छाडेर जमिनको सतहभन्दा ६२५ फिटमाथि हुँदा सम्पर्क विच्छेद भएको थियो ।’ उक्त विमान क्याप्टेन सुमित सभरवाल र फस्र्ट अफिसर क्लाइभ कुन्दरले उडाइरहनु भएको थियो । क्याप्टेन सभरवालसँग आठ हजार दुई सय घण्टा र कोपाइलट कुन्दरसँग एक हजार एक सय घण्टाको अनुभव रहेको भारतको नागर विमान महानिर्देशनालयलाई उद्धृत गर्दै भारतीय सञ्चारमाध्यमले जनाएका छन् । यसअघि पनि एअर इण्डियाका पाँच विमानहरू दुर्घटनामा परेका थिए । ती दुर्घटनामा सयौँ नागरिकको ज्यान गएको थियो ।

भाग्यले बाँचे एक यात्रु
अहमदाबादमा भएको विमान दुर्घटनामा एक यात्रु बाँच्न सफल भएका छन् । भारतीय सञ्चारमाध्यमका अनुसार ‘इलाभेन–ए’ सिटमा बस्नुभएका ३८ बर्षीय रमेश विश्वास कुमार बाँच्न सफल हुनुभएको हो । उहाँको अहमदाबादको असारवास्थित सिभिल अस्पतालमा उपचार जारी छ । उहाँ विमानको पखेटा मुनिको ढोकासँगै बस्नुभएको थियो । विमान खसेर आगो लागेपछि ढोका खुल्दा त्यहाँबाट बाहिर उछिट्टिएर उहाँ बचेको भारतीय सञ्चारमाध्यमले जनाएका छन् । उक्त स्थानबाट घाइते अवस्थामै उहाँ सडकसम्म पुग्नुभएको थियो । त्यहाँबाट सुरक्षाकर्मीले अस्पताल पु¥याएको बताइएको छ । उहाँको छाती, आँखा र खुट्टामा चोट लागेको छ । ‘टेकअफ भएको ३० सेकेन्डमै ठूलो आवाज आयो अनि विमान दुर्घटना भयो । सबै कुरा एक्कासी भयो,’ विश्वासले हिन्दुस्तान टाइम्सलाई बताउनुभएको छ । विश्वास बेलायती नागरिक हुनुहुन्छ । उहाँ केही दिनका लागि आफ्नो परिवार भेट्न भारत आउनुभएको थियो र आफ्ना दाजु अजय कुमारसँगै बेलायत फर्किँदै हुनुहुन्थो । उहाँले आफूसँग रहेको बोर्डिङ पास पनि देखाउनुभएको छ । उहाँले हिन्दुस्तान टाइम्सलाई भन्नुभयो, ‘जब म उठेँ, मेरो वरिपरि शवहरू थिए । म डराएँ । म उठेँ र दौडिएँ । वरिपरि विमानका टुक्राहरू थिए । कसैले मलाई समातेर एम्बुलेन्समा हाल्यो र अस्पताल ल्यायो ।’ भारतीय सरकारले पनि उक्त व्यक्ति विमान भित्रै रहेको पुष्टि गरेको छ ।

हामीलाई स्तब्ध पारेको छ : मोदी
भारतीय प्रधानमन्त्री नरेन्द्र मोदीले यो दुःखको घडी भएको बताउनुभएको छ । मोदीले सामाजिक सञ्जाल एक्समा लेख्दै भन्नुभएको छ, ‘अहमदाबादको यो घटनाले हामीलाई स्तब्ध तुल्याउनुका साथै दुःखी पनि बनाएको छ । यो शब्दमा व्यक्त नै गर्न नसकिने गरी हृदयविदारक घटना हो । यो दुःखको घडी हो र यसबाट प्रभावित सबैमा मेरो सहानुभूति छ । म प्रभावितहरूलाई सघाउन लागिपरेका मन्त्री तथा अधिकारीहरूसँग सम्पर्कमा रहेको छु ।’

दुर्घटनाप्रति नेपालद्वारा दुःख व्यक्त
भारतको अहमदाबादमा भएको विमान दुर्घटनाप्रति सरकारले दुःख व्यक्त गरेको छ । बिहीबार परराष्ट्र मन्त्रालयले विज्ञप्ति निकालेर घटनाप्रति गहिरो दुःख व्यक्त गरेको हो । विज्ञप्तिमा भनिएको छ, ‘नेपाल सरकार भारत सरकार र मित्रवत् भारतीय जनताप्रति, साथै यस दुर्भाग्यपूर्ण घटनामा ज्यान गुमाउनेहरूका शोक सन्तप्त परिवारजनप्रति हार्दिक समवेदना व्यक्त गर्दछ ।’ यस दुःखको घडीमा नेपाल सरकार र नेपाली जनता भारत सरकार र भारतीय जनताको साथमा खडा रहेको समेत उल्लेख गरिएको छ । २४२ यात्रु बोकेको एयर इण्डियाको विमान बिहीबार अहमदाबाद एयरपोर्टबाट उडेको केही क्षणमै दुर्घटनाग्रस्त भएको थियो । यसैगरी, राष्ट्रपति रामचन्द्र पौडेल, प्रधानमन्त्री केपी शर्मा ओली, परराष्ट्रमन्त्री डा. आरजु राणा देउवा लगायतले पनि घटनाप्रति गहिरो दुःख व्यक्त गर्नुभएको छ । राष्ट्रपति पौडेलले भारतको अहमदाबादबाट लण्डनका लागि उडेको एअर इण्डियाको विमान बिहीबार दुर्घटनामा परेको खबरले आफू स्तब्ध भएको बताउनुभएको छ । सो दुर्घटनाबाट भएको अमूल्य मानवीय क्षतिप्रति गहिरो दुःख व्यक्त गर्नुभएको राष्ट्रपति पौडेलले सामाजिक सञ्जालमा उल्लेख गर्नुभएको छ ।