काठमाडाैं । नेपाल विद्युत् प्राधिकरणका पूर्वकार्यकारी निर्देशक कुलमान घिसिङले मुलुकबाट लोडशेडिंग हटे पनि अझै धेरै क्षेत्रमा अँध्यारो बाँकी रहेको र त्यसलाई हटाएर उज्यालो मुलुक बनाउनु पर्ने बताउनुभएकाे छ ।
सर्लाहीका आम नागरिकहरुको तर्फबाट आफुलाई गरिएको नागरिक अभिनन्दनमा बोल्दै उहाँले अहिले नेपाली जनताले कुनै राजनीतिक विचारधाराभन्दा पनि प्रभावकारी सेवाप्रवाह, सुशासन, विकास र आर्थिक समृद्धि खोजेको उल्लेख गर्नुभयाे ।
आफुले गरेको काम देश विदेशमा रहेका नेपालीले प्रष्टैसँग देखेको तर सरकारले शून्य नम्बर दिएको उहाँले बताउनुभयाे । जनतालाई अँध्यारोमा राखेर डेडिकेटेड तथा ट्रंक लाइनमार्फत विद्युत आपूर्ति लिएका उद्योगको बक्यौता उठाउन इमान्दार प्रयास गर्दा पदबाट हटाइएको उहाँले गुनासो गर्नुहाेस्।
सबै नागरिकको घरदैलोसम्म बिजुली पुराउने राज्यको दायित्व भएको पनि उहाँले बताउनुभयाे । "यदि आर्थिक कारणले तपाईंको घर सम्म बिजुली पुगेको छैन भने वडाको सिफारिस सहित नजीकको विद्युत प्राधिकरणको कार्यालयमा जानोस्, सरकारले तपाईंको घरमा निशुल्क बिजुली जोडी दिन्छ," उहाँले भन्नुभयाे ।
उहाँले आफु पदमा नभए पनि केहि समस्या परे आफुलाई सम्झन आग्रह गर्नुभयाे । गत बुधबार सर्लाहीको हरिवनमा उहाँलाई स्थानीय नागरिकले अभिनन्दन गर्नुभयाे ।
घिसिङलाई दोसल्ला र ताम्रपत्रसहित नागरिक अभिनन्दन गरिएको थियो। देशमा लोडसेडिङ अन्त्य गरी विद्युत् प्राधिकरणमा सुधार गर्न भूमिका खेलेको भन्दै उहाँको अभिनन्दन गरिएको हो । चार महिना मात्रै पदावधि बाँकी रहेका घिसिङलाई सरकारले गत चैत्र महिनामा प्राधिकरणबाट हटाएको थियो।
'लोडशेडिङमुक्त' नेपाल
करिब आठ वर्षअघि घिसिङले पहिलो पटक विद्युत् प्राधिकरणको नेतृत्व सम्हाल्नुभएकाे बेला नेपाल 'लोडशेडिङमुक्त' घोषणा गरिएको थियो। विसं २०७३ सालकै तिहारबाट सहरहरूमा 'लोडशेडिङ' सकिएको जनाउँदै २०७५ साल वैशाखमा पूरै देशलाई लोडशेडिङबाट मुक्त बनाइएको थियो।
विसं २०७८ साउनमा पुष्पकमल दाहाल 'प्रचण्ड' प्रधानमन्त्री हुँदा घिसिङ दोस्रो पटक प्राधिकरण प्रमुखमा नियुक्त हुनुभएकाे थियाे । तर प्रचण्ड हटेर एमाले-कांग्रेस गठबन्धन सरकार बन्ना साथै उहाँलाई स्पष्टिकरण सोध्न थलिएको थियो। उद्योगहरूमा डेडिकेटेड र ट्रङ्क लाइनको महसुल नतिरेका कारण प्राधिकरणले त्यहाँको विद्युत् काट्ने र त्यसो गर्न नदिने ऊर्जा मन्त्री दीपक खड्का तथा प्रधानमन्त्री केपी शर्मा ओलीसंग उहाँको सार्वजनिक रुपमा देखिने गरी तनाव बढेको थियो।
कुनै बेला घाटामा रहेको विद्युत् प्राधिकरण ८४ अर्ब रुपैयाँ नाफामा पुगेको र चुहावट समेत १४ प्रतिशतले घटेको सरकारी विवरणमा देखिन्छ। चुहावटमा एक प्रतिशत कम गर्दा वार्षिक १ अर्ब रुपैयाँ जोगिने बताइन्छ।घिसिङ नेतृत्वमा आएसँगै प्राधिकरणले विभिन्न जलविद्युत आयोजनाहरु निर्माण गर्न १ खर्ब रुपैयाँ लगानी गरेको बताइएको छ ।
विद्युत प्राधिकरणको नेतृत्वबाट बाहिरिए पछि आफ्नो भावी योजनाबारे घिसिङले केही बताउनुभएकाे छैन् । यद्यपि उहाँ सक्रिय राजनीतिमा आउन सक्ने धेरैले अनुमान गर्नुभएकाे छ ।
यो खबर पढेर तपाईलाई कस्तो महसुस भयो ?
1
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच