सानो लक्ष्य पूरा गर्न ठूलो सकस

काठमाडौं । जारी त्रिकोणात्मक टी-२० अन्तर्राष्ट्रिय शृंखलामा नेपालले पहिलो जित हात पारेको छ । मंगलबार राती सम्पन्न दोस्रो ‘लो स्कोरिङ’ खेलमा नेपालले स्कटल्याण्डलाई दुई विकेटले पराजित गरेको हो । नेपालले ९८ रनको झिनो लक्ष्य ग्लास्गोस्थित टिटउड क्रिकेट मैदानमा १ बलअगाडि पूरा गरेको हो । सानो लक्ष्यमा पुग्न नेपालले निकै संघर्ष गर्नुपरेको थियो । स्कटल्याण्डको टिटउड रंगशालामा भएको खेलमा स्कटल्याण्डले दिएको ९८ रनको लक्ष्य नेपालले १९ दशमलब ५ ओभरमा आठ विकेट गुमाएर पूरा गर्‍यो । अघिल्लो दिनको तुलनामा विकेट ब्याटिङका लागि निकै कठिन बनेको थियो । नेपालले ७ चौकामात्र प्रहार गरेको थियो । स्कटल्याण्डले पनि ६ चौका र २ छक्कामात्र प्रहार गर्न सकेको थियो ।

नेपाललाई जिताउन ओपनर कुशल भुर्तेलले ३० रनको योगदान दिनुभयो । साथै दीपेन्द्र सिंह ऐरीले १४, बसिर अहमदले १३ र किरण ठगुन्नाले १० रनको योगदान दिँदा अन्य ब्याटरले दोहोरो अंकमा रन बनाउन सकेनन् । स्कटल्याण्डका लागि मिचेल लिक्स र साफयान सरिफले दुई/दुई विकेट लिनुभयो । साथै ब्रेन्डन म्याककुलन, मार्क वाट, ज्याक जारभिस र जास्पर डेभिडसनले समान एक/एक विकेट लिनुभयो । सानो स्कोरको लक्ष्य लिएर आएको नेपालको पनि सुरुवात राम्रो हुन सकेन । लगातार दुई चौका प्रहार गरेपछि लोकेश बम आउट हुनुभयो ।

त्यसपछि अनिल साह ३ र कप्तान रोहित पौडेल ७ रनमा आउट हुनुभयो । रूपेश सिंह ३ रनमै आउट हुनुभयो । अन्तिम ओभरमा नेपाललाई विजयका लागि ४ रन चाहिएको थियो । किरण ठगुन्ना र करण केसीले पहिलो ३ बलमा १–१ रन लिएपछि स्कोर बराबरी भएको थियो । तर, चौथो बलमा ठूलो सट खेल्ने क्रममा किरण १० रन बनाई आउट हुनुभयो । नयाँ ब्याटर सन्दीप लामिछानेले १ रन जोड्दै नेपाललाई जिताउनुभएको हो । करण ३ रनमा अविजित रहनुभयो ।

पहिले ब्याटिङ गरेको स्कटल्याण्डले १९ दशमलब ४ ओभरमा सबै विकेट गुमाउँदै ९७ रन बनाएको थियो । उसका लागि मिचेल लिस्कले सर्वाधिक ४६ रनको योगदान दिनुभयो । त्यसैगरी, कप्तान म्याथ्यु क्रसले १५ र ब्रेन्डन म्याकमुलनले १० रन बनाउनुभयो । बलिङतर्फ नेपालका लागि सन्दीप लामिछानेले चार विकेट लिनुभयो भने करण केसी र दीपेन्द्रसिंह ऐरीले दुई-दुई विकेट लिनुभयो । साथै ललितनारायण राजवंशीले एक विकेट लिनुभयो । लामिछाने खेलको प्लेयर अफ द म्याच घोषित हुनुभयो ।

यसअघि पहिलो खेलमा नेपाल नेदरल्याण्ड्ससँग तेस्रो सुपर ओभरमा पराजित भएको थियो । नेपालले आज (बिहीबार) नेदरल्याण्ड्ससँग खेल्दैछ । स्कटल्याण्डमा भएको आइसिसी विश्वकप लिग २ पछि तीन टोलीले अहिले टी–२० त्रिकोणात्मक सिरिज खेलिरहेका छन् ।

नन्दन यादवले त्रिदेशीय शृंखलाका सबै खेल गुमाउने
नेपालका तीव्र गतिका बलर नन्दन यादवले स्कटल्याण्डमा जारी त्रिदेशीय टी-२० शृंखलाका सम्पूर्ण खेल गुमाउने हुनुभएको छ । तितवुड क्रिकेट मैदानमा त्रिदेशीय शृंखलाको पहिलो खेलमा नेदरल्याण्ड्ससँगको खेलमा अन्तिम ओभर बलिङ गर्ने बेला नन्दनको बुढी औँलामा चोट लागेको थियो । १९.५ ओभरमा बलिङ गरिसकेपछि थ्रोमा आएको बल समाउने क्रममा उहाँको औँलामा चोट लागेको थियो । उहाँले उक्त खेलमा बुढी औँलामा टेप लगाएर ब्याटिङमा आउनुभएको थियो । अन्तिम ओभरमा उहाँको दुई बाउन्ड्रीमा नेपालले सुपर ओभर खेलेको थियो ।

दोस्रो खेलमा उहाँलाई प्रतिस्थापन गर्दै बसिर अहमदलाई प्लेइङ सेटमा खेलाइएको थियो । यसअघि नै नेपाली टिमका दुई बलरद्वय सोमपाल कामी र गुल्शन झाले घाइते भएर बाँकी खेल गुमाउनुभएको थियो ।

टी-२० आईमा करणको १०० विकेट
करण केसीले टी-२० आईमा १००औँ विकेटको कोशेढुंगा पूरा गर्नुभएको छ । स्कटल्याण्डविरूद्वको खेलमा मंगलबार एक विकेट लिएसँगै उहाँले सय विकेटको व्यक्तिगत उपलब्धि हासिल गर्नुभएको हो । सय विकेट पूरा गर्न ३३ वर्षे करणलाई १०१ खेल कुर्नुप¥यो । १० वर्षअगाडि नेपालको नेदरल्याण्ड्स भ्रमणमा एमस्ट्राडाममा नेदरल्याण्ड्सविरुद्ध खेलेर करणले टी-२० अन्तर्राष्ट्रियको यात्रा सुरु गर्नुभएको थियो । सन् २०२२ मा पपुवा न्युगिनीविरुद्ध कीर्तिपुरमा २२ रन खर्चेर ५ विकेट लिनुभएका करणको टी–२० अन्तर्राष्ट्रियमा उत्कृष्ट बलिङ प्रदर्शन थियो । मलेसिया सम्मिलित तीनदेशीय उक्त शृंखलामा करणले १३ विकेट लिनुभएको थियो, जुन करणको एउटा प्रतियोगितामा उत्कृष्ट प्रदर्शन रहेको छ । नेपालको एकदिवसीय अन्तर्राष्ट्रिय यात्रामा करणले अझ विशेष इनिङ्स खेल्दै आउनुभएको छ ।

केसी यो उपलब्धि हासिल गर्ने नेपालको दोस्रो बलर हो । यसअघि सन्दीप लामिछानेले १०० विकेट पूरा गरिसक्नुभएको छ । सन्दीप लामिछानेले नेपालबाट ५८ खेलमा १११ विकेट लिइसक्नुभएको छ । सोमपाल कामी ७८ खेलमा ७६ विकेटका साथ तेस्रो, अविनाश बोहरा ६२ खेलमा ७५ विकेटका साथ चौथो र दीपेन्द्रसिंह ऐरी ८० खेलमा ५० विकेटका साथ नेपालबाट सर्वाधिक विकेट लिने खेलाडीको सूचीमा पाँचौं स्थानमा हुनुहुन्छ ।

नेपाल-वेस्ट इण्डिज टी–२० आई सिरिज युएईमा
नेपाल क्रिकेट संघ क्यानले नेपाली राष्ट्रिय क्रिकेट टिमले आगामी सेप्टेम्बरमा युएईको सारजाहमा वेस्ट इण्डिजसँग तीन खेलको टी-२० सिरिज खेल्ने कार्यतालिका सार्वजनिक गरेको छ । नेपाल क्रिकेट संघले आयोजना गर्ने उक्त प्रतियोगितालाई न्युट्रल भेन्युका रूपमा सारजाहमा खेलाउने भएको हो । खेल २७, २८ र ३० सेप्टेम्बरमा आयोजना हुनेछ ।

नेपालले पहिलोपटक विश्वविजेता टिमसँग द्विपक्षीय टी-२० अन्तर्राष्ट्रिय सिरिज खेल्न लागेको हो । नेपाल क्रिकेट संघले वेस्ट इण्डिजलाई क्रिकेट विकासमा लम्किरहेको नेपालजस्तो देशलाई सहयोग गरेकोमा धन्यवाद दिएको छ । उसले नेपाली क्रिकेट विकासमा यो सिरिज कोशेढुंगा हुने विश्वास लिएको छ ।