संसद्‌मा कालो वस्त्र र नीलो रिबनको चर्चा

काठमाडौं । विपक्षी दल राष्ट्रिय स्वतन्त्र पार्टी (रास्वपा) ले संसद्‌मा विरोध जारी राखेपछि सभामुख देवराज घिमिरेले सदनमा प्रधानमन्त्रीसँग प्रश्नोत्तरको कार्यक्रम कार्यसूचीबाट हटाउनुभएको छ । प्रश्नोत्तर कार्यक्रममा सहभागी हुन प्रधानमन्त्री केपी शर्मा ओली शुक्रबार साढे ११ बजे संसद् भवन पुग्नुभएको थियो । प्रतिनिधिसभाको बैठक सुरु भएपछि विगतमा जस्तै विपक्षी दलहरू रास्वपा र राष्ट्रिय प्रजातन्त्र पार्टी (राप्रपा) का सांसदहरूले उठेर विरोध जनाएका थिए । नीलो रिबन भिरेर आएका रास्वपा सांसदले उभिएर अवरोध गरेपछि सभामुख घिमिरेले पटक-पटक बैठक सुचारु गर्न आग्रह गर्नुभएको थियो । राप्रपा र रास्वपा सांसदको अवरोध कायम रहेपछि सभामुख घिमिरेले ‘विशेष कारणवश’ भन्दै प्रधानमन्त्रीसँगको प्रश्नोत्तर कार्यक्रम स्थगित भएको घोषणा गर्नुभएको हो । त्यसपछि प्रधानमन्त्री ओली संसद् भवनबाट बाहिरिनुभएको थियो । प्रत्येक महिनाको पहिलो साता संसद्मा प्रधानमन्त्रीसँग प्रश्नोत्तर कार्यक्रम राखिँदै आएको छ ।

संसद्‌मा बोल्न नपाएपछि प्रधानमन्त्रीको प्रतिप्रश्न : ‘मज्जा लाग्यो ?’
रास्वपाको विरोधका बीच प्रनिनिधिसभा बैठकमा प्रधानमन्त्री केपी शर्मा ओलीले शुक्रबार प्रतिनिधिसभामा बोल्न पाउनुभएन । बैठकमा प्रधानमन्त्रीले सांसदहरूको प्रश्नको जवाफ दिने कार्यक्रम भए पनि रास्वपाको विरोध कायमै रहेपछि सभामुख देवराज घिमिरेले विशेष कारण प्रश्नोत्तर कार्यक्रम कार्यसूचीबाट हटाएपछि प्रधानमन्त्रीले सम्बोधन गर्न नपाउनुभएको हो । प्रश्नोत्तरको कार्यक्रम कार्यसूचीबाट हटाइएपछि प्रधानमन्त्री ओली संसद्बाहिर निस्किनुभएको थियो । संसद् बैठकबाट प्रधानमन्त्री ओली बाहिरिने क्रममा सञ्चारकर्मीले संसद्मा तपाईंले नै बोल्न पाउनुभएन हैन ? भन्दै प्रश्न गरेका थिए । जवाफमा ओलीले सञ्चारकर्मीलाई उल्टै प्रश्न गर्दै भन्नुभयो, ‘मज्जा लाग्यो ?’

भिजिट भिसामा रास्वपासँग सम्झौता आवश्यक छैन : एमाले
नेकपा एमालेका प्रमुख सचेतक महेश बर्तौलाले भिजिट भिसा प्रकरणमा प्रमुख प्रतिपक्षीसँग सहमति भइसकेकाले अन्य दलसँग सहमति गर्नु आवश्यक नरहेको बताउनुभएको छ । शुक्रबार संसद् भवन नयाँ बानेश्वरमा प्रमुख सचेतक बर्तौलाले माओवादीसँग भएको सहमतिअनुसार भिजिट भिसा प्रकरणको छानविन अघि बढ्ने भन्दै दल र व्यक्ति पिच्छेसँग सरकारले सम्झौता गर्दै नहिँड्ने बताउनुभएको हो । उहाँले भिजिट भिसा प्रकरणमा माओवादीसँग भएको सहमतिबाटै समस्याको समाधान हुने दाबी गर्नुभयो । संसदीय प्रणालीमा मुख्य विपक्षी दल नै मुख्य हुने भएकाले माओवादीसँग भएको समझदारीबमोजिम नै सदन अघि बढिरहेको बर्तौलाको जिकिर छ । त्यस्तै, बर्तौलाले रास्वपाले उठाएका विषयलाई समाधान गर्न सरकारले नै प्रतिबद्धता जनाइसकेको अवस्थामा नीलो रिबन र कालो लुगा लगाएर रास्वपाका सांसदहरूले स्टण्ड गर्न खाजेको टिप्पणी गर्नुभयो । संसदीय पद्धतिलाई ग्रहण गर्न रास्वपा असफल देखिएको टिप्पणी गर्दै उहाँले रास्वपाका सांसदहरूको शैलीले स्वयं रास्वपालाई निल्ने तर्क गर्नुभयो ।

रास्वपाको विरोध शैलीप्रति प्रधानमन्त्रीको चासो
राष्ट्रिय स्वतन्त्र पार्टी (रास्वपा) ले कालो वस्त्र र नीलो रिबन लगाएको बारेमा प्रधानमन्त्री केपी शर्मा ओलीले चासो देखाउनुभएको छ । संसद् बैठक सुरु हुनलाग्दा रास्वपाका सांसदहरूले कालो वस्त्र र नीलो रिबन लगाएर संसद्मा उपस्थित भएको देखेपछि प्रधानमन्त्री ओलीले प्रश्न गर्नुभएको थियो । रास्वपा सांसद मनीष झाका अनुसार संसदीय दलका उपनेता विराजभक्त श्रेष्ठले प्रधानमन्त्री ओलीलाई मानव तस्करीको विरोधमा आफूहरूले कालो वस्त्र र नीलो रिबन लगाएको जानकारी गराउनुभएको थियो । उहाँले नीलो रिबन मानव तस्करीविरुद्धको विश्वव्यापी संकेत भएको बताउनुभएको थियो । वस्त्रबारे जानकारी गराइसकेपछि प्रधानमन्त्रीले शुभकामना दिनुभएको थियो ।

प्रधानमन्त्रीले देखाएको चासोबारे जानकारी दिँदै सांसद झाले भन्नुभयो, ‘यो नीलो रिबन मानव तस्करीविरुद्धको विश्वव्यापी संकेत हो । हामीले यो लगाएका छौँ । साथै कालो ड्रेस लगाएका छौँ । हामीले विगत २२ दिनदेखि विरोध गरिरहेका छौँ । विरोधको अर्को संकेत सबैले कालो वस्त्र पनि लगाएका छौँ । २२ दिनसम्म पनि आन्दोलन गर्दा देशको अभिभावक प्रधानमन्त्रीज्यूको यसबारेमा कुनै वक्तव्य आएको छैन । आज संसद्मै जम्काभेट भयो प्रधानमन्त्रीज्यूसँग । उहाँले किन यस्तो ड्रेस भनेर जिज्ञासा राख्नुभयो । हामीले मानव तस्करविरुद्धको विरोधमा छौँ भनेर जानकारी गरायौँ । उहाँले शुभकामना दिनुभयो ।’

हाम्रो विरोधलाई सरकारले प्रश्नबाट भाग्ने ढाल बनाइराखेको छ : गौतम
रास्वपाकी सांसद सोविता गौतम सरकारले आफूहरूको प्रतिरोधलाई संसद्को प्रश्नबाट भाग्ने ढाल बनाइराखेको टिप्पणी गर्नुभएको छ । मानव तस्करीविरुद्ध आवाज उठाउँदा सरकार गम्भीर नभएको आरोप लगाउँदै सांसद गौतमले भन्नुभयो, ‘हामी नेपाली नागरिकलाई बेचेर दासत्वमा धकेल्ने संरक्षित सञ्जाल भत्काउने संघर्षमा छौँ । तर, सरकार न गम्भीर देखिन्छ, न त जवाफदेही नै । उल्टो, सरकारले हाम्रो प्रतिरोधलाई संसद्को प्रश्नबाट भाग्ने ढाल बनाइराखेको छ ।’

अन्ततः रास्वपा-राप्रपा एकै कित्तामा
भिजिट भिसा प्रकरणलाई लिएर आन्दोलनरत राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा)ले एउटै शैली अपनाएको छ । बिहीबारसम्म राप्रपा र रास्वपाको विरोधको शैली फरक थियो । राप्रपाका सांसदहरूले सदनको काम कारबाही बहिष्कार गर्दै आएका थिए । रास्वपाका सांसदहरूले वेल घेराउ र नाराबाजी गर्दै आएका थिए । तर, शुक्रबार रास्वपाका सांसदहरूले समेत प्रतिनिधिसभाको काम कारबाही बहिष्कार गरेका छन् । योसँगै राप्रपा र रास्वपाको विरोधको शैली मिलेको हो । राप्रपाका प्रमुख सचेतक ज्ञानेन्द्र शाहीले भिजिट भिसा प्रकरण कुनै दल विशेषको मुद्दा नभएर सबै दलको साझा मुद्दा रहेको दाबी गर्दै भन्नुभयो, ‘यो भिजिट भिसा प्रकरण कुनै दल विशेषको मुद्दा होइन । यो हामी सम्पूर्णको साझा मुद्दा हो । २०६४ साल देखिको समस्या भएकाले सबै मिलेर समस्या समाधानमा अगाडि बढ्नुपर्छ । मानव बेचबिखनविरुद्ध हामी एकजुुट बनौँ । यो कुनै व्यक्तिको कुरा होइन । कुनै दलको मात्रै मुद्दा होइन ।’

भिजिट भिसा प्रकरणबारे कांग्रेस-माओवादीबीच छलफल
नेपाली कांग्रेस र नेकपा माओवादी केन्द्रका नेताहरूबीच भिजिट भिसा प्रकरणबारे छलफल भएको छ । कांग्रेस उपसभापति पूर्णबहादुर खड्का र गृहमन्त्री रमेश लेखक तथा माओवादी केन्द्रका उपमहासचिवहरू वर्षमान पुन र शक्ति बस्नेतबीच भिजिट भिसा प्रकरणबारे छानविन समिति बनाउने विषयमा छलफल भएको हो । छानविन समितिको मोडालिटी, टिओआर र समितिका सदस्यहरूबारे छलफल केन्द्रित भएको बताइएको छ । बैठकमा माओवादी नेताहरूले पूर्ववतः सहमतिअनुसार जतिसक्दो छिटो संसद् खोल्नुपर्ने बताएका थिए ।

सरकारले संसद्लाई हेपेको माओवादीको टिप्पणी
प्रमुख प्रतिपक्षी दल नेकपा माओवादी केन्द्रले सरकारले संसद्लाई हेपेको टिप्पणी गरेको छ । शुक्रबार प्रतिनिधिसभाको बैठक सुरु भएलगत्तै आकस्मिक समय लिएर बोल्दै माओवादी केन्द्रका प्रमुख सचेतक हितराज पाण्डेले सरकारले संसद्लाई हेपेको टिप्पणी गर्दै भन्नुभयो, ‘सरकारले यो सदनलाई यति हेपेको छ कि यसको बयान गरिसाध्य नै छैन । बारम्बार संसद्को कार्यसूची आउने र कार्यसूचीमा आएको विषय हटाउने भइरहेको छ । कार्यसूचीमा विषय राख्ने र हटाइनुको कारण के ? नियमावलीलाई हामीले पालना गर्नुपर्ने अनि सरकारले चाहिँ पालना गर्न नपर्ने ? यो कहाँसम्मको अन्याय हो ?’

सम्बन्धित मन्त्रीको अनुपस्थितिमै बजेट छलफल
प्रतिनिधिसभा बैठकमा सम्बन्धित मन्त्रीको अनुपस्थितिमै बजेटको मन्त्रालयगत छलफल भएको छ । सम्बन्धित मन्त्रीहरूको अनुपस्थितिमै बजेटको मन्त्रालयगत छलफल भएपछि सत्तारूढ दलकै सांसदले प्रश्न उठाएका छन् । सत्तारूढ दल नेपाली कांग्रेसका सांसद रामहरि खतिवडाले नै सदनमा मन्त्री अनुपस्थित भएको भनेर प्रश्न उठाउनुभएको हो । सभामुख देवराज घिमिरेले आफ्नो ध्यानाकर्षण भएको बताउनुभएको थियो । सांसद खतिवडाले संस्कृतिमन्त्री र युवा तथा खेलकुदमन्त्री अनुपस्थित रहेको भनेर प्रश्न उठाउनुभएको हो । त्यसपछि बजेटमाथि बोल्न रोष्ट्रम पुग्नुभएका अर्का सांसद अमरेशकुमार सिंहले महिला बालबालिकामन्त्री पनि अनुपस्थित रहेको जानकारी गराउनुभएको थियो । सभामुख घिमिरेले त्यसप्रति ध्यानाकर्षण भएको भनेर बस्न आग्रह गर्दा कांग्रेस सांसद खतिवडाले ‘मन्त्रीको उपस्थिति छैन के बस्नु ?’ भनेर जवाफ दिनुभएको थियो ।