बर्मिङ्घम टेस्टमा कीर्तिमानै कीर्तिमान

बर्मिङ्घम । बर्मिङ्घममा जारी टेस्टमा भारत र इंग्ल्याण्डबीचको खेलमा केही नयाँ कीर्तिमान बनेका छन् । जारी खेलमा इंल्याण्डका कप्तान बेन स्टोक्स आफ्नो टेस्ट करियरमा पहिलोपटक पहिलो बल (गोल्डेन डक) मा आउट हुनुभयो । जेमी स्मिथले केवल ८० बलमा शतक बनाउनुभयो भने उहाँले नै हृयारी ब्रुकसँग छैटौं विकेटका लागि ३०३ रनको साझेदारी पनि गर्नुभयो । भारतका मोहम्मद सिराजले २ बलमा २ विकेट लिनुभयो ।

इंग्ल्याण्डका कप्तान बेन स्टोक्स पहिलो बलमै क्याच आउट हुनुभएको थियो । स्टोक्स आफ्नो ११३ टेस्ट करियरमा १६औँ पटक शून्यमा आउट हुनुभयो तर पहिलोपटक कुनै बलरले उहाँलाई पहिलो बलमा नै प्याभिलियन पठाएको हो । गोल्डेन डक बिना टेस्ट क्रिकेटमा सबैभन्दा धेरै इनिङ खेल्ने रेकर्ड भारतका राहुल द्रविडको नाममा छ । उहाँ २८६ इनिङपछि गोल्डेन डक हुनुभएको थियो ।

इंग्ल्याण्डका विकेटकिपर ब्याट्सम्यान जेमी स्मिथले केवल ८० बलमा शतक बनाउनुभयो । यो इंग्ल्याण्डबाट चौथो सबैभन्दा छिटो टेस्ट शतक थियो । सबैभन्दा छिटो शतकको रेकर्ड गिल्बर्ट जेसपको नाममा छ, जसले १९०२ मा अस्ट्रेलियाविरुद्ध ७६ बलमा शतक बनाउनुभएको थियो । इंग्ल्याण्डका हृयारी ब्रुकले पनि शतक बनाउनुभयो, उहाँले १५८ रनको इनिङ खेल्नुभयो । यो इनिङसँगै उहाँले २५०० टेस्ट रन पनि पूरा गर्नुभयो ।

जेमी स्मिथ १८४ रन बनाएर अविजित रहनुभयो । यो टेस्टमा इंग्ल्याण्डमा कुनै पनि विकेटकिपर ब्याट्सम्यानद्वारा उच्चतम स्कोर हो । उहाँले एलिस स्टीवर्टको २८ वर्ष पुरानो रेकर्ड तोड्नुभयो, जसले १९९७ मा न्युजिल्याण्डविरुद्ध १७३ रन बनाउनुभएको थियो ।

जेमी स्मिथ र हृयारी ब्रुकले छैटौं विकेटका लागि ३०३ रनको साझेदारी गर्नुभयो । यो भारतविरुद्ध इंग्ल्याण्डको कुनै पनि विकेटका लागि तेस्रो उच्चतम साझेदारी थियो । यो भारतविरुद्ध इंग्ल्याण्डको छैटौं विकेटका लागि उच्चतम साझेदारी थियो । ११ वर्षपछि भारतविरुद्ध टेस्टमा कुनै पनि विकेटका लागि ३०० भन्दा बढी रनको साझेदारी भएको हो । पछिल्लोपटक २०१४ मा न्युजिल्याण्डका ब्रेन्डन म्याकुलम र बीजे वाटलिंगले छैटौं विकेटका लागि ३५२ रन जोड्नुभएको थियो । भारतविरुद्धको टेस्टमा ३०० रनको साझेदारी भएको यो १२औँ पटक थियो ।

इंग्ल्याण्डका हृयारी ब्रुक र जेमी स्मिथबाहेक ज्याक क्राउली, जो रुट र क्रिस बोक्सले मात्र इनिङ्समा आफ्नो खाता खोल्न सक्नुभयो । बाँकी ६ ब्याट्सम्यानले १ रन पनि बनाउन सकेनन् । इंग्ल्याण्डको इनिङ्समा पहिलोपटक ६ ब्याट्सम्यानले आफ्नो खाता खोल्न सकेनन् । यसअघि पाँच–पाँच ब्याट्सम्यानले चारपटक आफ्नो खाता खोल्न सकेका थिएनन् ।

इंग्ल्याण्डका लागि नम्बर ७ मा ब्याटिङ गर्न आउनुभएका जेमी स्मिथले १८४ रनको अविजित इनिङ्स खेल्नुभयो । यो नम्बर ७ वा सोभन्दा तल ब्याटिङ गर्दा भारतविरुद्धको उच्चतम स्कोर हो । भारतका प्रसिद्ध कृष्णले जेमी स्मिथविरुद्ध एक ओभरमा २३ रन दिनुभयो । जुन पछिल्लो १४८ वर्षमा भएको छैन । प्रसिद्ध कृष्णले पहिलो इनिङमा १३ ओभर बलिङ गर्नुभयो जसमा उहाँले ५.५० को इकोनोमी रेटमा बलिङ गर्नुभयो । यो प्रदर्शनपछि उहाँ टेस्ट क्रिकेट इतिहासमा सबैभन्दा खराब इकोनोमी रेट भएका बलर बन्नुभएको छ । टेस्टको १४८ वर्षको इतिहासमा कम्तीमा ५०० बल बलिङ गर्ने बलरहरूबारे कुरा गर्दा प्रसिद्ध कृष्ण तिनीहरूमध्ये सबैभन्दा महँगा बलर बन्नुभएको छ । टेस्ट क्रिकेटमा प्रसिद्ध कृष्णको इकोनोमी रेट प्रतिओभर ५ रनभन्दा बढी पुगेको छ, जुन कुनै पनि बलरको सबैभन्दा खराब प्रदर्शन हो । एजेन्सी ।