विश्वप्रसिद्ध रेसलिङ लिजेन्ड होगनको ७१ वर्षको उमेरमा निधन

एजेन्सी । विश्वप्रसिद्ध रेसलिङ लिजेन्ड हल्क होगनको ७१ वर्षको उमेरमा निधन भएको छ । उहाँको निधन भएसँगै एक महान् रेसलिङ लिजेन्डलाइ गुमाएको भन्दै उहाँका समर्थकले समवेदान व्यक्त गरिरहेका छन् । होगनको हृदयघातका कारण निधन भएको जनाइएको छ ।

टिएमजेडका अनुसार हल्क होगनको फ्लोरिडाको क्लियरवाटरस्थित घरमा हृदयघात भएको जानकारी आएको र लगतै आपत्कालीन कल गरिएको थियो र स्वास्थ्यकर्मी घटनास्थलमा पठाइएका थिए । उहाँलाई स्ट्रेचरमा राखेर एम्बुलेन्समार्फत अस्पताल लगिएको थियो ।

डब्लु डब्लुइले सामाजिक सञ्जाल ‘एक्स’मार्फत उहाँको निधन भएको जनाकारी दिएको थियो । होगनको वास्तविक नाम भने टेरी बोलिया हो । १९८० र ९० को दशकमा प्रोफेसनल रेसलिङमा उहाँले विश्वभर आफ्नो ठूलो नाम बनाउनुभएको थियो भने उहाँका हजारौं समर्थकहरू रहेका थिए । सन् १९७७ मा डेब्यु गर्नुभएका उहाँले त्यसयता रेस्लिङ उद्योगको परिभाषात्मक पात्रका रूपमा स्थापित हुनुभएको थियो ।

होगनले आफ्नो ५० वर्ष उमेर नाघेपछि पनि रेस्लिङ खेल्ने गर्नुभएको थियो । सन् २०१८ मा उहाँलाई डब्लुडब्लुइले होल अफ फेममा पुनःस्थापित गरेको थियो । यसअघि उहाँलाई जातीय गालीको प्रयोग गरेको कारण सो सूचीबाट हटाइएको थियो ।
यही वर्षको मे महिनामा उहाँको घाँटीको शल्यक्रिया भएको थियो र त्यसपछि हालै अमेरिकी साप्ताहिक पत्रिका युएस विक्लीले उहाँलाई ‘एकदम गम्भीर’ मुटुको शल्यक्रिया गरिएको जानकारी दिएको थियो ।

१९५३ मा जर्जिया राज्यको अगस्टा शहरमा जन्मिनुभएका होगनले १९८० को दशकमा आफ्नो अल अमेरिकन ‘हुल्कामानिया’को छविमार्फत प्रसिद्धि कमाउनुभएको थियो । त्यसबेलाको डब्लुडब्लुएफ (हालको डब्लुडब्लुइ)लाई राष्ट्रियस्तरको शक्तिशाली संस्था बनाउन उहाँले महŒवपूर्ण भूमिका खेल्नुभएको थियो । उहाँ एक वर्षअघिसम्म रेस्लिङमा सक्रिय हुनुहुन्थ्यो । गत वर्षको जुलाई महिनामा उहाँले रिपब्लिकन पार्टीको सम्मेलनमा डोनाल्ड ट्रम्पलाई समर्थन गर्दै भाषण गर्नुभएको थियो । उहाँ आफ्नो रातो-पहेंलो पहिरन, ‘रियल अमेरिकन’ इन्ट्री गीत र ‘हल्कामेनियाक’ फ्यानहरूको विशाल समर्थनका कारण लोकप्रिय हुनुहुन्थ्यो ।

हल्क होगन कुस्तीको इतिहासमा मात्र होइन, विश्व पप-संस्कृति र मनोरञ्जन उद्योगमा पनि गहिरो प्रभाव पार्ने हस्तीका रुपमा रहनुभएको थियो । हल्क होगनको निधनले विश्व रेस्लिङलाई गहिरो शोकमा पारेको छ ।

सबैभन्दा आत्मीय मित्र गुमाएँ : डोनाल्ड ट्रम्प
अमेरिकी राष्ट्रपति डोनाल्ड ट्रम्पले चर्चित रेस्लर हल्क होगनप्रति श्रद्धाञ्जलि अर्पण गर्दै आफूले सबैभन्दा आत्मिक मित्र गुमाएको बताउनुभएको छ । ‘उहाँ मेरो आत्मिक मित्र हुनुहुन्थ्यो । उहाँको शरीरमात्र होइन, मुटु पनि विशाल थियो । उहाँ सधैं हाम्रो हृदयमा जीवित रहनुहुनेछ,’ अमेरिकी राष्ट्रपति ट्रम्पले भन्नुभएको छ ।

केही समयअघि हल्ककी पत्नीले उहाँको स्वास्थ्य अवस्था सामान्य रहेको बताउनुभएको थियो । ‘हाल्क होगनको मुटु बलियो छ र शल्यक्रियापछि उहाँको स्वास्थ्यमा सुधार आइरहेको छ,’ केही समयअघि उहाँकी पत्नीले भन्नुभएको थियो । त्यसको केही दिनपछि नै हल्क होगनको निधन भएको हो ।

हल्क होगन केवल रेस्लर हुनुहुन्थेन । उहाँ यो खेललाई माया गर्ने विश्वभरका करोडौं समर्थकका लागि आदर्श पनि हुनुहुन्थ्यो । रेसलमेनिया ३ मा आन्द्रे द जायन्टविरुद्ध उहाँको खेललाई ऐतिहासिक मानिन्छ । त्यो खेल ९३ हजारभन्दा बढी दर्शकले प्रत्यक्ष रूपमा अवलोकन गरेका थिए । होगनले सन् १९८४ मा म्याडिसन स्क्वायर गार्डनमा आयरन शेखलाई हराएर डब्लुडब्लुएफ च्याम्पियनसिप चुम्नुभएको थियो ।