दशरथ रंगशालामा फुटबल फर्किंदा नेपाली टोली उत्साहित

काठमाडौं । करिब दुई वर्षपछि दशरथ रंगशालामा सिनियर राष्ट्रिय पुरुष फुटबल टोली अन्तर्राष्ट्रिय मञ्चमा फर्किन लागेको छ । त्रिपुरेश्वरस्थित दशरथ रंगशालामा नेपालले आगामी सेप्टेम्बर ६ र ९ तारिखमा बंगलादेशसँग दुई मैत्रीपूर्ण खेल खेल्नेछ । नेपालको सिनियर पुरुष टोलीले रंगशालामा २०८० साल मंसिर १ पछि पहिलोपटक अन्तर्राष्ट्रिय फुटबल खेल्न लागेको हो ।
गत केही वर्ष रंगशाला असुरक्षित भएको भन्दै यहाँ कुनै फिफाका आधिकारिक प्रतियोगिता सञ्चालन गर्न अनुमति पाएको थिएन । यसकारण नेपाली समर्थकले लामो समयदेखि घरेलु मैदानमा राष्ट्रिय पुरुष टोलीको खेल हेर्न पाएका थिएनन् । अब लामो समयपछि समर्थकहरूले फेरि दशरथ रंगशालामा फुटबलको रंग झल्काउने अवसर पाउँदैछन् ।

नेपाली टोलीका खेलाडीहरू पनि घरेलु समर्थकका माझ मैदानमा फर्किन पाउँदा उत्साहित छन् । टोलीका स्टार खेलाडी अञ्जन विष्टले फिट नहुँदा केही समय खेल्न नपाएको तर अहिले लामो समयपछि दशरथ रंगशालामा मैदानमा उत्रन पाउँदा धेरै उत्साहित रहेको बताउनुभयो । उहाँले गोल गर्न लामो समय भइसकेको बताउँदै यो मैत्रीपूर्ण खेल आफ्नो उत्कृष्ट प्रदर्शन देखाउन सही समय रहेको उल्लेख गर्नुभयो ।

अञ्जनले नेपालमा नियमित फुटबल नहुनु फुटबलर र राष्ट्रिय टोलीका लागि समस्या भएको गुनासो पनि गर्नुभयो । यसकारणले गर्दा खेलाडीहरू पलायन भइरहेका छन् । उहाँले प्रशिक्षक म्याट रसको मिहिनेतलाई उच्च मूल्य दिएको र नयाँ खेलाडीहरूले पनि राम्रो प्रदर्शन गरेको स्मरण गर्नुभयो । टोलीमा हालै बिदाइ भएका विराज महर्जन र अर्का फुटबलर भरत खवासको अन्तिम अन्तर्राष्ट्रिय खेललाई सम्झँदै अञ्जनले स्मरणीय बनाउने उद्देश्य रहेको बताउनुभयो ।

बंगलादेशको टोली आज (बुधबार) नेपाल आउने तयारीमा छ । टोलीमा इंग्लिस फुटबलका स्टार हेम्जा चौधरीको समेत उपस्थितिको चर्चा छ, जसको प्रतीक्षामा नेपाली समर्थक उत्साहित छन् । नेपाली टोलीमा पहिलोपटक स्थान बनाउनुभएका आदित्य शाक्यले पनि दशरथ रंगशालामा फुटबल खेल्ने अवसर पाउँदा धेरै खुसी लागेको बताउनुभयो । उहाँ समर्थकको आशाअनुरूप उत्कृष्ट प्रदर्शन गर्ने बताउनुहुन्छ । आफ्ना बुबा र काकाले फुटबल खेलेको वातावरणमा हुर्केको आदित्यले राष्ट्रिय टोलीमा आउँदा परिवार पनि खुसी भएको स्मरण गर्नुभयो ।

ADVERTISEMENT

यस मैत्रीपूर्ण खेलका लागि एन्फाले गोलकिपर किरण चेम्जोङको कप्तानीमा २३ सदस्यीय टोली घोषणा गरेको छ । टोलीमा समिर तामाङ पुनः सहभागी हुनुभएको छ । उहाँले गत मार्चमा फिफा विश्वकप छनोटमा बहराइनविरुद्ध डेब्यु गर्नुभएको थियो र त्यसयता टोलीबाट बाहिर हुनुहुन्थ्यो ।

नेपाली टोलीका अन्य सदस्यहरूमा रोहित चन्द, अनन्त तामाङ, अभिषेक लिम्बू, अञ्जन विष्ट, जिलेस्पीजंग कार्की, आदित्य शाक्य, अमित लामा, एरिक विष्ट, दीप कार्की, दिनेश हेन्जन, कुशल देउवा, लाकेन लिम्बू, मणिकुमार लामा, मनिष डाँगी, रणदीप पौडेल, रोहन कार्की, सिर्जनराज गौतम, सुवास ठकुरी, सुमन श्रेष्ठ, टिकेन्द्र थापा र योगेश गुरुङ रहनुभएको छ ।
दुवै मैत्रीपूर्ण खेल फ्लडलाइटमा हुनेछन् । टिकटिङ अधिकार एन्फाकै स्वामित्वमा हुनेछ । अनलाइन बिक्रीका लागि टेण्डर खुलाउने व्यवस्था पनि एन्फाले गरेको छ । टिकट दरमा भिआइपी क्षेत्रका लागि एक हजार र सामान्य पारापिट क्षेत्रमा पाँच सय रुपैयाँ निर्धारण गरिएको छ ।

लामो समयपछि दशरथ रंगशालामा फुटबल फर्किँदै गर्दा नेपाली टोली र समर्थक दुवै उत्साहित देखिएका छन् । यो खेलले नेपाली फुटबलको उत्साह र प्रेमलाई पुनः जीवन्त बनाउने अपेक्षा गरिएको छ ।