रास्वपा र विवेकशील साझाबीच एकता

काठमाडौं । राष्ट्रिय स्वतन्त्र पार्टी (रास्वपा) र विवेकशील साझा पार्टीबीच पाँच बुँदे सहमति पत्रमा हस्ताक्षर भएको छ । सहमति पत्रमा रास्वपाका तर्फबाट कार्यवाहक सभापति डोलप्रसाद अर्याल र उपसभापति स्वर्णिम वाग्ले तथा विवेकशील साझाकी अध्यक्ष समीक्षा बास्कोटा र उपाध्यक्ष प्रकाशचन्द्र परियारबीच हस्ताक्षर भएको हो । आइतबार राष्ट्रियसभा गृहमा कार्यक्रम गरेर पार्टी एकता पत्रमा हस्ताक्षर र घोषणासमेत भएको हो ।

हस्ताक्षर पत्रमा ‘रास्वपाको राजनीतिक सिद्धान्त र नेतृत्व निःसर्त स्वीकार्दै निष्ठा र मूल्य-मान्यतामा आधारित वैकल्पिक राजनीतिको प्रवद्र्धनमा स्व. उज्ज्वल थापा एवं ‘विवेकशील अभियान’को योगदानलाई दस्तावेजीकरण गरी मान्यता दिने’ कुरा उल्लेख छ । साथै रास्वपाको राष्ट्रिय महाधिवेशनसम्मका लागि बनाइएको विशेष संयन्त्र ‘संघीय नेतृत्व मञ्च’मा विवेकशील साझा पार्टीबाट एकीकरणको प्रक्रियाबाट आउने नेताहरूलाई आपसी समझदारीमा मनोनयन गर्ने सहमति छ । मञ्चका सदस्यको वरीयता केन्द्रीय समितिको सदस्यसरह हुने सहमति भएको छ ।

विवेकशील साझा पार्टीका सदस्य र सल्लाहकारलाई केन्द्रीय, प्रादेशिक र स्थानीय तहगत संरचनामा समुचित समायोजन गरी जिम्मेवारी तोक्दा योग्यता, समावेशिताको सिद्धान्त र सार्वजनिक छविलाई आधार मान्ने सहमति भएको हो । एकीकरणपश्चात् दलको नाम ‘राष्ट्रिय स्वतन्त्र पार्टी’, दलको झण्डा साबिककै नीलो पृष्ठभूमिको मध्यभागमा सेतो रातो रङको गोलाकार बीचमा नीलो रङको घण्टीको आकृति र दलको चिह्न ‘घण्टी’ रहने सहमति छ ।

एकीकरणसम्बन्धी निर्वाचन आयोग सम्बद्ध कानुनी प्रक्रिया पूरा गर्न राष्ट्रिय स्वतन्त्र पार्टी र विवेकशील साझा पार्टीबाट आवश्यक दस्तावेज तयार गर्दै पार्टीका नाममा रहेका चल-अचल सम्पत्तिको व्यवस्थापन आपसी समझदारीमा शीघ्र सम्पन्न गर्ने सहमति भएको हो । राष्ट्रिय स्वतन्त्र पार्टीको सिद्धान्त, नेतृत्व र चुनाव चिह्न ‘घण्टी’ मा गोलबद्ध भई लोकतान्त्रिक सुशासन र समुन्नतिका मुद्दा अघि बढाउन अन्य सबै सुसंस्कृत एवं परिवर्तनकामी वैकल्पिक राजनीतिक शक्ति, समूह र व्यक्तिलाई आह्वान गर्ने पनि सहमति भएको छ ।

रास्वपाले गत १२ मंसिरमा भर्चुअल बैठकमार्फत विवेकशील–साझासँगको एकीकरण प्रस्ताव अनुमोदन गर्दै ‘संघीय नेतृत्व मञ्च’ नामको नयाँ संरचना बनाउने निर्णय गरेको थियो । रास्वपामा आउने वैकल्पिक धारका नेताहरूलाई समेट्न यो मञ्च अस्थायी रूपमा आगामी महाधिवेशनसम्म मात्रै रहनेछ । रास्वपामा विधानअनुसार १२१ केन्द्रीय सदस्य रहने व्यवस्था भए पनि अहिले ५८ मात्र रहेका छन् । महाधिवेशनअघि नयाँ केन्द्रीय सदस्य थप्न उचित नठानेर संघीय नेतृत्व मञ्च बनाइएको प्रवक्ता मनीष झाले बताउनुभयो । यो मञ्चमा विवेकशील-साझाबाट आउने नेतासहित पार्टीभित्रैका योग्य नयाँ फेसहरू समेटिनेछन् । मञ्चका सदस्यलाई केन्द्रीय सदस्यकै बराबर राजनीतिक हैसियत हुनेछ ।

विवेकशील-साझाका प्रमुख नेताहरू- अध्यक्ष समीक्षा बास्कोटा र महासचिव रञ्जु दर्शनालाई मञ्चमा राख्ने तयारी गरिएको छ । अन्य नाम भने टुंगो लाग्न बाँकी छ । करिब ५१ सदस्य रहने यो समितिमा रास्वपाका हालका केन्द्रीय सदस्य सहभागी हुने छैनन् । संयोजक भने पार्टी पदाधिकारीमध्येबाट एक जनालाई दिइनेछ । विवेकशीलले कुनै ‘भाग’ मागेको छैन । निःसर्त एकता भएकाले अहिले नै जिम्मेवारी बाँडफाँडबारे सहमति गर्नेछैन भन्ने रास्वपा पक्षको भनाइ छ । साथै विवेकशीलका नेताहरूलाई तत्काल केन्द्रीय सदस्यमा मनोनयन पनि गरिने छैन ।

मलाई कुनै पद चाहिँदैन, वैकल्पिक अभियान मर्न दिँदैनौँ : बास्कोटा
विवेकशील साझा पार्टीकी अध्यक्ष समीक्षा बास्कोटाले राष्ट्रिय स्वतन्त्र पार्टी (रास्वपा) मा आफूहरूको समाहित कुनै व्यक्तिगत स्वार्थका लागि नभएको स्पष्ट गर्दै आफूलाई कुनै पद-प्रतिष्ठा नचाहिने बताउनुभएको छ । आइतबार काठमाडौंमा आयोजित एकता घोषणा सभामा बोल्दै उहाँले दिवंगत युवा नेता उज्ज्वल थापाले सुरु गरेको वैकल्पिक राजनीतिलाई जोगाउन र अघि बढाउन आफूहरू रास्वपासँग एकताबद्ध भएको बताउनुभयो । बास्कोटाले भन्नुभयो, ‘धेरैले सोध्नुहुन्छ-रास्वपा जस्तो राष्ट्रिय पार्टीमा किन समाहित हुनुभयो ? के तपाईं उम्मेदवार बन्न चाहनुहुन्छ ? हामीले भनेका छौँ- हामीलाई केही चाहिएको छैन । पुरानो राजनीति जस्तै सुरक्षित हुने राजनीति गर्न आएका होइनौँ । उज्ज्वल थापाले रोपेको बीउ फक्रिनुपर्छ, संसद्मा गर्जिनुपर्छ । यही हाम्रो तपस्या हो ।’

रास्वपामा बिलाउन होइन, मिलाउन गएका हौँ : दर्शना
विवेकशील साझा पार्टीले बिलाउनलाई नभएर मिलाउनलाई राष्ट्रिय स्वतन्त्र पार्टी (रास्वपा)सँग एकता गरेको रञ्जु दर्शनाले बताउनुभएको छ । दुवै पार्टीको एकता घोषणा सभालाई सम्बोधन गर्दै दर्शनाले टुटफुटबाट सचेत भएर रास्वपासँग एकता गरिएको बताउनभुएको हो । ‘सबैले रास्वपामा बिलायौँ भनिरहेका छन् । हामी बिलाउन होइन, मिलाउन गएका हौँ’, उहाँले भन्नुभयो । वैकल्पिक शक्तिलाई सत्तामा ल्याउन टुटेर होइन, जुटेर लाग्नुपर्ने उहाँको भनाइ छ । अहिलेसम्म भएको टुटफुटबाट पाठ सिकेको बताउँदै उहाँले भन्नुभयो, ‘टुटेर होइन, जुटेर काम गर्नुपर्दो रहेछ ।’ अब आउने निर्वाचनबाट रास्वपालाई बहुमत दिलाउनुपर्ने उहाँको भनाइ छ । त्यसका लागि सबैलाई एकजुट भएर लाग्न आग्रह गर्दै दर्शनाले भन्नुभयो, ‘अब आउने निर्वाचनबाट यो पार्टीले बहुमत ल्याउनैपर्छ, वैकल्पिक शक्तिले बहुमत ल्याउनैपर्छ ।’

रवि लामिछाने र परिवर्तन पक्षधरलाई नजरअन्दाज नगर्नू : अर्याल
राष्ट्रिय स्वतन्त्र पार्टी (रास्वपा) का कार्यवाहक सभापति डोलप्रसाद अर्यालले रवि लामिछानेसहित परिवर्तन चाहने शक्तिहरूलाई नजरअन्दाज नगर्न सरकारलाई चेतावनी दिनुभएको छ । आइतबार काठमाडौंमा आयोजित एकता घोषणा सभालाई सम्बोधन गर्दै उहाँले सरकारलाई तोकिएको मितिमा निर्वाचन सम्पन्न गर्न आवश्यक वातावरण निर्माणमा ध्यान दिन आग्रह गर्नुभयो । अर्यालले रास्वपाले चुनाव गराउन सरकारलाई पूर्ण सहयोग गरिरहेको तर सरकारले त्यसअनुसारको व्यवहार गर्न नसकेको आरोप लगाउनुभयो । ‘हामीले यो सरकारलाई चुनाव सम्पन्न गराउन आवश्यक टेको दिइरहेका छौँ’, उहाँले भन्नुभयो, ‘तर सरकारले रवि लामिछाने वा रास्वपा, अथवा परिवर्तनका पक्षधरप्रति उपेक्षा ग¥यो भने पार्टी अझै बलियो भएर उदाउनेछ । हामीलाई सडकमा जान बाध्य नपारियोस् ।’ उहाँले स्वच्छ, निष्पक्ष र भयरहित वातावरणमा निर्वाचन सम्पन्न गर्न सबै राजनीतिक दललाई योगदान पुर्‍याउन पनि आह्वान गर्नुभयो । विवेकशील पार्टीसँगको एकतापछि रास्वपा झनै सुदृढ बनेको उल्लेख गर्दै अर्यालले पार्टीलाई ठूलो राजनीतिक शक्ति बन्नबाट अब कसैले रोक्न नसक्ने दाबी गर्नुभयो ।

मिलन पाण्डे एकतामा नजाने
विवेकशील साझाका नेता मिलन पाण्डे रास्वपासँग एकतामा नजाने हुनुभएको छ । उहाँले विवेकशील साझा र रास्वपाको एकीकरणमा जुटेकाहरूलाई शुभकामना दिनुभएको छ । ‘यो एकीकरणमा सामेल छैन’, उहाँले समाजिक सञ्जाल फेसबुकमा लेख्नुभएको छ, ‘अब केही समय (केही दिन वा केही महिना) ‘कुलिङ पिरियड’ लिन्छु । त्यसपछि नयाँ तरिकाले राजनीतिक यात्रा सुरु गर्नेछु । उहाँले अबदेखि आफू र विवेकशील पनि ‘स्वतन्त्र’ भएको उल्लेख गर्नुभएको छ ।