कर्णालीको ‘प्लेअफ’ दौड समाप्त, पोखराको सम्भावना जिवितै

काठमाडौं । कर्णाली याक्स सिद्धार्थ बैंक नेपाल प्रिमियर लिग (एनपिएल) दोस्रो संस्करणको ‘प्लेअफ’ दौडबाट बाहिरिने पहिलो टोली बनेको छ । मंगलबार पोखरा एभेन्जर्ससँग ३४ रनको हारसाथै कर्णालीको अन्तिम खेल बाँकी छँदै ‘प्लेअफ’ सम्भावना समाप्त भएको हो । कीर्तिपुरस्थित त्रिवि क्रिकेट मैदानमा मंगलबार पोखराले प्रस्तुत गरेको २०२ रनको बिशाल लक्ष्य पछ्याउने क्रममा कर्णाली १९ ओभरमै सबै विकेट गुमाई १६७ रनमा समेटियो ।

कर्णालीका ओपनर मार्क वाटले ३४ बलमा चार चौका र पाँच छक्कासहित ५९ रनको अर्धशतक प्रहार गरे पनि टोलीलाई जित दिलाउन सक्नुभएन । नजिबुल्लाह जद्रानले २४, पवन सर्राफले १९, प्रियांक पन्चालले १६ तथा कप्तान सोमपाल कामीले १३ रन जोड्नुभयो । पोखराका ऋषि धवन र धनञ्जय लक्षणले समान तीन-तीन विकेट लिनुभयो । किरण ठगुन्ना, सन्दीप क्षेत्री र कप्तान कुशल भुर्तेलको खातामा एक-एक विकेट रह्यो ।

यसअघि, टस जितेर पहिले ब्याटिङ गरेका पोखराले निर्धारित २० ओभरमा दुई विकेटको क्षतिमा २०१ रन जोडेको थियो । यस सिजनमा बनेको यो दोस्रो सबैभन्दा ठूलो योगफल हो । विराटनगर किंग्सले पोखराविरुद्ध नै बनाएको २२० रन यस सिजनको सबैभन्दा ठूलो स्कोर हो । पोखराका ओपनर रोसिङ्टनले अविजित १०८ रनको शतकीय इनिङ खेल्नुभयो । ५८ बलमा ११ चौका र सात छक्का प्रहार गर्नुभएका उहाँ एनपिएल दोस्रो संस्करणमा शतक बनाउने दोस्रो खेलाडी बन्नुभएको छ । यसअघि कर्णालीका मार्क वाटले लुम्बिनीविरुद्ध ११४ रनको शतक बनाउनुभएको थियो ।

३४–१ को अवस्थामा रोसिङ्टनले जासन रोयसँग दोस्रो विकेटका लागि १२७ रनको साझेदारी गर्दै टोलीलाई विशाल योगफलतर्फ डोर्‍याउनुभएको थियो । पोखराबाट पहिलो खेल खेलिरहनुभएका रोयले ४६ रन बनाउनुभयो । धनञ्जय लक्षण २३ रनमा अविजित रहनुभयो भने कप्तान भुर्तेलले १८ रन जोड्नुभयो ।

कर्णालीका नन्दन यादव र मार्क वाटले एक–एक विकेट लिनुभयो । पाँचौँ खेल खेलेको पोखराको यो दोस्रो जित हो । कर्णालीले छैटौँ खेलबाट पाँच हार बेहोर्दै प्रतियोगिताबाट बाहिरिएको छ ।

जनकपुरको पहिलो जित, चितवनको प्लेअफ समीकरण जटिल
यसअघि मंगलबार सम्पन्न पहिलो खेलमा साबिक विजेता जनकपुर बोल्ट्सले पहिलो जित हात पारेको छ । जनकपुरले १७.३ ओभरमै चितवन राइनोजलाई ६ विकेटले पराजित गर्दै पहिलो खाता खोलेको हो । लगातार चार खेलमा पराजित हुँदै दबाबमा रहेको जनकपुरका लागि यो जित प्लेअफ सम्भावना जोगाइराख्ने महत्वपूर्ण परिणाम बनेको छ । अब जनकपुरले लिग चरणमा लुम्बिनी लायन्स र कर्णाली याक्ससँग प्रतिस्पर्धा गर्न बाँकी छ । प्लेअफमा पुग्न जनकपुरले दुवै खेल जित्नुका साथै अन्य टिमको नतिजामा पनि भर पर्नुपर्नेछ ।

१७७ रनको लक्ष्य पाएको जनकपुरको जितका लागि ओपनर ब्याट्सम्यान माज सदाकत र तेस्रो नम्बरमा क्रिज सम्हाल्न आउनुभएका अनिल साहले उत्कृष्ट अर्धशतकीय योगदान गर्नुभयो । माज सदाकतले टोलीका लागि ६३ रनको योगदान गर्नुभयो । उहाँले केवल ३० बलमा चार छक्का र ६ चौका पनि प्रहार गर्नुभयो । जनकपुरले ४५ रनको कुल स्कोरमा पहिलो विकेट गुमाएको थियो । ओपनर आसिफ शेख १८ बलमा तीन चौकाको मद्दतले १८ रन बनाउँदै आउट हुनुभएको थियो । त्यसपछि माज सदाकत र अनिल साहले टोलीको स्कोरलाई १२४ रनको स्थितिसम्म पु¥याउनुभएको थियो ।

अनिल साहले टोलीको जितमा ६१ रनको योगदान गर्नुभयो । लामो समय क्रिजमा संघर्ष गर्नुभएका उहाँले केवल ३६ बलमा तीन छक्का र चार चौका हिर्काउनुभयो । जन निकोल लफ्टी-एटनले नौ बलमा एक छक्काको मद्दतले नौ रन बनाउनुभयो । सञ्जय कृष्णमुर्थीले अविजित पाँच र आदित्य महताले अविजित १८ रन बनाउनुभयो । जनकपुर बोल्ट्सले अतिरिक्तरूपमा केवल चार रन पायो । चितवन राइनोजका बलरहरू खासै प्रभावकारी देखिएनन् । सोहल तनवीर, कमलसिंह ऐरी र अमर रौतेलाले एक/एक विकेट लिनुभयो । जनकपुर बोल्ट्स र चितवन राइनोजबीचको खेलमा कुल चारवटा अर्धशतक बन्यो ।

त्यसअघि, चितवन राइनोजका लागि ओपनर ब्याट्सम्यानद्वय डेभिड मलान र अर्जुन साउदले कीर्तिमानी साझेदारी गर्नुभएको थियो । मलान र अर्जुन दुवैले उत्कृष्ट अर्धशतकीय पाली खेल्नुभयो । डेभिड मलानले टोलीका लागि ८० रनको योगदान गर्नुभयो । लामो समय क्रिजमा टिक्नुभएका उहाँले केवल ५४ बलमा पाँच छक्का र चार चौका प्रहार गर्नुभएको थियो । १९औँ ओभरको दोस्रो बलमा उहाँ आउट हुँदा चितवनले १५६ रन बनाइसकेको थियो ।

डेभिड मलान र अर्जुन साउदले ओपनिङ विकेटका लागि ११२ रनको साझेदारी गर्नुभयो । ५२ रन बनाउँदै अर्जुन आउट भएपछि यो साझेदारी टुटेको थियो । अर्जुन र डेभिड मलानले १४औँ ओभरको चौथो बलसम्म साझेदारी गर्नुभएको थियो । पेभेलियन फर्किनुअघि अर्जुनले ३९ बलमा तीन छक्का र चार चौका प्रहार गर्नुभएको थियो ।

यसअघिका चारै खेलमा पराजित भएको जनकपुर काठमाडौं गोर्खाजसँग ५ विकेटले, विराटनगर किंग्ससँग ९ रनले, पोखरा एभेन्जर्ससँग २५ रनले तथा सुदूरपश्चिम रोयल्ससँग ६ विकेटले हार बेहोरेको थियो । उता, जनकपुरसँगको हारसँगै चितवन राइनोजको प्लेअफ यात्रा जटिल बनेको छ । मिश्रित प्रदर्शन गरिरहेको चितवनले अब बलियो मानिने सुदूरपश्चिम रोयल्स र पोखरा एभेन्जर्ससँग खेल्न बाँकी छ । प्लेअफ सम्भावना कायम राख्न चितवनले दुवै खेल जित्नुपर्ने दबाबमा छ ।

चितवनले लिगका पाँच खेलमध्ये दुई जित र तीन हारसहित चार अंक जोडेको छ । उसले कर्णाली याक्सलाई ४ विकेटले तथा विराटनगर किंग्सलाई ४८ रनले पराजित गरेको थियो । तर, लुम्बिनी लायन्स, काठमाडौं गोर्खाज र जनकपुर बोल्ट्सविरुद्ध पराजित भएको थियो ।