नयाँदिल्ली । दक्षिण अफ्रिकाविरुद्धको टी-२० शृंखलाको पहिलो खेल भारतले १०१ रनले जितेको छ । ओडिसाको कटकमा खेलिएको टी-२० खेलमा दक्षिण अफ्रिकाले टस जितेर पहिले बलिङ गर्ने निर्णय गरेको थियो । भारतले दिएको १७६ रनको लक्ष्य पछ्याएको दक्षिण अफ्रिका ७४ रनमा अलआउट भयो । भारतले १०० रन वा सोभन्दा बढीको अन्तरले टी-२० जितेको यो नवौंपटक हो । कटकमा भारतले पहिलोपटक टी-२० आईमा दक्षिण अफ्रिकालाई पराजित गरेको हो ।
हार्दिक पाण्ड्याको अर्धशतकको मद्दतमा भारतले ६ विकेट गुमाउँदै १७५ रन बनाएको थियो । हार्दिकले २८ बलमा ५९ रन बनाउनुभयो, जसमा ६ चौका र ४ छक्का प्रहार गर्नुभयो । तिलक बर्माले २६ र अक्षर पटेलले २३ रन बनाउनुभयो ।
दक्षिण अफ्रिकाका लागि लुंगी न्गिडीले ३ र लुथो सिपामलाले २ विकेट लिनुभयो । जवाफमा दक्षिण अफ्रिकाका देवाल्ड ब्रेभिसले सर्वाधिक २२ रन बनाउनुभयो । सात खेलाडीले १० रन पनि बनाउन सकेनन् । भारतका लागि अर्शदीप सिंह, जसप्रीत बुमराह, वरुण चक्रवर्ती र अक्षर पटेलले दुई–दुई विकेट लिनुभयो । हार्दिक पाण्ड्या र शिवम दुबेले एक–एक विकेट लिनुभयो ।
बुमराहले आफ्नो १००औँ टी-२० आई विकेट पनि पूरा गर्नुभयो । हार्दिकले आफ्नो १००औँ छक्का पनि पूरा गर्नुभयो र उहाँको बलिङ संख्या ९९ विकेट पुग्यो । उहाँ प्लेयर अफ द म्याच घोषित हुनुभयो । पाण्ड्या टी-२० मा १०० छक्का प्रहार गर्ने चौथो भारतीय बन्नुभयो । यो रेकर्ड रोहित शर्माको नाममा छ, जसको २०५ छक्का छ । जसप्रीत बुमराह टी-२० मा १०० विकेट लिने दोस्रो भारतीय बन्नुभयो । उहाँले डेवाल्ड ब्रेभिसलाई आउट गरेर यो उपलब्धि हासिल गर्नुभएको हो । बुमराहभन्दा पहिले अर्शदीप सिंहले यो उपलब्धि हासिल गर्नुभएको थियो ।
बुमराह अन्तर्राष्ट्रिय क्रिकेटका तीनवटै ढाँचा (टेष्ट, एकदिवसीय र टी-२०) मा १०० विकेट लिने विश्वका पाँचौं बलर बन्नुभयो । उहाँभन्दा पहिले लसिथ मालिंगा, टिम साउथी, शकिब अल हसन र शाहीन अफ्रिदीमात्र यस उत्कृष्ट क्लबका हिस्सा हुनुहुन्थ्यो । दक्षिण अफ्रिकाले बनाएको ७४ रन टी-२० आईमा उनीहरूको सबैभन्दा कम योगफल थियो ।
यसअघि २०२२ मा राजकोटमा भारतविरुद्ध टोली ८७ रनमा अलआउट भएको थियो । यो घरेलु मैदानमा दक्षिण अफ्रिकाविरुद्ध रनको अन्तरले भारतको सबैभन्दा ठूलो जित हो । यसअघि भारतले २०२२ मा राजकोटमा दक्षिण अफ्रिकालाई नै ८२ रनले पराजित गरेको थियो । अब दोस्रो टी-२० डिसेम्बर ११ मा चण्डीगढमा खेलिनेछ । एजेन्सी
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच