काठमाडौं । सरकारले मानव बेचबिखन विरुद्धको राष्ट्रिय नीति, २०८२ स्वीकृत गरेको छ । पुस २८ गते बसेको मन्त्रिपरिषद् बैठकले उक्त नीति स्वीकृत गर्ने निर्णय गरेको हो । बैठकका निर्णय सार्वजनिक गर्दै अन्तरिम सरकारका प्रवक्ता एवं सञ्चार तथा सूचना प्रविधिमन्त्री जगदीश खरेलले सरकारले माघ ४ गते आइतबार बिहान ११ बजे संघीय संसद् सचिवालय, सिंहदरबारमा संघीय संसद्को राष्ट्रियसभाको अधिवेशन आह्वान गर्न राष्ट्रपतिसमक्ष सिफारिश गर्ने निर्णय गरेको जानकारी दिनुभयो । मन्त्री खरेलका अनुसार बैठकले नेपाल न्याय सेवा, कानुन समूह अन्तर्गतका राजपत्रांकित प्रथम श्रेणीका आठजना अधिकृतहरूको सरुवा गर्ने तथा सोही सेवाका राजपत्रांकित द्वितीय श्रेणीका आठजना अधिकृतहरूलाई प्रथम श्रेणीमा पदस्थापन गर्ने निर्णय पनि गरेको छ ।
यस्तै, सरकारले २०८२ माघ २६ देखि २८ गतेसम्म इटलीको रोममा आयोजना हुने ४९औँ सेसन अफ गभर्निङ काउन्सिल अफ द इन्टरनेसनल फन्ड फर एग्रिकल्चर डेभलपमेन्टमा कृषि तथा पशुपन्छी विकासमन्त्री डा. मदनप्रसाद परियारलाई सहभागी हुन स्वीकृति प्रदान गरेको छ ।
सरकारले अन्तर्राष्ट्रिय एकीकृत पर्वतीय विकास केन्द्रको सदस्य राष्ट्रको हैसियतले नेपालले बुझाउनुपर्ने सन् २०२४ को वार्षिक योगदानस्वरूप अमेरिकी डलर दुई लाख ८३ हजार ५०३ भुक्तानी गर्न स्वीकृति दिएको छ । मेक्सिकोमा आयोजना हुने बैठकमा सहभागी हुन अर्थ मन्त्रालयका सचिव (राजस्व) भूपाल बराललाई स्वीकृति प्रदान गर्ने निर्णय गरिएको छ । मन्त्रिपरिषद् बैठकले वित्तीय क्षेत्र विकास रणनीति (२०८२/८३-२०८६/८७) स्वीकृत गरेको छ । उक्त रणनीतिले वित्तीय प्रणालीको स्थायित्व, पहुँच र पारदर्शिता सुदृढ गर्ने लक्ष्य लिएको सरकारको भनाइ छ ।
सरकारले २०८२ माघ ६ र ७ गते चीनमा हुने कार्यक्रममा सहभागी हुन उद्योग मन्त्रालयका सचिव डा. रामप्रसाद घिमिरेको नेतृत्वमा नेपाली प्रतिनिधिमण्डल पठाउने निर्णय गरेको छ । सरकारले नेपाली सेनाका तीनजना महासेनानीलाई सहायक रथीमा बढुवा गर्ने तथा दुईजना महासेनानीको सरूवा गर्ने निर्णय गरेको छ । मोरक्कोको माराकेसमा आयोजना हुने कार्यक्रममा सहभागी हुन श्रम, रोजगार तथा सामाजिक सुरक्षा मन्त्रालयका सचिव डा. दीपक काफ्लेलाई स्वीकृति प्रदान गरिएको छ ।
स्पेनको म्याड्रिडमा आयोजना हुने अन्तर्राष्ट्रिय पर्यटन मेलामा पर्यटन मन्त्रालयका सचिव मुकुन्दप्रसाद निरौलालाई स्वीकृति दिने निर्णय पनि बैठकले गरेको छ । बैठकले दलितको हक, अधिकार तथा विकाससम्बन्धी विधेयक तर्जुमा गर्न आवश्यक सिद्धान्त स्वीकृत गरेको छ । सरकारले गोरखापत्र संस्थानको अध्यक्ष पदमा भक्तपुरका गोविन्दप्रसाद भण्डारीलाई नियुक्त गर्ने निर्णय गरेको छ । त्यसैगरी, प्रधानमन्त्रीको प्रेस सल्लाहकारमा बाजुराका रामबहादुर रावललाई नियुक्त गर्ने निर्णय पनि मन्त्रिपरिषद् बैठकले गरेको छ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच