काठमाडौं । नेपाल विद्युत् प्राधिकरणले संस्थालाई प्रविधिमैत्री, सरल, सक्षम र भविष्य उन्मुख बनाउने दीर्घकालीन रणनीतिअनुसार ‘एनइए एई साथी’ प्रणाली (एप) प्रयोगमा ल्याउने भएको हो । कृत्रिम बुद्धिमत्ता (एआई) प्रविधिका रूपमा मात्र नभई संस्थागत साथीका रूपमा आत्मसात गर्ने नवीन अवधारणासहित ‘एनइए एई साथी’ प्रणाली (एप) प्रयोगमा ल्याउन लागिएको प्राधिकरणले जनाएको छ ।
प्राधिकरणले एआई प्रवर्द्धनको उद्देश्यसाथ ‘ह्याकाथन इभेन्ट-२०८२’ समेत आयोजना गरेको छ । प्राधिकरणका कार्यकारी निर्देशक हितेन्द्रदेव शाक्यले भन्नुभयो, ‘एआईलाई जटिल र टाढाको प्रविधि होइन, आवश्यक परेका बेला सम्झिने र सहयोग लिने साथी बनाउनुपर्छ भन्ने सोचसाथ यो कार्यक्रम अघि बढाएका हौं, ‘एई साथी’ नाम आफैंमा एक आकर्षक र जनमैत्री अवधारणा हो । यसले प्रविधिलाई जटिल नभई आत्मीय, सहज र प्रयोगमैत्री रूपमा प्रस्तुत गर्ने लक्ष्य हामीले राखेका छौँ ।’
सेवाग्राहीले ‘एई साथी’ भनी बोलाउने र ग्राहकलाई आवश्यक पर्ने विभिन्न जानकारी तथा सहयोगका लागि प्रयोग गर्ने संस्कार क्रमशः विकास हुँदै जाने विश्वास प्राधिकरणले लिएको पनि उहाँले बताउनुभयो । एआईलाई संस्थागत रूपमा आत्मसात गर्ने उद्देश्यले सुरु गरिएको ‘ह्याकाथन’ मा संस्थाभित्रकै कर्मचारीबाट २७ वटा प्रस्तावका विषयमा प्रस्तुत भएको र ती प्रस्ताव ग्राहक सेवा सुधार, प्रशासनिक कार्यप्रवाह सरलीकरण, डेटा विश्लेषण, नीतिगत तथा कानुनी सहजीकरणलगायतका विषयमा केन्द्रित रहेको प्राधिकरणले जनाएको छ ।
‘ह्याकाथन’ मार्फत् प्राप्त प्रस्ताव प्रस्तुतीकरणपछि विस्तृत मूल्यांकन गरिने र मूल्यांकन प्रक्रियाबाट उत्कृष्ट तथा व्यावहारिक अवधारणा छनोट गरी क्रमशः कार्यान्वयनमा लगिने प्राधिकरणले जानकारी दिएको छ । प्राधिकरणले दीर्घकालीन रणनीतिसाथ ‘एई साथी’ को अवधारणा विकास गरिएको भन्दै उक्त पहललाई संस्थागत नवप्रवर्तन, डिजिटल रूपान्तरण तथा सेवा सुधारतर्फको महत्वपूर्ण सुरुवातका रूपमा अघि बढाएको जनाएको छ । प्राधिकरणका अनुसार, ‘एई साथी’ प्रणालीलाई प्राधिकरणले प्रारम्भिक चरणमा ग्राहक सेवा र सूचना प्रवाहमा केन्द्रित गर्ने र विस्तारै प्राविधिक विश्लेषण, लोड व्यवस्थापन, पूर्वानुमान र डेटा–आधारित निर्णय प्रक्रियासम्म विस्तार गर्ने योजना बनाएको छ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
समता शुल्क फिर्ता भएपछि निजी
वडाध्यक्ष सञ्जय पटेल पक्राउ
पूर्व महानिर्देशक प्रदीप अधिकारीविरुद्ध भ्रष्टाचार
गण्डकीमा ट्राफिक कारबाहीबाट डेढ करोडभन्दा
कीर्तिपुरमा कारभित्र जलेर मृत्यु हुने
बिजुलीमा लगाइएको मूल्य अभिवृद्धि कर