काठमाडौं । नेपाल अटोमोबाइल इम्पोर्टर्स एण्ड म्यानुफ्याक्चर्स एसोसिएसन (नाइमा)ले ट्याक्सीका रूपमा प्रयोग हुने सवारीसम्बन्धी राष्ट्रिय मापदण्ड २०८१ सम्बन्धी विभिन्न सुझाव विभागीय मन्त्रालयलाई दिएको छ । नाइमाले हाल कार्यान्वयनमा रहेको उक्त मापदण्डमा देखिएका केही व्यावहारिक तथा नीतिगत विषयबारे भौतिक पूर्वाधार तथा यातायात मन्त्रालयको ध्यानाकर्षण गराएको हो । नाइमाले आफ्नो पत्रमा उल्लेख गरेअनुसार, ट्याक्सी सेवा मापदण्ड, २०८१ मा ट्याक्सी सेवालाई साधारण, विशेष र विशिष्ट गरी तीन वर्गमा विभाजन गरिएको छ ।
उक्त मापदण्डमा प्राविधिक, सुरक्षा तथा सेवासम्बन्धी विशिष्टिकरणहरू स्पष्ट रूपमा तोकिएका छन् र ती मापदण्ड पूरा गर्ने सवारी साधनलाई ट्याक्सी सेवाअन्तर्गत समावेश गर्न सकिने व्यवस्था रहेको छ । नाइमाका अनुसार, हाल बागमती प्रदेशमा व्यवहारमा सिडान प्रकारका सवारी साधनलाई मात्र ट्याक्सी सेवाका लागि अनुमति दिइएको अवस्था देखिएको छ । तर, राष्ट्रिय मापदण्डअनुसार साधारण, विशेष र विशिष्ट वर्गभित्र पर्ने तथा तोकिएका सबै प्राविधिक, सुरक्षा र सेवासम्बन्धी मापदण्डहरू पूरा गर्ने सवारी साधनलाई ट्याक्सी सेवामा समावेश गर्न सकिने स्पष्ट व्यवस्था रहेको भन्दै नाइमाले ध्यानाकर्षण गराएको छ ।
नाइमाले सिडानबाहेकका अन्य उपयोगी, यात्रुमैत्री तथा विभिन्न आवश्यकता अनुकूल सवारी साधनलाई ट्याक्सी सेवाबाट बाहिर राख्न स्पष्ट आधार नदेखिएको उल्लेख गरेको छ । मापदण्डमा तोकिएका सबै शर्त पूरा गर्ने विभिन्न सवारी वर्गलाई अनुमति प्रदान गरिएमा ट्याक्सी सेवा प्रदायकलाई आवश्यकताअनुसार सेवा दिन थप लचकता प्राप्त हुने, यात्रुलाई पर्याप्त सुविधा, सामान राख्ने स्थान, पहुँच योग्यता(अपांतामैत्री) तथा यात्रु समूहको आकारअनुसार थप विकल्प उपलब्ध हुने नाइमाको भनाइ छ । पत्रमा विश्वका विभिन्न देशमा ट्याक्सी सेवा विभिन्न आकार र वर्गका सवारी साधनमार्फत् सञ्चालन भइरहेको सन्दर्भ पनि प्रस्तुत गरिएको छ ।
ADVERTISEMENT
नेपालमा विशेषगरी बागमती प्रदेशमा विकल्पहरू सीमित रहेको अवस्था देखिएको छ । केही अन्य शहरमा फरक वर्गका सवारी साधनलाई ट्याक्सी सेवामा अनुमति दिइएको भए पनि बागमती प्रदेशमा उक्त व्यवस्था लागू नभएका कारण व्यावहारिक असमानता देखिएको नाइमाको भनाइ छ । सोही सन्दर्भमा साधारण, विशेष र विशिष्ट वर्गअन्तर्गत पर्ने तथा राष्ट्रिय मापदण्डमा उल्लेखित सबै प्राविधिक, सुरक्षा र सेवासम्बन्धी विशिष्टिकरणहरू पूरा गर्ने सवारी साधनलाई ट्याक्सी सेवामा अनुमति प्रदान गरिनु न्याय, समानता र सेवा विस्तारका दृष्टिले उपयुक्त हुने नाइमाले जनाएको छ ।
उक्त संस्थाले मन्त्रालयद्वारा तयार पारिएको नीतिगत ढाँचाको उद्देश्य र भावनाप्रति पूर्ण सम्मान व्यक्त गर्दै आफ्ना सुझावहरू उद्योगगत अनुभव, व्यावहारिक आवश्यकता तथा सेवाको गुणस्तर अभिवृद्धि गर्ने उद्देश्यले प्रस्तुत गरिएको स्पष्ट पारेको छ । सुरक्षित, गुणस्तरीय र यात्रुमैत्री ट्याक्सी सेवा प्रवर्द्धनका लागि मन्त्रालयसँग निरन्तर सहकार्य गर्न नाइमा प्रतिबद्ध रहेको पनि पत्रमा उल्लेख गरिएको छ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच