इनिसा मृत्यु प्रकरण : अनुसन्धानमा सिआइबीदेखि पोलिग्राफसम्मको विज्ञ टोली

काठमाडौं । बलात्कारपछि हत्या गरिएको भनिएकी १६ वर्षीया इनिसा विकसँग सम्बन्धित घटनामा प्रहरीले वैज्ञानिक तवरले अनुसन्धान गरिरहेको छ । त्यसका लागि सिआइबीको एक टोलीदेखि पोलिग्राफसम्मको विज्ञ टोली अनुसन्धानमा सक्रिय भएका छन् । सुर्खेतको गुर्भाकोट नगरपालिका-६ बडाखोली स्थायी घर हुनुभएकी १६ वर्षकी इनिसा हाल वीरेन्द्रनगर नगरपालिका–१ मा परिवारका साथ बस्दै आउनुभएको थियो । शनिबार बिहान ६ बजे ट्युसन पढ्न जाने भन्दै घरबाट निस्किनुभएकी उहाँ बिहान ९ बजेतिर वीरेन्द्रनगर नगरपालिका-४ को उत्तरतर्फ पर्ने जनजागरण सामुदायिक वनमा अचेत अवस्थामा भेटिनुभएको थियो । प्रहरीले उहाँलाई प्रदेश अस्पताल पुर्‍याउँदा चिकित्सकले मृत घोषणा गरेका थिए ।

जिल्ला प्रहरी कार्यालय सुर्खेतका प्रहरी उपरीक्षक सुधिरराज शाहीका अनुसार उक्त टोलीले बिहीबार नै सुर्खेत आएर अनुसन्धान अघि बढाइसकेका छन् । उहाँले अनुसन्धानको कुनै पाटो नछुटोस् भनेर थप विज्ञहरूको टोलीको सहयोग लिइएको बताउनुभएको छ । सुर्खेत प्रहरीले घटनाको प्रारम्भिक अनुसन्धान सकिएको दाबी गरेको छ । पोस्टमार्टम रिपोर्ट आइसकेको छ ।

अनुसन्धान अधिकृतले फरेन्सिक ल्याबहरूमा मोबाइललगायत पठाइसकिएको छ । त्यस्तै, केन्द्रीय विधि विज्ञान प्रयोगशालामा टक्सिकोलोजिकल रिपोर्टको लागि र बायो-सेरोलोजिकल परीक्षणका लागि पठाइएको जनाइएको छ । प्रहरी उपरीक्षक शाहीले ती सबै रिपोर्ट आएपछि र त्यसको विश्लेषण गरेपश्चात् प्रहरी एउटा निष्कर्षमा पुग्ने बताउनुभयो । जिल्लामै पनि अनुसन्धानका लागि छुट्टै टोली गठन गरेर काम भइरहेको उहाँले जानकारी गराउनुभयो ।

जिल्ला प्रहरी कार्यालयका एक अनुसन्धान अधिकृतका अनुसार प्रहरी अनुसन्धानको करिब निष्कर्षमा पुगिसकेको अवस्थामा सामाजिक सञ्जालदेखि सबैतिरबाट विभिन्न तरिकाले बहस गराइएपछि विभिन्न कोणबाट अनुसन्धान अघि बढाइएको हो । उहाँले भन्नुभयो, ‘घटना गम्भीर प्रकृतिको भयो । परिवारहरूले समेत विश्वास नमान्ने अवस्था होला भनेर सबै किसिमको अनुसन्धान गर्न लागिएको हो । ताकि पछि प्रश्न उठ्ने ठाउँ नहोस् ।’

ADVERTISEMENT

भेरी अस्पताल बाँकेका फरेन्सिक विशेषज्ञ डा. अर्विन शाक्यको टोलीले प्रदेश अस्पताल सुर्खेतमा पुगेर गरेको पोस्टमार्टम रिपोर्टमा जबर्जस्ती करणी गर्दा मृतकको संवेदनशील अंग च्यातिएको र अत्यधिक रक्तश्राव हुँदा मृत्यु भएको हुनसक्ने उल्लेख छ ।

पीडित पक्षले फागुन २४ गते उजुरी दिएका थिए । सोही उजुरीका आधारमा अन्य १५, १६ र १७ वर्षीय बालकहरूलाई पनि नियन्त्रणमा लिएर अनुसन्धान भइरहेको जिल्ला प्रहरी कार्यालय सुर्खेतका प्रहरी नायव उपरीक्षक मोहनजंग बुढ्थापाले बताउनुभयो । परिवारले सामूहिक बलात्कारको आशंका गर्दै न्यायको माग गरेको छ ।

न्याय नमिले शव नबुझ्ने परिवारको घोषणा
रोजगारीका सिलसिलामा दुबईमा जानुभएका बुबा इन्द्र छोरीको मृत्युपछि घर फर्किएर न्याय नमिलेसम्म शव नबुझ्ने बताउनुभएको छ । उहाँले जिल्ला प्रहरी कार्यालय अगाडि बसेर ‘मेरो छोरीमाथि जघन्य अपराध भएको छ, बलात्कारपछि हत्या भएको छ, न्याय मर्नुभएन’ भन्ने बताउनुभएको छ । उहाँले न्याय नपाएसम्म अस्पतालको शवगृहमा रहेको छोरीको शव नउठाउने पनि बताउनुभएको छ । साथै निष्पक्ष तरिकाले अनुसन्धान हुनुपर्ने माग राख्दै उहाँले ‘प्रहरीले पनि न्याय मिल्छ भन्नुभएको छ, मेरो भनाइ बलात्कारीहरूलाई आजीवन काराबास होस्, कि मृत्युदण्ड हुनुपर्छ, यस्तो नीति नलिए यस्ता घटना घटिरहने’ बताउनुभयो ।

न्याय माग्दै निरन्तर प्रदर्शन
बलात्कारपछि हत्या गरिएकी इनिसालाई न्यायको माग गर्दै देशका विभिन्न स्थानमा विद्यार्थीहरूले निरन्तर प्रदर्शन गरिरहेका छन् । ‘इनिसा विकलाई न्याय दे, बलात्कारीलाई फाँसी दे’, ‘नारीहरूको सुरक्षा गर्’, लगायतका नारा लेखिएका प्लेकार्डसहित दोषीलाई कडाभन्दा कडा कारबाहीको माग गर्दै प्रदर्शन भइरहेका छन् । कालोपट्टी बाँधेर काठमाडौंमा प्रदर्शनमा उत्रिएका विद्यार्थीहरूले पीडित परिवारले न्याय नपाएसम्म विरोध प्रदर्शन नरोकिने बताएका छन् ।