प्रधानमन्त्री कप : बागमती र पुलिस क्लबको पहिलो जित

काठमाडौं । प्रधानमन्त्री कप पुरुष एकदिवसीय राष्ट्रिय क्रिकेट प्रतियोगिताको मंगलबारको खेलमा बागमती प्रदेश र नेपाल पुलिस क्लबले पहिलो जित निकालेका छन् ।

गण्डकी प्रदेशलाई १७० रनको फराकिलो अन्तरले पराजित गर्दै बागमतीले प्रतियोगितामा पहिलो जित निकालेको हो । तल्लो मूलपानी मैदानमा टस हारेर ब्याटिङको निम्तो पाएको बागमतीले निर्धारित ५० ओभरमा आट विकेट गुमाउँदै २९४ रन बनाएको हो । बागमतीले दिएको २९५ रनको लक्ष्य पछ्याएको गण्डकी ३१.५ ओभरमा १२४ रन बनाउँदै अलआउट भयो । गण्डकीको लागि अर्जुन कुमालले ७४ रनको सम्हालिएको पारी खेल्नुभएको थियो । उहाँले ९० बलमा ११ चौका प्रहार गर्नुभयो । अर्जुनले पाँचौं विकेटको लागि सुवास भण्डारीसँग ७१ रनको साझेदारी बनाउँदै गण्डकीको पारी सम्हाल्नुभएको थियो । शीर्षक्रमका ब्याटर गौरव विक र वंश क्षेत्री डक आउट हुँदा एक समय गण्डकी पाँच विकेटको क्षतीमा ३६ रन बनाएको थियो ।

सुवास भण्डारीले ४८ बलमा एक चौक र एक छक्का प्रहार गर्दै २९ रन बनाउनुभएको थियो । उहाँ रन आउटको रुपमा पेभेलियन फर्किनुभयो । उहाँ र अर्जुन बाहेक कसैले पनि दोहोरो अंकमा रन बनाउन सकेनन् । गण्डकीका पाँच ब्याटर डकआउट भएका थिए । गण्डकीलाई सस्तैमा समेट्न बागमतीका बायाँहाते पेसर रिजन ढकालले सर्वाधिक तीन विकेट लिनुभयो भने कप्तान सन्दीप लामिछाने र उपकप्तान इशान पाण्डेले समान दुई–दुई विकेट लिनुभएको थियो । दयानन्द मण्डल र सुवास खत्रीले एक-एक विकेट लिनुभएको थियो । त्यसअघि, ब्याटिङ गरेको बागमतीको लागि इशान पाण्डेले सर्वाधिक ७१ रन बनाउनुभयो । उहाँले ६१ बलमा चार चौका र दुई छक्का प्रहार गर्नुभयो । ओपनर ब्याटर अशुतोष घिरौयाले ५९रनको अर्धशतकीय पारी खेल्नुभयो । उहाँले पहिलो विकेटको लागि शुभ कंसाकरसँग ६४ रनको साझेदारी गर्नुभएको थियो । अर्का ओपनर शुभले ४४ रन जोडनुभयो ।

वानडाउन आएका शिवम् तिवारीले १८ रन बनाउनुभयो । उत्तम मगरले ३० र विवेक मगरले २७ रन जोडनुभयो । कप्तान सन्दीप लामीछाने २६ रनमा अविजित रहनुभयो । गण्डकीको लागि कमल परियारले दुई विकेट लिनुभयो । कप्तान विपिन खत्री, अंकित न्यौपाने, सिविन श्रेष्ठ र सुवास भण्डारीले एक–एक विकेट लिनुभयो । बागमती प्रदेशको यो खेल दोस्रो खेल हो । बागमतीले पहिलो खेल एपीएफसँग ७१ रनको हार बेहोरेको थियो ।

यस्तै, नेपाल पुलिस क्लबले प्रधानमन्त्री कप पुरुष राष्ट्रिय प्रतियोगितामा पहिलो जित निकाल्ने क्रममा एपीएफ क्लबमाथि एकपक्षीय जित निकालेको छ । मंगलबार माथिल्लो मुलपानी मैदानमा भएको खेलमा पुलिसले एपीएफलाई १८५ रनले पराजित गरेको हो । पुलिसले दिएको ३५६ रनको विशाल लक्ष्य पछ्याएको एपीएफ ४४ ओभरमा १७० रनमा अलआउट भयो ।

नन्दन यादवले अविजित ४४ रन बनाउनुभयो भने कमलसिंह ऐरीले ३५ रन जोडनुभयो । सन्दीप जोराले २४ तथा आसिफ शेखले १८ रन बनाउनुभयो । कप्तान रोहित पौडेल ११ रनमा आउट हुनुभयो । पुलिसका लागि ललित राजवंशीले १० ओभरमा २८ रन दिएर तीन विकेट लिनुभयो । करण केसी, राशिद खान र दिनेश खरेलले दुई-दुई विकेट लिनुभयो भने सागर ढकालले एक विकेट लिनुभयो ।

त्यसअघि टस हारेर पहिले ब्याटिङको निम्तो पाएको पुलिसले ५० ओभरमा नौ विकेट गुमाएर ३५५ रनको योगफल बनाएको थियो । यो पीएम कप इतिहासकै सर्वाधिक योगफल हो ।

यसअघि सर्वाधिक योगफल एपीएफकै नाममा थियो । एपिएफले पीएम कप २०१८ मा मधेश प्रदेशविरुद्ध ३३९ रनको योगफल बनाएको थियो । आठ वर्षपछि उक्त रेकर्ड तोडिएको हो ।

एपीएफविरुद्ध पुलिसका चार ब्याटरले अर्धशतक बनाए । ओपनर दिनेश खरेल, शंकर राना, कप्तान आरिफ शेख र दिल्साद अलीले अर्धशतक बनाउनुभयो ।

शंकरले सर्वाधिक ६१ रन बनाउनुभयो भने दिनेश खरेलले ६० र कप्तान आरिफले ५० रन बनाउनुभयो । दिल्साद अली ५१ रनमा अविजित रहनुभयो । राशिद खानले ४४ रन जोडनुभयो ।

एपीएफका कमलसिंह ऐरी र अमरसिंह राउटेलाले दुई-दुई विकेट लिँदा नन्दन यादव, रोहित पौडेल र युवराज खत्रीले एक-एक विकेट लिनुभएको थियो । पुलिस पहिलो खेलमा आर्मीसँग पराजित भएको थियो भने एपीएफले बागमती प्रदेशलाई पराजित गरेको थियो ।