‘निजी क्षेत्र करदातामात्रै होइन, राष्ट्र निर्माणको अभिन्न अंग हो’

काठमाडौं । राष्ट्रपति रामचन्द्र पौडेलले नेपाल चेम्बर अफ कमर्सको ७५औँ वार्षिक साधारणसभा तथा हीरक जयन्तीका अवसरमा आयोजित कार्यक्रममा आर्थिक तथा सामाजिक क्षेत्रमा उल्लेखनीय योगदान पुर्‍याउने विभिन्न नौ व्यक्ति तथा संस्थालाई विभिन्न विधामा सम्मानित गर्नुभएको छ । चेम्बरका पूर्वअध्यक्षहरूको नाममा स्थापना गरिएका मेमोरियल अवार्डमार्फत् व्यापार, उद्योग, कृषि, पर्यटन, सामाजिक सेवा, ट्रेड लजिस्टिक्सलगायतका क्षेत्रमा योगदान पुर्‍याउने व्यक्तित्वहरूलाई राष्ट्रपति पौडेलले सम्मान प्रदान गर्नुभएको हो ।

हीरक जयन्तीका अवसरमा चेम्बरले विभिन्न व्यावसायिक विधाका नौ व्यक्ति तथा संस्थालाई सम्मान गरेको छ ।

ईश्वरलाल श्रेष्ठ लाइफटाइम अचिभमेन्ट अवार्डतर्फ सुजल फुड्स प्रालिका सह-संस्थापक गणेशबहादुर श्रेष्ठ सम्मानित हुनुभएको छ भने पर्यटनतर्फ बनवारीलाल मित्तल मेमोरियल अवार्डबाट होटल शंकरका अध्यक्ष तथा प्रबन्ध निर्देशक विनोदशंकर श्रेष्ठ सम्मानित हुनुभएको छ । व्यापारतर्फ जुद्धबहादुर श्रेष्ठ मेमोरियल अवार्ड नेपाल उल हाउसलाई प्रदान गरिएको छ भने कृषितर्फ राजबहादुर चिपालु मेमोरियल अवार्डबाट गणेश हेम्सका गणेश ऐडी, ट्रेड लजिस्टिक्सतर्फ बिहारीलाल खेतान मेमोरियल अवार्डबाट एभरेष्ट डी कार्गो प्रालिका अध्यक्ष रविन्द्रमान सिंह प्रधान तथा उद्योगतर्फ इन्द्रभक्त मेमोरियल अवार्डबाट विशाल ग्रुपका उपाध्यक्ष त्रिलोकचन्द्र अग्रवाल र सामाजिक सेवातर्फ बालकृष्ण श्रेष्ठ मेमोरियल अवार्डबाट नेपाल क्यान्सर अस्पताललाई सम्मान गरिएको छ ।

त्यसैगरी जनकदास श्रेष्ठ मेमोरियल अवार्ड एजु केसलाई प्रदान गरिएको छ भने प्रदेश, जिल्ला तथा नगर चेम्बरमध्ये उल्लेखनीय कार्य गरेबापत मोरङ चेम्बर अफ कमर्सलाई कदरपत्र प्रदान गरिएको छ ।

कार्यक्रमलाई सम्बोधन गर्दै राष्ट्रपति पौडेलले निजी क्षेत्रलाई केवल कर तिर्ने निकायका रूपमा नभई राष्ट्र निर्माणको अभिन्न साझेदार र देशको ‘आर्थिक इञ्जिन’ का रूपमा लिनुपर्ने बताउनुभयो । उहाँले निजी क्षेत्र सबल भएमात्र राष्ट्रको अर्थतन्त्र सुदृढ हुने उल्लेख गर्दै सरकार र निजी क्षेत्रबीच सहकार्य अझ मजबुत बनाउनुपर्नेमा जोड दिनुभयो ।

ADVERTISEMENT

उद्यमशीलता, प्रविधि र सिर्जनशीलतामार्फत् युवालाई आर्थिक गतिविधिमा जोड्नु प्रमुख आवश्यकता रहेको भन्दै राष्ट्रपति पौडेलले परम्परागत सोचबाट बाहिर निस्केर नवीनता र नवप्रवर्तनतर्फ लाग्न आह्वान गर्नुभयो । डिजिटल अर्थतन्त्र, हरित विकास र स्टार्टअप संस्कृतिको विकासमा उहाँको जोड थियो । राष्ट्रपति पौडेलले भन्नुभयो, ‘हामीले भुल्न नहुने एउटा महत्तवपूर्ण कुरा के हो भने निजी क्षेत्र सबल भएमात्र राष्ट्रको अर्थतन्त्र सबल हुन्छ । निजी क्षेत्रलाई केवल कर तिर्ने निकायका रूपमा होइन, राष्ट्र निर्माणको साझेदारका रूपमा हेर्न आवश्यक छ, निजी क्षेत्र केवल आर्थिक वृद्धिको आधारमात्र होइन, यो देशको आर्थिक इञ्जिन हो भन्ने म ठान्दछु ।’

जननिर्वाचित संसद् र सरकारलाई सुशासनमार्फत् आर्थिक समृद्धि हासिल गर्ने र जनताको जीवनस्तर उकास्ने गहन दायित्व रहेको उल्लेख गर्दै उहाँले उक्त अभियानमा निजी क्षेत्रलाई साथमा लिएर अघि बढ्न सरकारलाई सुझाव दिनुभयो । साथै, संघ, प्रदेश र स्थानीय तहबीचको समन्वय सुदृढ बनाउँदै समग्र विकास प्रक्रियालाई गति दिनुपर्ने उहाँको भनाइ थियो ।

कोरोना महामारी, आपूर्ति शृंखलामा आएको अवरोध तथा उत्पादनमा गिरावटले अर्थतन्त्र प्रभावित भएको उल्लेख गर्दै राष्ट्रपति पौडेलले उल्लेखित परिस्थितिमा समन्वय र सहकार्य अपरिहार्य भएको बताउनुभयो । साथै, युवालाई स्वदेशमै अवसर सिर्जना गरी ‘ब्रेन ड्रेन’ रोक्नुपर्ने, उद्यमशीलता, प्रविधि र नवप्रवर्तनमा जोड दिनुपर्ने पनि उहाँले बताउनुभयो । चेम्बरका अध्यक्ष कमलेशकुमार अग्रवालले २००७ सालदेखि सुरु भएको चेम्बर आन्दोलन आज देशव्यापी रूपमा विस्तार भइसकेको र ८० भन्दा बढी अन्तर्राष्ट्रिय संस्थासँग सहकार्य भइरहेको जानकारी दिनुभयो । उहाँले पछिल्लो समय राजनीतिक अस्थिरता, नीतिगत अनिश्चितता तथा मौद्रिक र आर्थिक नीतिबीच समन्वय अभावका कारण निजी क्षेत्र प्रभावित भएको बताउनुभयो । अग्रवालले भन्नुभयो, ‘बैंकिङ प्रणालीमा लगानीयोग्य रकम हुँदा पनि निजी क्षेत्र आकर्षित हुन सकेको छैन, युवालाई स्वदेशमै अवसर सिर्जना गरी ‘ब्रेन ड्रेन होइन, ब्रेन गेन’को रणनीति अवलम्बन गर्नुपर्छ ।’ उहाँले जारी राजनीतिक संक्रमणबाट मुलुक अब स्थायित्वतर्फ उन्मुख भएको उल्लेख गर्दै जनादेशसहित गठन हुने सरकारबाट आर्थिक सुधार, सुशासन र लगानीमैत्री वातावरण निर्माण हुनेमा विश्वास व्यक्त गर्नुभयो । अग्रवालले भन्नुभयो, ‘नयाँ जनादेशले राजनीतिक स्थायित्वको स्पष्ट संकेत दिएको छ । यसले स्वदेशी तथा विदेशी लगानीकर्तामा विश्वास सिर्जना गर्नेछ र अर्थतन्त्र चलायमान बनाउन महत्त्वपूर्ण भूमिका खेल्नेछ ।’ उहाँले निजी क्षेत्र नयाँ नेतृत्वप्रति सकारात्मक रहेको उल्लेख गर्दै सरकारसँग सहकार्य गरेर आर्थिक गतिविधि विस्तार गर्न तयार रहेको बताउनुभयो ।

चेम्बरका वरिष्ठ उपाध्यक्ष दीपककुमार मल्होत्राले वर्तमान विश्व प्रतिस्पर्धात्मक भएको उल्लेख गर्दै परम्परागत सोचबाट माथि उठ्दै नवप्रवर्तन, डिजिटल रूपान्तरण र दिगो विकासतर्फ उन्मुख हुनुपर्ने बताउनुभयो । उहाँले भन्नुभयो, ‘नयाँ पुस्तालाई उद्यमशीलतामा आकर्षित गर्न, स्टार्टअप संस्कृति विकास गर्न र प्रविधिमा आधारित व्यवसायलाई प्रोत्साहन गर्न सबै पक्षको सहकार्य आवश्यक छ । स्पष्ट कानुनी व्यवस्था, आधुनिक पूर्वाधार, सुलभ वित्तीय पहुँच र दक्ष जनशक्तिबिना दिगो आर्थिक वृद्धि सम्भव हुँदैन ।’ कार्यक्रममा नेपाल चेम्बर अफ कमर्सका सल्लाहकार परिषद् अध्यक्ष राजेशकाजी श्रेष्ठ, निवर्तमान अध्यक्ष राजेन्द्र मल्ल, नेपाल सरकारका उच्चपदस्थ पदाधिकारीहरू, विदेशी राजदूतहरू, चेम्बर पदाधिकारीलगायतको उपस्थिति रहेको थियो ।