न्यूयोर्क स्टेट एसेम्बली निर्वाचनमा सोमनाथको उम्मेदवारीले नेपाली समुदायमा उत्साह

काठमाडौं/न्यूयोर्क । अमेरिकाको न्यूयोर्क स्टेट एसेम्बली डिस्ट्रिक्ट ३० को आगामी निर्वाचनका लागि डेमोक्रेटिक प्राइमरीमा सोमनाथ घिमिरेले उम्मेदवारी घोषणा गरेसँगै अमेरिकामा बसोबास गर्ने नेपाली समुदायबीच उत्साह र चर्चा बढेको छ । ‘यो पटकको नेपाली, सधैंको नेपाली’ भन्ने नारा अहिले न्यूयोर्कका नेपालीबीच व्यापक रूपमा गुञ्जिन थालेको हो ।

करिब तीन दशकअघि नेपालबाट अमेरिका पुग्नुभएका घिमिरेले आफ्नो जीवनमा विभिन्न उतारचढाव पार गर्दै सामाजिक सेवा क्षेत्रमार्फत पहिचान बनाउनुभएको छ । पेशाले व्यवसायी रहनुभएका उहाँले विशेषगरी न्यूयोर्क सहरमा बसोबास गर्ने आप्रवासी समुदायलाई सहयोग प्रदान गर्दै आउनुभएको छ ।

घिमिरेले अमेरिकामा बसोवास गर्ने नेपालीहरूको हकहितका लागि निरन्तर काम गर्दै आउनुभएको छ । उहाँले मानवअधिकारलगायत विभिन्न क्षेत्रका सम्मान प्राप्त गर्नुभएको छ । साथै, उहाँले गिरिजाप्रसाद फाउण्डेशनको अमेरिकी च्याप्टरको अध्यक्षको रूपमा समेत नेतृत्वदायी भूमिका निर्वाह गर्नुभएको थियो ।

आफ्नो उम्मेदवारीबारे घिमिरे भन्नुभयो, ‘अमेरिकामा रहेका मध्यमवर्गीय नेपालीहरूको उत्थान, उनीहरूले भोगिरहेका समस्याको समाधान र समुदायको सशक्तीकरणका लागि मैले उम्मेदवारी दिएको हुँ ।’ उहाँ प्रजातान्त्रिक विचारधाराप्रति आस्था राख्ने बताउँदै अमेरिकी पूर्वराष्ट्रपति बाराक ओबामाको नेतृत्व र भाषणशैलीबाट प्रभावित भएको उल्लेख गर्नुहुन्छ ।

उहाँका अनुसार अमेरिका अवसरको देश भए पनि यहाँ राजनीतिक सहभागिता पनि उत्तिकै महत्त्वपूर्ण छ । ‘आर्थिक रूपमा स्थापित भएपछि समुदायका लागि राजनीतिक रूपमा पनि योगदान दिनुपर्छ भन्ने सोचले मलाई यहाँसम्म ल्याएको हो,’ उहाँले भन्नुभयो ।

ADVERTISEMENT

घिमिरेले आफ्नो जीवनको पहिलो दशक व्यक्तिगत स्थायित्वका लागि खर्चिएको र त्यसपछिका दुई दशक नेपाली समुदायको सेवामा समर्पित गरेको बताउनुहुन्छ । उहाँले  धेरै नेपालीलाई निःस्वार्थ सहयोग गरेको दाबी गर्नुहुन्छ ।

अमेरिकामा लोकतान्त्रिक अभ्यास सुदृढ भएकाले तल्लो तहबाट क्रमशः अघि बढेर राजनीतिमा स्थापित हुन सकिने उनको अनुभव छ । ‘साधारण नेपालीको छोरो भएर अमेरिकी राजनीतिमा यसरी अघि बढ्न सकिन्छ भन्ने पहिले कल्पना पनि गरेको थिइनँ,’ घिमिरेले भन्नुभयो, ‘तर समय, लगन र परिश्रमले सबै सम्भव बनाउँछ ।’

उहाँले अमेरिकामा रहेका नेपालीहरूको वास्तविकता बाहिर देखिएजस्तो सहज नभएको पनि बताउनुभयो । नयाँ पुस्ताले मार्गदर्शनको अभावमा चुनौती भोग्नुपरेको उल्लेख गर्दै उहाँले अब परिस्थिति सुधारतर्फ उन्मुख रहेको धारणा व्यक्त गर्नुभयो ।

न्यूयोर्कबाट पहिलोपटक नेपाली समुदायको प्रतिनिधित्व गर्दै उम्मेदवार बन्नुभएका घिमिरेले समुदायभित्र एकताको खाँचो औंल्याउनुभएको छ । ‘हामीबीच एकता भएन भने अन्य समुदायमा गलत सन्देश जान सक्छ,’ उहाँले भन्नुभयो । कलेज जीवनमा एक प्राध्यापकले नेपाललाई भारतको प्रान्त भनेको घटनाले आफूलाई गहिरो प्रभाव पारेको स्मरण गर्दै उहाँले त्यसको प्रतिवादका लागि विभिन्न सचेतनामूलक गतिविधि सञ्चालन गरेको बताउनुभयो ।

घिमिरेले निर्वाचित भएमा न्यूयोर्कमा रहेका नेपालीहरूको समस्यालाई सम्बोधन गर्न पहल गर्ने, आवश्यक विधेयक अघि बढाउने तथा समुदायको व्यवस्थित तथ्यांक संकलन गरी नीति निर्माणमा उपयोग गर्ने योजना रहेको बताउनुभयो । आगामी निर्वाचनमा आफूलाई नेपाली समुदायको बलियो साथ रहनेमा विश्वस्त रहेको उहाँले बताउनुभयो ।