काठमाडौं । उदयपुरकी स्रष्टा मालावती काफ्ले लाई ‘दमन्ता खनाल स्मृति नारी स्रष्टा सम्मान’ अर्पण गरिएको छ । नेपाल स्रष्टा समाजले हरेक वर्ष प्रदान गर्दै आएको उक्त सम्मान बुधबार काठमाडौंमा आयोजित समारोहबीच प्रदान गरिएको हो ।
कार्यक्रमका प्रमुख अतिथि भागिरथी श्रेष्ठ, पुरस्कार संस्थापकको तर्फबाट प्रतिनिधित्व गर्ने इन्द्रकुमारी खनाल, समाजका पूर्वअध्यक्ष विधान आचार्य तथा साहित्यिक पत्रकार संघका अध्यक्ष राधेश्याम लेकाली लगायतले काफ्लेलाई सम्मान अर्पण गर्नुभएको हो ।
ओझेलमा परेका नारी स्रष्टालाई प्रदान गरिँदै आएको यस सम्मानसँग नगद २० हजार १११ रुपैयाँ प्रदान गरिन्छ । सामाजिक अन्यायविरुद्ध आवाज उठाउँदै आउनुभएकी काफ्लेले झ्याउरे गीत र संगीतमार्फत सामाजिक रूपान्तरणको सन्देश दिँदै आउनुभएको छ । सम्मान ग्रहणपछि बोल्दै काफ्लेले महिलाहरूको शिक्षा र सशक्तीकरणका लागि आफू निरन्तर सक्रिय रहेको सुनाउनुभयो । ‘मैले पढ्न नपाए पनि अरूले पढ्न पाऊन् भन्ने चाहना छ,’ उहाँले भन्नुभयो । महिला समूह गठन गरी उनीहरूलाई शिक्षित र जागरूक बनाउने काममा लागेको उहाँले उल्लेख गर्नुभयो ।
कार्यक्रममा साहित्यकार विधान आचार्यले काफ्लेको योगदानमाथि चर्चा गर्दै उहाँलाई नारी सशक्तीकरणका क्षेत्रमा क्रियाशील स्रष्टाका रूपमा प्रस्तुत गर्नुभयो । त्यस्तै, राधेश्याम लेकालीले उपयुक्त स्रष्टालाई सम्मानका लागि छनोट गरिएको भन्दै समाजलाई धन्यवाद ज्ञापन गर्नुभयो ।
समाजकी पूर्वमहासचिव तथा गीतकार पुष्पा खनालले आफ्नी आमा दमन्ता खनालको स्मृतिमा २०७५ सालमा यो सम्मान स्थापना गर्नुभएको हो । स्वर्गीय आमाको जन्मदिनको अवसर पारेर यस वर्षको सम्मान प्रदान गरिएको जनाइएको छ ।
कार्यक्रममा पुष्पा खनालद्वारा रचित गजल ‘पिरतीको गीत’को लिरिकल भिडियो पनि सार्वजनिक गरिएको थियो । उक्त गजलमा गंगा सोनामको स्वर रहेको छ भने नरेन्द्र प्यासीले संगीत दिनुभएको छ । समारोहको समापन गर्दै समाजका महासचिव तथा सभाध्यक्ष प्रकाश घायलले काफ्लेलाई सम्मान गर्न पाउँदा संस्था स्वयं पनि सम्मानित भएको बताउनुभयो । समितिमा पुष्पा खनाल र रञ्जना निरौला सदस्य रहनुभएको थियो ।
यस सम्मानबाट हालसम्म सिर्जना शर्मा, इन्द्रा गहतराज, डिक्रा वादी, प्रतिमा पोख्रेल, निर्मला मुरारी, लता गिरी, यमुना पराजुली, लक्ष्मी तिवारी (तिवारी आमा)लगायतका स्रष्टाहरू सम्मानित भइसक्नु भएको छ । कार्यक्रममा समाजका सदस्य शंकर भारतीले स्वागत मन्तव्य राख्नुभएको थियो भने सहजिकरण माधव विडारी चेतनपथले गर्नुभएको थियो ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
समता शुल्क फिर्ता भएपछि निजी
वडाध्यक्ष सञ्जय पटेल पक्राउ
पूर्व महानिर्देशक प्रदीप अधिकारीविरुद्ध भ्रष्टाचार
गण्डकीमा ट्राफिक कारबाहीबाट डेढ करोडभन्दा
कीर्तिपुरमा कारभित्र जलेर मृत्यु हुने
बिजुलीमा लगाइएको मूल्य अभिवृद्धि कर