प्रारम्भिक प्रतिवेदनपछि १४ अर्ब ६३ करोड बढी बेरुजु असुल

हिमालय टाइम्स

Friday May 15, 2026

हिमालय टाइम्स

Friday May 15, 2026

Read Time = 3 mins

डिजिटल संस्करण

अर्थ ताजा समाचार

अर्थ/कर्पोरेट

A A- A+

काठमाडौं । लेखापरीक्षणको प्रारम्भिक प्रतिवेदन सम्बन्धित निकायमा पठाएपछि तथा विगतका बेरुजु सम्परीक्षण गर्दा कुल १४ अर्ब ६३ करोड २६ लाख ९९ हजार रुपैयाँ असुल भएको पाइएको छ ।

महालेखा परीक्षकको कार्यालय ले राष्ट्रपति रामचन्द्र पौडेलसमक्ष पेश गरेको ६३औँ वार्षिक प्रतिवेदनमा सो तथ्य उल्लेख गरिएको हो ।

प्रतिवेदनअनुसार उक्त असुलीमध्ये लेखापरीक्षणका क्रममा ५७ करोड ६९ लाख, प्रारम्भिक प्रतिवेदनपछि ९० करोड ४८ लाख तथा सम्परीक्षणका क्रममा १३ अर्ब १५ करोड १० लाख रुपैयाँ असुल गरिएको छ ।

आर्थिक वर्ष २०८१/८२ मा ७२१ स्थानीय तहको ११ खर्ब ९ अर्ब ५२ करोड ३८ लाख रुपैयाँ बराबरको लेखापरीक्षण गरिएकोमा १९ अर्ब ४ करोड ७४ लाख रुपैयाँ बेरुजु देखिएको छ ।

प्रतिवेदनअनुसार प्रदेशगत रूपमा सबैभन्दा धेरै बेरुजु मधेस प्रदेश मा देखिएको छ, जसको बेरुजु दर ३.७७ प्रतिशत रहेको छ ।

त्यस्तै, १५० कार्यालयको ४९ अर्ब ६९ करोड रुपैयाँको लेखापरीक्षण गर्दा १ अर्ब ८७ करोड रुपैयाँ बेरुजु देखिएको पनि प्रतिवेदनमा उल्लेख छ ।

सबैभन्दा कम बेरुजु बागमती प्रदेश मा देखिएको छ, जहाँ बेरुजु दर ०.८३ प्रतिशत मात्र रहेको छ । २०९ कार्यालयको ८३ अर्ब १५ करोड रुपैयाँको लेखापरीक्षणमा ६९ करोड ३७ लाख रुपैयाँ बेरुजु फेला परेको जनाइएको छ ।