घरेलु ट्रफीको ट्रेबल जित्ने ऐतिहासिक अभियानमा म्यानचेस्टर सिटी

लण्डन । विश्व फुटबलकै सबैभन्दा पुरानो नकआउट प्रतियोगिता एफए कपको १५५ वर्ष लामो इतिहासमा विरलै मात्र यस्ता खेलहरू भएका होलान्, जसको छिनोफानो यति साहसी र जादुमयी गोलबाट भएको होस् । शनिबार राती लण्डनको ऐतिहासिक वेम्बली स्टेडियममा खेलिएको फाइनल भिडन्तमा म्यानचेस्टर सिटीले चेल्सीलाई १-० ले पराजित गर्दै उपाधिमाथि कब्जा जमाएको हो । सिटीको कडा प्रतिस्पर्धात्मक जितमा स्ट्राइकर एन्टोइन सेमेन्योको एक अद्भूत र जादुमयी क्षण निर्णायक बन्यो, जसले खेलको इतिहासमै आफ्नो नाम स्वर्ण अक्षरमा लेखायो ।

रोमाञ्चकता र गोलका अवसरहरूका हिसाबले केही खल्लो देखिएको फाइनल खेललाई दोस्रो हाफमा सेमेन्योको एक उत्कृष्ट ब्याक-हिल (कुर्कुच्चाको) गोलले एकाएक जीवन्त बनाइदिएको थियो । खेलको ७२औँ मिनेटमा स्टार स्ट्राइकर एर्लिङ हालान्डले बक्सभित्र उपलब्ध गराएको क्रस बलमा दौडँदै घानाका अन्तर्राष्ट्रिय खेलाडी सेमेन्योले उत्कृष्ट शैलीमा आफ्नो कुर्कुच्चाले प्रहार गर्नुभयो । उक्त गज्जबको प्रहार चेल्सीका डाइभिङ गरिरहनुभएका गोलकिपर रोबर्ट सान्चेजलाई छक्काउँदै सोझै पोस्टको टाढाको कुनामा गएर जाली चुम्न पुगेको थियो ।

खेलपछि बिबिसीसँग कुरा गर्दै नायक सेमेन्योले आफूले प्रशिक्षणका क्रममा यस्तो प्रहार धेरै पटक अभ्यास गरेको र खेलको समयमा बल सोझै आफूतिर आएकाले तुरुन्तै सो निर्णय लिएको बताउनुभयो । यो आफ्नो करियरकै उत्कृष्टमध्येको एक अन्त्य भएको उहाँले स्वीकार गर्नुभयो । चेल्सीका अन्तरिम प्रशिक्षक क्यालम म्याकफार्लेनले पनि विपक्षी खेलाडीको प्रहारको तारिफ गर्दै यो १०० खेलमा एकपटकमात्र देखिने विरलै गोल भएको र यसलाई रोक्न रक्षापंक्तिले केही गर्न नसक्ने स्पष्ट पार्नुभयो ।

विजयसँगै पेप ग्वार्डिओलाको टोली म्यानचेस्टर सिटी यस सिजन घरेलु ट्रफीको ट्रेबल (तेहेरो उपाधि) जित्ने ऐतिहासिक अभियानमा दृढताका साथ अगाडि बढेको छ । सिटीले यसअघि नै यस सिजनको इङ्लिस लिग कप जितिसकेको छ भने प्रिमियर लिगमा पनि उपाधि होडमा कायम छ । लिगमा दुई चरणका खेलहरू बाँकी छँदा सिटी शीर्ष स्थानको आर्सनलभन्दा मात्र दुई अंकले पछाडि दोस्रो स्थानमा छ । आगामी मंगलबार बर्नमाउथविरुद्ध प्रिमियर लिगको निकै महत्त्वपूर्ण खेल खेल्नुपर्ने भएकाले प्रबन्धक ग्वार्डिओलाले आफ्ना खेलाडीहरूलाई अहिले नै धेरै उत्सव मनाउन नदिने र एउटा बियर पिउनसमेत छुट नहुने बताउनुभयो ।

यो उपाधि म्यानचेस्टर सिटीमा बिताएको १० वर्षको अवधिमा ग्वार्डिओलाको १७औँ प्रमुख ट्रफी हो भने उहाँको समग्र प्रशिक्षण करियरको ३५औँ ठूलो उपाधि हो । यस जितसँगै सिटीले आठौं पटक एफए कपको उपाधि आफ्नो पोल्टामा पारेको छ । योसँगै सिटी सर्वाधिक धेरै पटक एफए कप जित्ने टोलीहरूको सूचीमा चेल्सी, लिभरपुल र टोटनह्यामसँगै संयुक्त रूपमा तेस्रो स्थानमा उक्लन सफल भएको छ । खेलको इतिहासमा आर्सनलले कीर्तिमानी १४ पटक र म्यानचेस्टर युनाइटेडले १३ पटक यो उपाधि जितेका छन् ।

अर्कोतर्फ, यो हारसँगै चेल्सीको संकटग्रस्त सिजन ट्रफीविहीन बन्दै निराशाजनक रूपमा समाप्त भएको छ । एक वर्षअघिमात्र क्लब विश्वकप च्याम्पियनको ताज पहिरिएको चेल्सीका लागि यो सिजन निकै अशान्त रह्यो । वर्षको सुरुवातदेखि नै दुई जना मुख्य प्रशिक्षकलाई बर्खास्त गरेको चेल्सीले पूर्व युवा प्रशिक्षक क्यालम म्याकफार्लेनलाई अन्तरिम जिम्मेवारी सुम्पेको थियो, जसको पहिलो टोलीका रूपमा यो मात्र सातौं खेल थियो । मैदानभित्रको यो अशान्ति मैदानबाहिर पनि प्रष्ट देखिन्थ्यो, जहाँ खेल सुरु हुनुअघि चेल्सीका समर्थकहरूले रंगशालाबाहिर क्लबका अमेरिकी मालिकहरूविरुद्ध चर्को विरोध प्रदर्शन गरेका थिए । यस्तो कठिन परिस्थितिमा पनि युवा र नौसिखिया खेलाडीहरू बोकेर मैदान उत्रिएका म्याकफार्लेनले ग्वार्डिओलाजस्ता दिग्गज रणनीतिकारलाई ७२ मिनेटसम्म गोलरहित बराबरीमा रोकेर निराश पार्न सक्नुलाई धेरैले प्रशंसनीय मानेका छन् । तर, अन्ततः सेमेन्योको त्यो एक जादुमयी प्रहारले चेल्सीको सपना चकनाचुर पारिदियो । यो हारसँगै चेल्सीले आफ्ना पछिल्ला चारवटै एफए कप फाइनल हार्ने लेइस्टर सिटीको खराब कीर्तिमानको बराबरीसमेत गरेको छ । एजेन्सी