शिक्षा, संस्कार र सम्भावनाको केन्द्र : नेपाल काष्ठमण्डप एस एस कलेज

काठमाडौंको व्यस्त शहरभित्र पनि शान्त, सुरक्षित र अध्ययनमैत्री वातावरण खोज्ने विद्यार्थी तथा अभिभावकका लागि नेपाल काष्ठमण्डप एस एस कलेज आज एक विश्वासिलो शैक्षिक गन्तव्यका रूपमा स्थापित हुँदै गएको छ । शैक्षिक क्षेत्र, बैंकिङ तथा उद्योग क्षेत्रमा लामो अनुभव हासिल गरेका दक्ष व्यक्तिहरूको पहलमा स्थापना भएको यो संस्था केवल पाठ्यपुस्तकको ज्ञानमा सीमित छैन, बरू विद्यार्थीको बौद्धिक, नैतिक, सिर्जनात्मक तथा नेतृत्व क्षमताको विकासलाई आफ्नो मूल ध्येय मानेर अघि बढिरहेको छ ।

कलंकीस्थित सहज पहुँचयुक्त र शान्त वातावरणमा अवस्थित यो कलेजले विद्यार्थीलाई अध्ययनसँगै अनुशासन, आत्मविश्वास र जिम्मेवारीबोध सिकाउने वातावरण निर्माण गरेको छ । आधुनिक शिक्षण प्रणाली, अनुभवी शिक्षक, अनुसन्धानमुखी पद्धति तथा व्यावहारिक सिकाइमार्फत कलेजले छोटो समयमै उत्कृष्ट शैक्षिक संस्थाको पहिचान बनाएको छ ।

आधुनिक शिक्षा र व्यावहारिक सिकाइको संगम
कलेजले राष्ट्रिय परीक्षा बोर्ड (एनइबी) अन्तर्गत+२ तहका कार्यक्रम सञ्चालन गर्दै आएको छ भने त्रिभुवन युनिभर्सटी अन्तर्गत बिबिएस, बिसिए तथा एमबिएस कार्यक्रमसमेत सञ्चालन गरिरहेको छ । विज्ञान, व्यवस्थापन, सूचना प्रविधि, सामाजिक विज्ञान तथा मानविकी क्षेत्रलाई केन्द्रमा राख्दै भविष्यका डाक्टर, इन्जिनियर, व्यवसायी, उद्यमी, आईटी विज्ञ र नीति निर्माणकर्ता उत्पादन गर्ने लक्ष्य कलेजले लिएको छ ।

आजको प्रतिस्पर्धी युगमा केवल सैद्धान्तिक शिक्षा पर्याप्त नहुने भएकाले कलेजले व्यावहारिक सिकाइलाई विशेष प्राथमिकता दिएको छ । नियमित फिल्ड भिजिट, औद्योगिक भ्रमण, केस स्टडी, सेमिनार, कार्यशाला तथा समसामयिक विषयमा अतिथि व्याख्यानमार्फत विद्यार्थीलाई वास्तविक दुनियाँसँग परिचित गराइन्छ । यसले विद्यार्थीमा विश्लेषणात्मक सोच, नेतृत्व क्षमता र समस्या समाधान गर्ने दक्षता विकास गर्न मद्धत पुर्‍याएको छ ।

अन्तर्राष्ट्रिय अवसरतर्फ खुल्दै ढोका
नेपाल काष्ठमण्डप एस एस कलेजले अन्तर्राष्ट्रियस्तरको शिक्षालाई समेत प्राथमिकता दिएको छ । चीन, क्यानडा तथा दक्षिण कोरियाका विभिन्न शैक्षिक संस्थासँग गरिएको समझदारी (एमओयु)ले विद्यार्थीलाई विश्वस्तरीय अनुभव र अवसरसँग जोड्ने प्रयास गरिरहेको छ । विशेषगरी नम्बु युनिभर्सिटी लगायतका संस्थासँगको सहकार्यले विद्यार्थीको अन्तर्राष्ट्रिय एक्सपोजर बढाएको छ ।

विद्यार्थीलाई भाषा दक्षता र रोजगारीका अवसरसँग जोड्न अन्तर्राष्ट्रिय भाषा कक्षाहरू तथा जब पेलेसमेन्ट कार्यक्रम सञ्चालन गरिनु कलेजको अर्को विशेषता हो । बैंक, होटल तथा वित्तीय संस्थामा विशेष इन्टर्नशिपको व्यवस्था गरिएको छ, जसले विद्यार्थीलाई अध्ययनकै क्रममा पेशागत अनुभव प्राप्त गर्ने अवसर दिन्छ ।

सुरक्षित पूर्वाधार र प्रविधिमैत्री वातावरण
आधुनिक प्रविधिको प्रयोगलाई प्राथमिकतामा राख्दै कलेजले सिसीटिभीसहितका सुविधा सम्पन्न कक्षाकोठा, डिजिटल सिकाइ प्रणाली तथा आफ्नै मोबाइल एप सञ्चालनमा ल्याएको छ । भूकम्प प्रतिरोधी संरचना, खेलकुद तथा फुटसल सुविधा, अतिरिक्त क्रियाकलाप र व्यक्तित्व विकास कार्यक्रमले विद्यार्थीको सर्वांगीण विकासमा योगदान पुर्‍याइरहेको छ । ‘टपर्स अस च्वाइस’का रूपमा परिचित बन्दै गएको यो संस्थाले विद्यार्थी सन्तुष्टिलाई केन्द्रमा राखेर शिक्षण प्रणाली सञ्चालन गरिरहेको दाबी गर्छ ।

शिक्षा केवल अंकका लागि होइन : पेशल लुइँटेल, प्रिन्सिपल
कलेजका प्रिन्सिपल पेशल लुइँटेल शिक्षालाई केवल राम्रो अंक ल्याउने माध्यम नभई जीवन उपयोगी सीप सिक्ने प्रक्रिया मान्नुहुन्छ । ‘शिक्षा केवल राम्रो ग्रेड प्राप्त गर्ने विषयमात्र होइन, जीवनभर काम लाग्ने सीप आर्जन गर्ने माध्यम पनि हो’, उहाँ भन्नुहुन्छ ।
उहाँका अनुसार कलेजले विद्यार्थीलाई शैक्षिक उत्कृष्टतासँगै अनुशासन, सम्मान, सहानुभूति र जिम्मेवारीको भावना सिकाउने प्रयास गरिरहेको छ । विद्यार्थी, अभिभावक, शिक्षक र शुभेच्छुकहरूको विश्वास तथा साथले संस्थालाई निरन्तर अघि बढ्न प्रेरणा दिएको उहाँको भनाइ छ ।

गुणस्तरीय शिक्षातर्फ दृढ यात्रा
नेपालमा गुणस्तरीय, व्यावहारिक र अन्तर्राष्ट्रियस्तरको शिक्षा दिने संस्थाको आवश्यकता बढिरहेका बेला नेपाल काष्ठमण्डप एस एस कलेजले आफूलाई एक भरोसायोग्य शैक्षिक केन्द्रका रूपमा स्थापित गर्ने दिशामा निरन्तर यात्रा गरिरहेको देखिन्छ । आधुनिक सोच, अनुशासित वातावरण, दक्ष जनशक्ति र विद्यार्थीमैत्री प्रणालीका कारण यो संस्था आज धेरै विद्यार्थी तथा अभिभावकको रोजाइ बन्न थालेको छ । भविष्यका सक्षम नागरिक उत्पादन गर्ने लक्ष्यसहित अघि बढिरहेको यो संस्थाले नेपाली शिक्षाक्षेत्रमा सकारात्मक परिवर्तनको संकेत दिएको अनुभूति सहजै गर्न सकिन्छ ।