संगीतमार्फत विश्व शान्तिको सन्देश फैलाउने ‘महाअभियान’ आरम्भ

काठमाडौं । संगीतमार्फत विश्व शान्तिको सन्देश फैलाउने उद्देश्यसहित ‘विश्व शान्तिका लागि संगीत महाअभियान’ सुरु गरिएको छ । एभरेष्ट ग्यालरीको संयोजन तथा नेपाल टेलिकमको विशेष सहयोग र सहकार्यमा काठमाडौंमा आयोजित समारोहमा हुलाक सेवा विभागकी महानिर्देशक तथा सर्जक मनमाया पंगेनी भट्टराईको नयाँ गीत ‘लैजाचरी-शान्तिको धुन’को भिडियो सार्वजनिक गरिएको हो । गीतमा मनमाया पंगेनी र कमल सौरागको स्वर छ भने शब्द तथा संगीत मनमाया पंगेनीकै रहेको छ । गीतको संगीत संयोजन कमल सौरागले गर्नुभएको हो भने राजकुमार बगरले मिक्सिङ तथा माष्टरिङ गर्नुभएको छ ।

कार्यक्रमका प्रमुख अतिथि पूर्वअर्थमन्त्री तथा साहित्यकार एसपी कोइरालाले निजामती सेवामा कार्यरत व्यक्तिहरूलाई प्रायः ‘आत्मा नभएका’ मानिसका रूपमा हेर्ने प्रवृत्ति रहेको उल्लेख गर्दै त्यही सेवाभित्रबाट थुप्रै साहित्यकार, गीतकार र कविहरूले आफ्नो सिर्जनात्मक क्षमता प्रमाणित गरिरहेको बताउनुभयो । उहाँले गीतकी सर्जक मनमाया पंगेनी भट्टराई पनि त्यही परम्पराको एक सशक्त उदाहरण भएको बताउनुभयो । ‘मैले उहाँका गीत पहिले सर्जक को हुन् भन्ने थाहा नपाइ सुनेको थिए, गीत अत्यन्त मन छुने लागेका थिए,’ उहाँले भन्नुभयो, ‘पछि खोजेर हेर्दामात्रै मनमाया पंगेनीको सिर्जना रहेछ भन्ने थाहा पाए ।’ उहाँले नेपाल टेलिकमले संगीत क्षेत्रमा सहकार्य गरेकोमा खुशी व्यक्त गर्दै साहित्य र संगीतमा सरकारी सहभागिता न्यून रहेको अवस्थामा यस्तो सहकार्य सकारात्मक कदम भएको बताउनुभयो । यस्ता अभियानमा सार्वजनिक संस्थाहरूले आफ्नो सामाजिक उत्तरदायित्व (सीएसआर) अन्तर्गत लगानी गर्नुपर्ने उहाँको भनाइ थियो ।

कार्यक्रममा बोल्दै राष्ट्रिय योजना आयोगका सचिव रविलाल पन्थले गीतलाई उत्कृष्ट सिर्जना भन्दै प्रशंसा गर्नुभयो । उहाँले आफू पनि गीत लेखनमार्फत सृजनात्मक क्षेत्रमा जोडिने प्रयासमा रहेको बताउनुभयो । नेपाल टेलिकमकी निमित्त प्रबन्ध निर्देशक रिना डंगोलले यति अर्थपूर्ण सिर्जनामा सहकार्य गर्न पाएकोमा गर्व लागेको बताउनुभयो । विश्व शान्तिको सन्देश फैलाउने अभियानमा नेपाल टेलिकम सहभागी हुन पाएको उल्लेख गर्दै उहाँले गीतको भिडियोमार्फत नेपाल टेलिकम राष्ट्रिय तथा अन्तर्राष्ट्रिय संगीतप्रेमीसँग जोडिएकोमा खुशी व्यक्त गर्नुभयो ।

गीतकी सर्जक मनमाया पंगेनी भट्टराईले आफ्नो सिर्जनात्मक यात्रामा साथ र सहयोग गर्ने सबैप्रति आभार व्यक्त गर्नुभयो । समाज, देश र मानवीयतालाई केन्द्रमा राखेर संगीतमार्फत सकारात्मक सन्देश प्रवाह गर्ने प्रयास गर्दै आएको बताउँदै उहाँले शान्ति, सहअस्तित्व र मानवताको पक्षमा आफ्नो सिर्जना समर्पित रहेको धारणा राख्नुभयो ।

हुलाक सेवा विभागकी महानिर्देशक पंगेनी नेपाली संगीत क्षेत्रमा सामाजिक भावना, सांस्कृतिक मूल्य र चेतनालाई जोड्ने सर्जकका रूपमा परिचित हुनुहुन्छ । उहाँका यसअघि ‘सप्तरंगी फूल हौ तिमी’, ‘नारी शक्ति’ र ‘स्वर्ग जस्तो यो धर्तीलाई’ लगायतका गीत सार्वजनिक छन् । निजामती सेवामा उत्कृष्ट योगदान पुर्‍याएबापत एक लाख रुपैयाँ राशिसहितको सर्वोत्कृष्ट निजामती सेवा पुरस्कार प्राप्त गरिसकेकी पंगेनी प्रशासनिक नेतृत्वसँगै सिर्जनात्मक क्षेत्रमा पनि सक्रिय रहँदै आउनुभएको छ ।

कार्यक्रम संयोजक तथा एभरेष्ट ग्यालरीका संस्थापक अध्यक्ष सनम कठायतले संगीतमार्फत संसारलाई जोड्ने अभियानमा आफूहरू निरन्तर सक्रिय रहेको बताउनुभयो । उहाँले दुई वर्षअघि ‘दृश्यमा नेपाल’ अभियान सुरु गरिएको स्मरण गर्दै देशका अनुपम प्राकृतिक सौन्दर्य र सांस्कृतिक पहिचानलाई संगीतसँग जोडेर प्रस्तुत गरिएको बताउनुभयो ।

‘हामीले दुई वर्षअघि नेपालकै सुन्दर क्षेत्र खप्तडबाट ‘दृश्यमा नेपाल’ अभियान सुरु गरेका थियौं । संगीतभित्र देशका अनुपम तर पर्याप्त रूपमा समेटिन नसकेका प्राकृतिक सौन्दर्य र सांस्कृतिक सम्पदालाई प्रस्तुत गर्ने उद्देश्य थियो,’ उहाँले भन्नुभयो, ‘हामीले पूर्वदेखि पश्चिमसम्मका हिमाल, पहाड र तराईका दृश्यहरू विभिन्न सर्जकका गीतमार्फत दर्शकसामु पुर्‍यायौं । अहिले त्यसैको निरन्तरतास्वरूप विश्व शान्तिका लागि संगीत महाअभियान सुरु गरेका हौं ।’ एभरेष्ट ग्यालरीको अवधारणामा निर्माण गरिएको ‘लैजाचरी-शान्तिको धुन’ भिडियोमा नेपाल सरकार तथा सार्वजनिक सेवाका उच्च पदस्थ र सेवा निवृत्त व्यक्तित्वहरूको सहभागिता रहेको छ ।

भिडियोमा पूर्वअर्थमन्त्री तथा पूर्वसचिव शंकरप्रसाद कोइराला, पूर्वमुख्यसचिव लीलादेवी गड्तौला, नेपाल सरकारका सचिव रविलाल पन्थ, लक्ष्मी कुमारी बस्नेत, न्यायधीश श्रीधरा पुडासैनी, ⁠पूर्वमुख्यसचिव लीलादेवी गड्तौला, ⁠पूर्वसचिव केशवकुमार शर्मा, मधेशप्रदेश सचिव ⁠पार्वती शर्मा, सहसचिव ⁠हेमराज तामाङ, नेपाल टेलिकम निमित्त महाप्रबन्धक ⁠रिना डंगोल, प्रबन्धक ⁠डा.शालिग्राम पराजुली, सहसचिव ⁠इन्दु शर्मा, ⁠इन्दु घिमिरे, रेडियो नेपालका पूर्वप्रमुख प्रशासकीय अधिकृत विष्णुराम न्यौपाने, हुलाक सेवा विभागकी निर्देशक सपनाकुमारी भट्टराई, पूर्वएआईजी टेक तामाङ, पूर्वएआईजी माधवप्रसाद नेपाल, वरिष्ठ गीतकार–संगीतकार राजकुमार बगर तथा शिव भट्टराई, यसैगरी अनुजय भट्टराई, माधव पौडेल, निशा खड्कालगायतको उपस्थिति रहेको छ ।

भिडियोमा कलाकार सनम कठायत, अस्मिता खनाल तथा बालकलाकार अनुश्री भट्टराई र श्रीनिधि कठायतले अभिनय गर्नुभएको छ । कार्यक्रममा बाल कलाकार श्रीनिधि कठायतले बालगीत गाएर माहोललाई संगीतमय बनाउनुभएको थियो । कार्यक्रमको अध्यक्षता पूर्वडीआईजी तथा साहित्यकार महेशसिंह कठायतले गर्नुभएको थियो । एभरेष्ट ग्यालरीका निर्देशक तथा गीतकार डिबी खड्काले अनुसार आफूहरू सधैं ‘सार्थक-संगीत’ अभियानमा रहेको बताउनुभयो । ‘लैजाचरी-शान्तिको धुन’ केवल एउटा गीत वा भिडियोमात्र नभई संगीतमार्फत विश्व शान्ति, मानवता, सहअस्तित्व र सकारात्मक चेतनाको सन्देश फैलाउने दीर्घकालीन अभियानको प्रारम्भ हो,’ उहाँले कार्यक्रम सञ्चालनका क्रममा भन्नुभयो ।