बक्स अफिसमा ‘लालीबजार’को दबदबा

काठमाडौं । नेपाली चलचित्र बजारमा पछिल्लो समय प्रदर्शनरत चलचित्रहरूको व्यापारिक अवस्थाले उत्साहजनक र चुनौतीपूर्ण दुवै चित्र प्रस्तुत गरेको छ । चलचित्र विकास बोर्डले सार्वजनिक गरेको आधिकारिक बक्सअफिस विवरण अनुसार अभिनेत्री स्वस्तिमा खड्का अभिनित फिल्म ‘लालीबजार’ हाल प्रदर्शनरत नेपाली चचलचित्रमध्ये व्यापारमा अगाडि छ । चलचित्रले प्रदर्शनको तेस्रो सातासम्म आइपुग्दा करिब आठ करोड रुपैयाँ ग्रस कमाइ गर्दै घरेलु बक्सअफिसमा आफ्नो वर्चस्व कायम राखेको छ ।

बोर्डका अनुसार वैशाख २५ गतेदेखि प्रदर्शनमा आएको ‘लालीबजार’ले जेठ १६ गते (शनिबार) सम्म सात करोड ९० लाख ३१ हजार ४६७ रुपैयाँ ग्रस व्यापार गरेको छ । यो अवधिमा चलचित्रका दुई लाख ६९ हजार २०२ टिकट बिक्री भएका छन् । दर्शकको निरन्तर साथ र सकारात्मक ‘वर्ड अफ माउथ’का कारण चलचित्रको कमाइ अझै बढ्नसक्ने अनुमान गरिएको छ ।

‘लालीबजार’पछि सर्वाधिक कमाइ गर्ने चलचित्रको सूचीमा निर्देशक लक्ष्मण सुनारको ‘परालको आगो’ रहेको छ । गत वैशाख ११ गतेदेखि प्रदर्शनमा रहेको यस चलचित्रले चार करोड २७ लाख ८४ हजार ४४५ रुपैयाँ ग्रस कमाइ गरेको छ । चलचित्रका एक लाख ५४ हजार ३४ दर्शकले टिकट खरिद गरी हलमा पुगेका छन् । ग्रामीण परिवेश र सामाजिक कथावस्तु बोकेको यस चलचित्रले प्रदर्शनको सुरुदेखि नै स्थिर व्यापार गरिरहेको देखिन्छ ।

यता, जेठ ८ गतेबाट प्रदर्शनमा आएका दुई चलचित्रमध्ये ‘मितज्यू’ले अपेक्षाकृत राम्रो सुरुवात गरेको छ । नौ दिनको अवधिमा यसले एक करोड २० लाख ५९ हजार ८२ रुपैयाँ ग्रस कलेक्सन गरेको छ । चलचित्रका ४१ हजार २४८ टिकट बिक्री भएका छन् । छोटो समयमै करोडमाथिको व्यापार गर्न सफल भएकाले चलचित्रप्रति दर्शकको चासो सकारात्मक देखिएको विश्लेषण गरिएको छ ।

तर, सोही दिन रिलिज भएको चलचित्र ‘काजी’ भने व्यापारिक रूपमा कमजोर देखिएको छ । बोर्डको तथ्यांक अनुसार चलचित्रले हालसम्म ४० लाख ८८ हजार १७५ रुपैयाँमात्र कमाउन सकेको छ । यसको १३ हजार सात टिकट बिक्री भएका छन् । प्रदर्शनको प्रारम्भिक चरणमै व्यापार सुस्त रहँदा आगामी दिनमा चलचित्रले गति समात्नुपर्ने चुनौती देखिएको छ ।

वैशाख २५ गतेदेखि प्रदर्शनमा रहेको ‘मालती मंगले’ले पनि अपेक्षित व्यापार गर्न सकेको छैन । गायक रामकृष्ण ढकालको डेब्यु लगानी रहेको यस चलचित्रले हालसम्म ५१ लाख ७३ हजार ७९३ रुपैयाँ ग्रस कमाएको छ । फिल्म हेर्न १६ हजार १८८ दर्शक हल पुगेका छन् । समान मितिमा रिलिज भएको ‘लालीबजार’को तुलनामा यसको व्यापार निकै कम देखिएको छ ।

निर्देशक निमेष श्रेष्ठको ‘लाइफ ड्यामेज’ले पनि सन्तोषजनक व्यापार गर्न नसकेको देखिन्छ । जेठ १ गतेदेखि प्रदर्शनमा रहेको चलचित्रले हालसम्म ३३ लाख २६ हजार ३२० रुपैयाँ कमाएको छ । चलचित्रका १० हजार ८५५ टिकट बिक्री भएका छन् ।

चलचित्र विकास बोर्डका अनुसार ‘गुरुआमा’, ‘एक मुठ्ठी बादल’लगायत केही चलचित्र भने प्रदर्शन अवधि पूरा गरी हलबाट उत्रिसकेका छन् । यसले नेपाली बक्सअफिसमा नयाँ चलचित्रहरूको प्रतिस्पर्धा झन् तीव्र बन्दै गएको संकेत गर्दछ ।

यसैबीच, गत शुक्रबारदेखि प्रदर्शनमा आएका नयाँ चलचित्र ‘रोल नं.१’ र ‘कुम्भ’को व्यापारिक विवरण भने आगामी सोमबार सार्वजनिक हुने बोर्डले जनाएको छ । यी चलचित्रको प्रारम्भिक प्रतिक्रिया र दर्शक उपस्थितिले आगामी साताको बक्सअफिस प्रतिस्पर्धालाई थप रोचक बनाउने अपेक्षा गरिएको छ ।

चलचित्र विकास बोर्डले पछिल्ला महिनादेखि हरेक सोमबार आधिकारिक बक्सअफिस तथ्यांक सार्वजनिक गर्दै आएको छ । यसले नेपाली चलचित्र उद्योगमा व्यापारिक पारदर्शिता बढाउनुका साथै निर्मातादेखि दर्शकसम्मलाई वास्तविक व्यापारिक अवस्था बुझ्न सहयोग पुगेको सरोकारवालाहरू बताउँछन् ।

हालको तथ्यांकले नेपाली बक्सअफिसमा ‘लालीबजार’को प्रभाव स्पष्ट देखाएको छ भने अन्य चलचित्रहरू भने दर्शक तान्न संघर्षरत देखिएका छन् । आगामी साताहरूमा नयाँ रिलिज र विद्यमान चलचित्रहरूको स्थायित्वले नेपाली चलचित्र बजारको दिशा निर्धारण गर्नेछ ।