काठमाडौं । नेपाली कांग्रेसका नेता तथा पूर्वअर्थमन्त्री डा. प्रकाशशरण महतले सरकारले आगामी आर्थिक वर्षका लागि प्रस्तुत गरेको २१ खर्ब २४ अर्ब रुपैयाँको बजेट महत्वाकांक्षी भए पनि प्रभावकारी कार्यान्वयन सम्भव रहेको बताउनुभएको छ।
नेपाल उद्योग व्यापार महासंघले आयोजना गरेको कार्यक्रममा बोल्दै उहाँले राष्ट्रिय योजना आयोगले प्रस्ताव गरेको आकारभन्दा करिब डेढ खर्ब रुपैयाँ बढीको बजेट ल्याइएको उल्लेख गर्दै यसको सफल कार्यान्वयनका लागि स्रोत व्यवस्थापन स्पष्ट हुनुपर्ने बताउनुभयो।
उहाँले सरकारले प्राप्त गरेको जनादेश र राजनीतिक स्थिरताले बजेट कार्यान्वयनमा सकारात्मक भूमिका खेल्न सक्ने धारणा राख्नुभयो। “यति ठूलो आकारको बजेट प्रस्तुत गरिसकेपछि त्यसअनुसारको स्रोत पनि सुनिश्चित गर्नुपर्छ। राजस्व, वैदेशिक अनुदान, वैदेशिक ऋण तथा आन्तरिक ऋणमार्फत स्रोत जुटाउन सकिन्छ,” उहाँले भन्नुभयो।
महतले बैंकिङ क्षेत्रमा पर्याप्त तरलता रहेकाले तत्काल आन्तरिक ऋण व्यवस्थापनमा समस्या नदेखिए पनि साधारण तथा पुँजीगत खर्च दुवैका लागि आन्तरिक ऋणमा बढ्दो निर्भरता दीर्घकालीन रूपमा चुनौतीपूर्ण हुन सक्ने चेतावनी दिनुभयो। वैदेशिक सहायता र ऋण अपेक्षित रूपमा प्राप्त नभए बजेट कार्यान्वयनमा कठिनाइ आउन सक्ने उहाँको भनाइ थियो।
सरकारले आगामी आर्थिक वर्षका लागि राखेको ७ प्रतिशत आर्थिक वृद्धिदरको लक्ष्यबारे बोल्दै उहाँले निजी क्षेत्रको सक्रिय परिचालन र पुँजीगत खर्चको प्रभावकारी कार्यान्वयन भए उक्त लक्ष्य हासिल गर्न सकिने बताउनुभयो। बजेटमा समावेश नीतिगत व्यवस्थाले निजी क्षेत्रलाई लगानी विस्तारका लागि प्रोत्साहन गर्ने उहाँको विश्वास छ।
मुद्रास्फीति हाल नियन्त्रणको दायराभित्र रहेकाले मूल्यवृद्धिसम्बन्धी लक्ष्य पनि हासिल हुने सम्भावना रहेको उहाँले उल्लेख गर्नुभयो। समग्र आर्थिक सूचकहरू हेर्दा बजेटले विगतका आर्थिक नीतिको निरन्तरता दिएको उहाँको निष्कर्ष थियो।
उहाँले नेपालको आर्थिक विकासमा निजी क्षेत्रलाई प्रमुख चालक शक्तिका रूपमा व्याख्या गर्दै २०४६ सालपछि अवलम्बन गरिएका उदार आर्थिक नीतिका कारण निजी तथा वित्तीय क्षेत्र विस्तार भएको बताउनुभयो। त्यसबाट राजस्वको दायरा बढ्नुका साथै शिक्षा, स्वास्थ्य, सामाजिक सुरक्षा तथा विकास खर्चलाई देशभर विस्तार गर्न सहयोग पुगेको उहाँको भनाइ थियो।
महतले बजेटले ठूलो नीतिगत परिवर्तनभन्दा निरन्तरतामा जोड दिएको उल्लेख गर्दै सामाजिक सुरक्षा, सामाजिक कल्याण र आर्थिक वृद्धिबीच सन्तुलन कायम गर्ने प्रयास गरिएको बताउनुभयो। साथै लगानी, उत्पादन र रोजगारी विस्तारमार्फत सबै वर्ग र समुदायको जीवनस्तर उकास्ने उद्देश्य बजेटमा समेटिएको उहाँले बताउनुभयो।
उहाँका अनुसार मध्यम आय, निम्न मध्यम आय तथा न्यून आय भएका वर्गलाई राहत दिने प्रयास बजेटमा देखिन्छ। उत्पादन, लगानी र रोजगारी वृद्धिमार्फत समग्र अर्थतन्त्रलाई चलायमान बनाउने लक्ष्य बजेटले लिएको उहाँको धारणा थियो।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
निजामती सेवामा व्यापक पुनःसंरचनाको तयारी
धान बालीमा कृषि यान्त्रीकरण :
मध्यपूर्वको अवस्था सहज भएसँगै पेट्रोलियम
मुगुमा जातीय विभेद अन्त्यका लागि
श्रीमान् हत्या आरोपमा श्रीमतीसहित छोरा
केटाकेटी आए गुलेली खेलाए…