फिफा विश्वकपकाे उद्घाटन खेलमै बने यस्ता राेचक कीर्तिमान

काठमाडौं । फिफा विश्वकप–२०२६ को उद्घाटन खेल तुलनात्मक रूपमा तनावपूर्ण रहँदा आयोजक मेक्सिकोले उत्कृष्ट सुरुआत गरेको छ । मेक्सिको सिटीस्थित ऐतिहासिक एस्टेडियो एस्टेकामा भएको खेलमा दक्षिण अफ्रिकालाई २–० गोल अन्तरले पराजित गर्दै मेक्सिकोले समूह ‘ए’ मा ३ अंक जोड्न सफल भएको हो ।

यो खेल केवल अंकका हिसाबले मात्र होइन, विश्वकप इतिहासका थुप्रै दुर्लभ कीर्तिमानहरूको साक्षीसमेत बनेको छ ।

उद्घाटन खेलमै जुलियन किन्योनेसले नवौँ मिनेटमा गोल गर्दै विश्वकप–२०२६ को पहिलो गोलकर्ता बन्नुभएको छ । उहाँले उद्घाटन खेलमा दोस्रो छिटो गोल गर्ने खेलाडीको कीर्तिमानसमेत बनाउनुभएको छ । यसअघि उद्घाटन खेलमा सबैभन्दा छिटो गोल गर्ने कीर्तिमान जर्मनीका फिलिप लाहमको नाममा रहेको छ, जसले सन् २००६ को विश्वकप उद्घाटन खेलमा छैटौँ मिनेटमै गोल गर्नुभएको थियो ।

उक्त खेलको सबैभन्दा चर्चित पक्ष भने रातो कार्डको घटनाक्रम रह्यो । कुल तीन खेलाडीले रातो कार्ड पाएका थिए । दक्षिण अफ्रिकाका स्पेफेलो सिथोले र थेम्बा ज्वाने तथा मेक्सिकोका सेजार मोन्टेस मैदानबाट बाहिरिनुभएको थियो । विश्वकप उद्घाटन खेलमा तीन रातो कार्ड देखाइएको यो पहिलो घटना मानिएको छ ।

यसअघि कतार विश्वकप–२०२२ का ६४ खेलमा जम्मा चार वटा मात्र रातो कार्ड देखाइएको थियो । तर २०२६ संस्करणको पहिलो खेलमै तीन रातो कार्ड देखिएपछि प्रतियोगिता सुरुवातदेखि नै विवाद र चर्चामा आएको छ ।

त्यस्तै, एकै खेलमा तीन रातो कार्ड देखिएको घटना करिब दुई दशकपछि पुनः दोहोरिएको हो । यसअघि सन् २००६ को विश्वकपमा पनि एकै खेलमा तीन खेलाडीले रातो कार्ड पाएका थिए । साथै, नेदरल्यान्ड्स र पोर्चुगलबीचको अन्तिम–१६ खेलमा चार रातो कार्ड र १६ पहेँलो कार्ड देखाइएको थियो, जुन विश्वकप इतिहासकै सबैभन्दा कडा खेलहरूमध्ये एक मानिन्छ ।

मेक्सिकोको यो जितसँगै ४८ टोली र १०४ खेल समावेश रहेको विश्वकप इतिहासकै सबैभन्दा ठूलो संस्करणको औपचारिक सुरुआत पनि भव्य बनेको छ । उद्घाटन समारोहमा विश्वप्रसिद्ध गायिका शाकिराले आफ्नो नयाँ गीत ‘दाइ दाइ’ प्रस्तुत गर्दै रंगशालाको माहोललाई थप रोमाञ्चक बनाउनुभएको थियो । उहाँ फरक चार विश्वकपमा प्रस्तुति दिने पहिलो कलाकार बन्नुभएको छ ।

मेक्सिको सिटीस्थित एस्टेडियो एस्टेकाले पनि ऐतिहासिक कीर्तिमान कायम गरेको छ । यो रंगशालाले १९७०, १९८६ र २०२६ गरी तीन फरक विश्वकप संस्करण आयोजना गर्ने विश्वकै पहिलो रंगशाला बन्न सफल भएको छ । साथै, तीन संस्करणमा गरी २० वटा विश्वकप खेल आयोजना गर्ने कीर्तिमान पनि यसकै नाममा रहेको छ । मेक्सिको यस मैदानमा विश्वकप खेलमा अपराजित रहँदै आएको ऐतिहासिक रेकर्डसमेत कायम राख्न सफल भएको छ ।

उक्त खेलमा मेक्सिकोका युवा खेलाडी गिल्बर्टो मोरा दोस्रो हाफमा मैदान प्रवेश गर्दै १७ वर्ष २४० दिनको उमेरमा विश्वकपमा डेब्यु गर्नुभएको छ । उहाँ मेक्सिकोको प्रतिनिधित्व गर्ने सबैभन्दा कान्छा खेलाडीसमेत बन्नुभएको छ ।

त्यस्तै, दोस्रो गोलकर्ता राउल जिमेनेजले मेक्सिकोका लागि आफ्नो गोल संख्या ४६ पुर्‍याउनुभएको छ । उहाँ जारेड बोर्गेटीसँग संयुक्त रूपमा दोस्रो स्थानमा उक्लिनुभएको छ भने शीर्ष स्थानमा रहेका ज्याभियर ‘चिचारितो’ हर्नान्डेज (५२ गोल) भन्दा मात्र ६ गोलले पछि हुनुहुन्छ ।

यस जितसँगै मेक्सिकोले अफ्रिकी राष्ट्रहरूविरुद्ध आफ्नो अपराजित यात्रा २२ खेलसम्म विस्तार गरेको छ । अन्तिम पटक सन् २००५ मा अफ्रिकी टोलीसँग पराजित भएको मेक्सिको त्यसयता अपराजित रहेको छ ।

यस्तै, मेक्सिकोले विश्वकप इतिहासमा उद्घाटन खेल जित्न नसकेको ९६ वर्षे ‘श्राप’ पनि अन्त्य गरेको छ । यसअघि आठ पटक उद्घाटन खेल खेलेको मेक्सिकोले पाँच हार र दुई बराबरी बेहोरेको थियो । तर यसपटक घरेलु मैदानमा दक्षिण अफ्रिकालाई २–० ले पराजित गर्दै उसले इतिहास बदल्न सफल भएको छ ।