काठमाडौं । षट्कोण आर्ट्सको ब्यानरमा निर्मित चलचित्र ‘लालीबजार’ को विदेश प्रदर्शन यही असार ५ गतेदेखि डेनमार्कबाट सुरु हुनेभएको छ । निर्माता म्याक्स दिपेश खत्रीले जारी गरेको विज्ञप्तिमार्फत चलचित्र असार ५, ६ र ७ गते डेनमार्कको कोपनहेगनमा प्रदर्शन गरिने जानकारी दिनुभएको हो ।
निर्माता खत्रीका अनुसार नेपालमा दर्शकबाट सकारात्मक प्रतिक्रिया प्राप्त गरेपछि विदेश प्रदर्शनको तयारी अघि बढाइएको हो । उहाँले युरोपबाट विदेश टुर सुरु गर्न लागिएको उल्लेख गर्दै अन्य देशमा समेत चाँडै प्रदर्शन तालिका सार्वजनिक गरिने बताउनुभयो ।
नेपालमा भने यो चलचित्र हाल छैटौं सातासम्म प्रदर्शनरत छ । शिक्षाको ज्योतिले समाजमा पार्ने प्रभावलाई मुख्य विषयवस्तु बनाइएको यस चलचित्रलाई दर्शकले रुचाएको निर्माता खत्रीको दाबी छ । यसअघि प्रदर्शनका क्रममा उत्पन्न कानुनी विवादका कारण चलचित्रको विदेश प्रदर्शन प्रभावित बनेको थियो । कानुनी प्रक्रिया टुंगिएसँगै अब विदेश प्रदर्शनलाई तीव्रता दिइएको जनाइएको छ ।
‘लालीबजार’ छैटौं र ‘रोल नं १’ तेस्रो सातामा
नेपाली चलचित्र बजारमा शैक्षिक र सामाजिक विषयवस्तुमा आधारित दुई फिल्मले बक्स अफिसमा बलियो उपस्थिति जनाएका छन् । गत वैशाख २५ गतेदेखि प्रदर्शनमा आएको चलचित्र ‘लालीबजार’ शुक्रबारदेखि प्रदर्शनको छैटांँ सातामा प्रवेश गरेको छ । नयाँवर्ष विसं २०८३ सुरु भएयता प्रदर्शनमा आएका चलचित्रहरूमध्ये व्यावसायिक र समीक्षात्मक दुवै हिसाबले ‘लालीबजार’ सबैभन्दा अगाडि देखिएको छ । यस चलचित्रले घरेलु बजारमा मात्रै नौ करोड रुपैयाँभन्दा बढीको ग्रस कलेक्सन गरिसकेको छ ।
यम थापाको कथा तथा निर्देशन रहेको यस चलचित्रमा स्वस्तिमा खड्का, रवीन्द्रसिंह बानियाँ, समाइरा थापा, मुकुन्दकुमार श्रेष्ठलगायत कलाकारको अभिनय छ भने विशाल देवकोटा र प्रसंशा सुवेदीले यसै चलचित्रबाट डेब्यु गर्नुभएको छ ।
यसैगरी, बालबालिका र शैक्षिक प्रणालीकै विषयमा बनेको अर्को चलचित्र ‘रोल नं १’ पनि शुक्रबारदेखि प्रदर्शनको तेस्रो सातामा प्रवेश गरेको छ । सुखद् माउथ पब्लिसिटीका कारण बलियो बन्दै गएको यस चलचित्रले दोस्रो साताको अन्त्यसम्ममा करिब एक करोड रुपैयाँको व्यवसाय गरिसकेको छ । सन्तानको खुसी र उज्ज्वल भविष्यका लागि आमाबुबाले गर्ने त्याग र संघर्षको कथा यसमा बुनिएको छ । यसका साथै विद्यमान शैक्षिक प्रणालीले बालमनोविज्ञानमा पार्ने नकारात्मक प्रभाव र त्यसले एउटा बच्चाको समग्र जिन्दगीमा निम्त्याउने असरलाई चलचित्रले गम्भीरताका साथ उठाएको छ ।
चलचित्रका निर्माता विनोद पौडेलले हलमा पुगेका दर्शकहरूबाट निकै सकारात्मक प्रतिक्रिया पाइरहेको र सोही कारण दोस्रो सातामा दर्शकको संख्या अझ बढेको बताउनुभयो । विनोद पौडेल र जान्वी पौडेलले निर्माण गरेको यस चलचित्रमा मुकुन भुसाल, सुशांक मैनाली, रेणु योगी र सिर्जना अधिकारी मुख्य भूमिकामा हुनुहुन्छ भने बालकलाकारहरू निर्भिक रेग्मी, रिन्चेन लामा, संयम कटुवाल र सिजल श्रेष्ठको अभिनय छ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
निजामती सेवामा व्यापक पुनःसंरचनाको तयारी
धान बालीमा कृषि यान्त्रीकरण :
मध्यपूर्वको अवस्था सहज भएसँगै पेट्रोलियम
मुगुमा जातीय विभेद अन्त्यका लागि
श्रीमान् हत्या आरोपमा श्रीमतीसहित छोरा
केटाकेटी आए गुलेली खेलाए…