सगेन्द्र सिंहलाई ‘मिस्टर महानगर’को उपाधि

काठमाडौं । काठमाडौं महानगरपालिका-२२ को आयोजनामा सम्पन्न दोस्रो ‘मिस्टर महानगर’ शारीरिक सुगठन प्रतियोगिताको ओभरअल उपाधि डिभाइन फिटनेसका सगेन्द्र सिंहले जित्नुभएको छ । राष्ट्रिय सभागृहमा सम्पन्न प्रतियोगितामा विभिन्न तौल समूहका विजेताबीच भएको अल-ओभर च्याम्पियनसिपमा उत्कृष्ट प्रदर्शन गर्दै उहाँले ‘मिस्टर महानगर’को उपाधि हात पार्नुभएको हो ।

७५ केजीभन्दा माथिको तौलसमूहमा समेत विजेता बन्नुभएका सगेन्द्रले ओभरअल उपाधिसहित पाँच लाख रुपैयाँ नगद, ट्रफी, मेडल र प्रमाणपत्र प्राप्त गर्नुभयो । तौल समूहमा प्रथम बनेबापत उहाँले थप एक लाख रुपैयाँ पनि जित्नुभयो ।

प्रतियोगिताको ५५ केजी तौल समूहमा जिम तारका सविन चौलागाईं प्रथम हुनुभयो । फिटनेस ग्यारेजका सुनील आले दोस्रो, कम्फोर्ट जिमका महेन्द्र थापा मगर तेस्रो, द जिमका दिनेश विक चौथो तथा फिटनेस ग्यारेजका सरोज कँडेल पाँचौँ स्थानमा रहनुभयो । ६० केजी समूहमा फिट एक्स जिमका अमृत गहतराज च्याम्पियन बन्नुभयो । फिटनेस ग्यारेजका सौरभ थापा मगर दोस्रो, द आइरन जिमका टेकबहादुर तामाङ तेस्रो, रोयल जिमका याकुब तोलांगी चौथो र जिम कपनका सन्दीप अर्याल पाँचौँ हुनुभयो ।

६५ केजीमा फिटनेस ग्यारेजका नवराज डुम्रे विजेता बन्नुभयो । जेन एक्सका रोहन राई दोस्रो, वेभ फिटनेसका सन्दीप पुजारी तेस्रो, प्लाटिनम फिजिकल फिटनेसका प्रभाकर घिमिरे चौथो तथा फिटनेस ग्यारेजका खेमराज गिरी पाँचौँ स्थानमा रहनुभयो । ७० केजीमा फिटनेस ग्यारेजका माधव सुवेदी प्रथम हुनुभयो । आरबिएल फिटनेसका अनिश रसाइली दोस्रो, पावर फिटनेसका सोबेन थापा तेस्रो, रिभर फिल्ड जिमका रकी डंगोल चौथो र फिटनेस ग्यारेजका प्रतीक चौधरी पाँचौँ हुनुभयो ।

७५ केजी तौल समूहमा नेपाल व्यायाम मन्दिरका क्षितिज थापा च्याम्पियन बन्नुभयो । पावर फिजिकलका सागर श्रेष्ठ दोस्रो, योगेन्द्र श्रेष्ठ तेस्रो, फिटनेस वर्ल्डका सागर बोम्जन चौथो तथा फिटनेसनका प्रोग्रेस कारञ्जित पाँचौँ हुनुभयो । ७५ केजीभन्दा माथिको समूहमा सगेन्द्र सिंहले उपाधि जित्दा फिटनेस मन्त्रका सुरज डंगोल दोस्रो, स्याडो फिटनेसका रामशरण महर्जन तेस्रो, प्लाटिनमका विनोद सुनार चौथो र फिट एक्सका कुशलप्रसाद गुरुङ पाँचौँ स्थानमा रहनुभयो ।

तौल समूहतर्फ प्रथमदेखि पाँचौँ हुने खेलाडीले क्रमशः एक लाख, ५० हजार, २५ हजार, १५ हजार र १० हजार रुपैयाँ नगद पुरस्कार प्राप्त गरेका थिए ।

प्रतियोगिताअन्तर्गत स्पोर्ट्स फिजिक्सतर्फ महिला र पुरुष दुवै समूहमा प्रतिस्पर्धा भएको थियो । महिलातर्फ एनआरके फिटनेसकी सीता खत्री प्रथम, नयाँबजार डिभाइनकी शान्ता पालिखे दोस्रो र त्रिभुवन आर्मी क्लबकी तिल्सरा बुढाथोकी तेस्रो हुनुभयो । फिटनेस ग्यारेजकी रुविना कुँवर चौथो तथा जेन एक्सकी रेखा पुन मगर पाँचौँ स्थानमा रहनुभयो ।

पुरुष स्पोर्ट्स फिजिक्स (१७० सेमि मुनि) तर्फ पावर फिजिकलका आकाश श्रेष्ठ प्रथम हुनुभयो । आइरन पाराडाइजका ज्ञानेश्वर चौधरी दोस्रो, फिटनेस मन्त्रका अजयकुमार शाक्य तेस्रो, फिट एक्सका रेशम राना चौथो तथा वेभ फिटनेसका रोनित राई पाँचौँ हुनुभयो । १७० सेमिभन्दा माथिको समूहमा नयाँबजार डिभाइनका पुकार श्रेष्ठ विजेता बन्नुभयो । द आइरनका सुमन कार्की दोस्रो, एनआरकेका रमन तुलाधर तेस्रो, जेन एक्सका विजय लिम्बू चौथो र अनलिमिटेड लिफ्टिङका सचित खड्का पाँचौँ हुनुभयो ।

स्पोर्ट्स फिजिक्सतर्फ प्रथमदेखि पाँचौँ स्थान हासिल गर्ने खेलाडीले क्रमशः एक लाख २५ हजार, ७५ हजार, ५० हजार, २५ हजार र १० हजार रुपैयाँ नगद पुरस्कार प्राप्त गरेका थिए । काठमाडौं महानगरपालिकाकी कार्यवाहक मेयर सुनिता डंगोल तथा वडा नं. २२ का अध्यक्ष चिनिकाजी महर्जनले ओभरअल विजेताहरूलाई नगद, ट्रफी र प्रमाणपत्र प्रदान गर्नुभएको थियो ।