सम्पत्ति शुद्धीकरण मुद्दामा एमाले उपाध्यक्ष एवं पूर्वअर्थमन्त्री विष्णु पौडेल पक्राउ

काठमाडौं । नेकपा (एमाले) का उपाध्यक्ष एवं पूर्व–अर्थमन्त्री विष्णु पौडेल पक्राउ पर्नुभएको छ । सम्पत्ति शुद्धीकरण मुद्दामा सुर्खेत प्रहरीले सोमबार अपराह्न पौडेललाई पक्राउ गरेको हो । एमालेको चुनावी समीक्षा एवं पुनर्गठन कार्यदलका सदस्य पौडेल सुझाव संकलनका क्रममा सुर्खेत पुग्नुभएको थियो । यसअघि कार्यदलले कोशी, लुम्बिनी र सुदूरपश्चिम प्रदेशमा सुझाव संकलन तथा भेला गरेको थियो । त्यसपछि उहाँ कार्यदलको टोलीसँगै सुर्खेत पुग्नुभएको थियो ।

वीरेन्द्रनगर नगरपालिका वडा नम्बर ३ ऐरीचोकस्थित शुभ होटलको सभाहलमा एमालेको निर्वाचन समीक्षा तथा पार्टी पुनर्गठनसम्बन्धी सुझाव संकलन कार्यक्रम चलिरहेको थियो । सोही कार्यक्रमस्थलबाटै उपाध्यक्ष पौडेललाई प्रहरीले पक्राउ गरेको हो । जिल्ला प्रहरी कार्यालय सुर्खेतका प्रहरी उपरीक्षक ठाकुरप्रसाद पौडेलको कमाण्डमा खटिएको १० जनाको विशेष प्रहरी टोलीले उहाँलाई नियन्त्रणमा लिएको जिल्ला प्रहरी कार्यालय सुर्खेतले जनाएको छ । पौडेललाई पक्राउ गरेर थप अनुसन्धान अघि बढाइएको प्रहरी स्रोतले बताएको छ ।

उपाध्यक्ष पौडेललाई सोमबार नेपालगञ्जस्थित प्रहरीको कर्णाली प्रदेश तालिम केन्द्रमा राखिएको थियो । नेपालगञ्ज विमानस्थलमा राति पार्किङ हुने र आज (मंगलबार) बिहान पहिलो उडान गर्ने जहाजमा उहाँलाई काठमाडौं ल्याउने तयारी छ ।

सम्पत्ति शुद्धिकरण अनुसन्धान विभाग सम्बद्ध स्रोतका अनुसार, पौडेलमाथि राज्यसंयन्त्रमा रहँदा विभिन्न व्यापारिक र स्वार्थ समूहको हित हुनेगरी काम गरेको र त्यसपछि विभिन्न ढंगलबाट लाभ लिएको आरोप छ । बिचौलिया दीपक भट्टसँगको गैरकानुनी कारोबार पनि उहाँसँग जोडिएको छ ।

भट्टको नाममा पौडेलले करिब ३० करोड रुपैयाँको सेयर लिएको स्रोतको दाबी छ । प्रहरी र सम्पत्ति शुद्धीकरण अनुसन्धान विभागले भट्टविरुद्ध हालै चारवटा मुद्दा दायर गरेका छन् । भट्टको कारोबारमाथि थप अनुसन्धान चलिरहँदा सम्बन्ध देखिएका व्यक्ति समेतको पहिचान गरिएका छन् । त्यसक्रममा पौडेलसमेत देखिएपछि उहाँलाई पक्राउ गरिएको हो । पौडेल हाल बसिरहेको काठमाडौं भैँसेपाटीस्थित निवासमा पनि सम्पत्ति शुद्धीकरण विभागको टोलीले छापा मारेर केही कागजात नियन्त्रणमा लिएको छ । पौडेललाई काठमाडौं ल्याएर हिरासतमा राखिने र मंगलबार म्याद थपका लागि विशेष अदालतमा पेश गरिने विभागले जनाएको छ ।

पौडेलको पक्राउपछि एमाले नेताहरू आक्रोशित
यसैबीच, नेकपा (एमाले) का नेता प्रदीप ज्ञवालीले राज्यका निकायहरूले अनुसन्धान र न्याय सम्पादनका क्रममा स्थापित कानुनी प्रक्रियाको पालना गर्नुपर्ने बताउनुभएको छ । उपाध्यक्ष विष्णु पौडेलको पक्राउपछि प्रतिक्रिया दिँदै उहाँले पहिले निष्पक्ष र गहिरो अनुसन्धान सम्पन्न गरेर आवश्यक आधार जुटाएपछि मात्र पक्राउको प्रक्रिया अघि बढाउनुपर्ने धारणा व्यक्त गर्नुभएको हो ।

ज्ञवालीले सामाजिक सञ्जालमार्फत् सार्वजनिक गरेको प्रतिक्रियामा नेकपा (एमाले) को स्थापित मान्यता संवैधानिक र कानुनी अधिकारप्राप्त निकायले गर्ने अनुसन्धानमा सहयोग गर्ने, आफूमाथि उठेका प्रश्नहरूको कानुनी रूपमा सामना गर्ने तथा अदालतको निर्णयलाई सहज रूपमा स्वीकार गर्ने रहेको उल्लेख गर्नुभएको छ ।

उहाँले अनुसन्धान र न्याय निरूपणको स्थापित विधिअनुसार पहिले निष्पक्ष र गहिरो अनुसन्धान हुने, त्यसपछि अभियोजन र अदालतको प्रक्रियाबाट अगाडि बढ्ने तथा अत्यावश्यक अवस्थामा मात्रै नियन्त्रणमा लिने अभ्यास हुनुपर्ने बताउनुभएको छ । तर, व्यवहारमा भने पहिले पक्राउ गर्ने र त्यसपछि अनुसन्धान सुरु गर्ने प्रवृत्ति लामो समयदेखि देखिएको उहाँको टिप्पणी छ । ज्ञवालीले राज्यका निकायहरूको निर्णय कुनै पनि हालतमा पूर्वाग्रह, प्रतिशोध वा राजनीतिक आग्रहबाट प्रभावित हुन नहुनेमा जोड दिनुभएको छ ।

यता, एमाले सचिव महेश बस्नेतले पार्टी उपाध्यक्ष विष्णु पौडेल पक्राउ परेको घटनामा प्रतिवाद गर्न आह्वान गर्नुभएको छ । सामाजिक सञ्जालमा वक्तव्य जारी गर्दै बस्नेतले एमाले पंक्तिले यो घटना केवल एउटा व्यक्तिसँग सम्बन्धित घटनाका रूपमा नभई लोकतान्त्रिक अधिकार, राजनीतिक स्वतन्त्रता र विधिको शासनसँग जोडिएको विषयका रूपमा बुझ्न आवश्यक रहेको बताउनुभएको हो । उहाँ लेख्नुहुन्छ, ‘कुखुरा मर्‍यो’ भन्दा पनि ‘स्याल पल्कियो’ भन्ने चेतका साथ यस्ता प्रवृत्तिको प्रतिवाद गर्नुपर्छ, किनकि आज एक व्यक्तिमाथि भएको अन्याय भोलि समग्र राजनीतिक प्रणालीमाथिको आक्रमण बन्न सक्छ ।’