अपहरित लोकतन्त्र फर्काउन संयुक्त संघर्ष आवश्यक : ओली

काठमाडौं । नेपाल कम्युनिष्ट पार्टी (एमाले)का अध्यक्ष एवं पूर्वप्रधानमन्त्री केपी शर्मा ओलीले देशमा अपहरित भएको लोकतन्त्रलाई पुनः प्राप्त गर्नका लागि सबै लोकतन्त्रवादी, वामपन्थी तथा देशभक्त शक्तिहरू संगठित हुनुपर्ने बताउनुभएको छ । ललितपुरको च्यासलस्थित पार्टी केन्द्रीय कार्यालयमा मंगलबार आयोजित राजधानी प्रदेशस्तरीय निर्वाचन समीक्षा तथा पार्टी पुनर्गठन परामर्श कार्यक्रमलाई सम्बोधन गर्दै उहाँले वर्तमान परिस्थितिको सामना गर्न कार्यगत एकताका साथ संयुक्त संघर्षमा जानुको विकल्प नरहेको स्पष्ट पार्नुभयो । देशमा पछिल्लो समय सिर्जना गरिएको अराजकता र वितण्डाविरुद्ध देशभक्त शक्तिहरू एकजुट भएर आन्दोलनमा होमिनुपर्नेमा उहाँको जोड थियो ।

सम्बोधनका क्रममा अध्यक्ष ओलीले देशमा वैधानिक तवरले सरकार ढाल्न नसकेपछि केही शक्तिहरूले अवैधानिक र हिंसात्मक बाटो रोजेको गम्भीर आरोप लगाउनुभयो । उनीहरूले मुलुकमा हत्या, हिंसा र लुटपाट मच्चाएर राजनीतिक स्वार्थ पूरा गर्ने निकृष्ट काम गरेको उहाँको भनाइ थियो । उहाँले प्राप्त उपलब्धिहरूको रक्षा गर्न र नेपाली समाजलाई पूर्णरूपमा भयमुक्त बनाउन एमाले सधैँ तयार रहने दृढता व्यक्त गर्नुभयो । राज्यको वर्तमान प्रणालीबाटै सबै जनतालाई समान रूपमा न्याय प्राप्त हुने वातावरण बनाउनु आजको मुख्य आवश्यकता रहेको उहाँले स्पष्ट पार्नुभयो ।

अध्यक्ष ओलीले गत वर्ष अर्थात् २०८२ साल भदौ २३ र २४ गते भएका घटनाहरू सामान्य नागरिक आन्दोलन नभएर देशको संविधान र लोकतन्त्रविरुद्धको सुनियोजित षड्यन्त्र भएको दाबी गर्नुभयो । उनीहरूले युवा विद्रोह वा जेन-जी आन्दोलनको आवरणमा देशमा ठूलो उपद्रव मच्चाएको उहाँको टिप्पणी थियो । उक्त घटनामा संलग्न अपराधीहरूले देशको शान्ति सुरक्षालाई ध्वस्त पार्दै अराजकता फैलाएको र अहिले वर्तमान सरकारले त्यस्ता हिंसात्मक क्रियाकलापलाई वैधानिकता दिने प्रयास गरिरहेकोमा उहाँले गम्भीर चिन्ता व्यक्त गर्नुभयो । उनीहरूले कानुन हातमा लिएर देशलाई बर्बाद पारेको ओलीको ठहर छ ।

उहाँले गत फागुन २१ गते सम्पन्न भएको निर्वाचनलाई भदौ महिनामा गरिएका तिनै आपराधिक घटनाहरूलाई कानुनी र राजनीतिक रूपमा वैधानिकता दिन मञ्चन गरिएको एउटा नाटकको संज्ञा दिनुभयो । सरकारले गठन गरेको गौरीबहादुर कार्की आयोगको प्रतिवेदनमाथि गम्भीर प्रश्न उठाउँदै अध्यक्ष ओलीले उक्त प्रतिवेदन घटनाको वास्तविक तथ्यलाई ढाकछोप गर्नका लागि मात्रै तयार पारिएको आरोप लगाउनुभयो ।

तत्काल कसैसँग पार्टी एकता नहुने स्पष्टोक्ति
पार्टीको आन्तरिक संगठन र पुनर्गठनका विषयमा बोल्दै अध्यक्ष ओलीले तत्काल अन्य राजनीतिक दल वा समूहहरूसँग संस्थागत रूपमा पार्टी एकताको कुनै सम्भावना नरहेको स्पष्ट पार्नुभयो । नेता तथा कार्यकर्ताहरूलाई यस्तो भ्रममा नपर्न आग्रह गर्दै उहाँले विगतका एकताहरू स्वार्थ, अस्वस्थ गठजोड र दाउपेचमा आधारित संकुचित मानसिकताबाट ग्रसित देखिएको स्मरण गर्नुभयो । ‘पार्टी एकताका लागि वैचारिक र नैतिक पवित्रता आवश्यक हुन्छ, जुन विगतमा पटक्कै देखिएन’, उहाँले भन्नुभयो । यद्यपि, एमालेको विचार, नीति र नेतृत्वलाई स्वीकार गरेर व्यक्तिगत वा स–साना समूहका रूपमा पार्टी प्रवेश गर्न चाहनेहरूलाई उदारताका साथ उपयुक्त जिम्मेवारी दिएर समेटिने नीति पार्टीले लिएको उहाँले प्रष्ट पार्नुभयो । निष्क्रिय रहेका पार्टी कमिटीहरूलाई तत्काल सक्रिय बनाउन पुनर्गठनको अभियान थालिने र चौतर्फी आक्रमण भइरहेको यस घडीमा पार्टीलाई अझ बलियो र एकजुट बनाएर विजयतर्फ लैजान सबैले रचनात्मक सुझाव दिनुपर्ने उहाँको आग्रह थियो ।

मंगलबार नै नेपाल खेलकुद महासंघको राष्ट्रिय भेलालाई सम्बोधन गर्दै अध्यक्ष ओलीले राष्ट्रियता र खेलकुद विकासका विषयमा समेत सरकारको कडा आलोचना गर्नुभयो । उहाँले ‘लभ आवर कन्ट्री, लभ आवर नेसन’ को भावना मुटुमा राखेर काम गर्नुपर्ने बताउनुभयो । भूकम्प र कोभिड-१९ को महामारीले ध्वस्त पारेको देशको अर्थतन्त्र, शिक्षा, स्वास्थ्य र खेलकुद क्षेत्रलाई आफूहरूले सरकारमा रहँदा उकास्ने भगिरथ प्रयास गरेको तर विरोधी तत्त्वहरूलाई त्यो सकारात्मक कुरा सह्य नभएको उहाँको तर्क थियो । नेपाली खेलकुदको वर्तमान अवस्थाप्रति गम्भीर असन्तुष्टि व्यक्त गर्दै पूर्वप्रधानमन्त्री ओलीले खेलाडीहरूको शारीरिक विकास र पोषणमा राज्यले उचित ध्यान दिन नसकेको टिप्पणी गर्नुभयो ।