मुगु । जातीय विभेद तथा छुवाछुत अन्त्य गर्ने उद्देश्यसहित मुगुको छायाँनाथ रारा नगरपालिकाले अन्तरसंवाद तथा सहभोज कार्यक्रम आयोजना गरेको छ। नगरपालिकाको दलित हेल्प डेस्कको आयोजनामा शुक्रबार सम्पन्न कार्यक्रममा जनप्रतिनिधि, राजनीतिक दलका प्रतिनिधि, सामाजिक अभियन्ता, सुरक्षा निकायका प्रमुख, दलित सञ्जालका प्रतिनिधि, पत्रकार, कर्मचारी तथा सर्वसाधारणको सहभागिता रहेको थियो।
कार्यक्रममा सहभागीहरूले एउटै स्थानमा बसेर सहभोज गर्दै जातीय विभेद सामाजिक अपराध भएको सन्देश प्रवाह गर्नुका साथै सामाजिक सद्भाव, समानता र भाइचाराको व्यवहारिक अभ्यास गरेका थिए।
छायाँनाथ रारा नगरपालिकाका नगरप्रमुख विष्णुकुमार भामले जातीय विभेद अन्त्य गर्न कानुनी व्यवस्था मात्र पर्याप्त नहुने भन्दै व्यवहारमै परिवर्तन आवश्यक रहेको बताउनुभयो। उहाँले छुवाछुत अन्त्यका लागि नगरपालिका प्रतिबद्ध रहेको उल्लेख गर्दै जातीय आधारमा विभेद गरेको पाइए कानुनअनुसार कारबाही गरिने चेतावनी दिनुभयो।
उहाँले सामाजिक रूपान्तरणका लागि सहभोजजस्ता कार्यक्रम प्रभावकारी माध्यम भएको बताउँदै दुर्गम क्षेत्रका दलित समुदायका समस्या समाधान तथा परम्परागत पेसाको संरक्षण र प्रवर्द्धनका लागि देशका ७५३ स्थानीय तहमध्ये पहिलोपटक छायाँनाथ रारा नगरपालिकाले दलित नीति तथा कार्यविधि पारित गरी कार्यान्वयनमा ल्याएको जानकारी दिनुभयो।
दलित अधिकारकर्मी बलराम शाहनीले जातीय विभेद अन्त्यका लागि व्यवहारिक अभ्यास आवश्यक रहेको उल्लेख गर्दै यस्ता कार्यक्रमले सामाजिक समानता र मानवतामा आधारित समाज निर्माणमा महत्वपूर्ण योगदान पुर्याउने बताउनुभयो। उहाँले आगामी दिनमा यस्ता कार्यक्रम सदरमुकाममा मात्र सीमित नराखी ग्रामीण बस्ती र स्थानीय समुदायका अगुवालाई समेत समेटेर सञ्चालन गरिए अझ प्रभावकारी हुने विश्वास व्यक्त गर्नुभयो।
नगरपालिकाका प्रमुख प्रशासकीय अधिकृत विष्णु पौडेलले जातका आधारमा होइन, मानवता र क्षमताका आधारमा सम्मान गर्ने संस्कार विकास गर्नुपर्नेमा जोड दिनुभयो। उहाँले छुवाछुत व्यवहारमै अन्त्य नभएसम्म कानुनी व्यवस्थाको पूर्ण अर्थ नहुने उल्लेख गर्दै सहअस्तित्व, सद्भाव र सामाजिक एकताको सन्देश प्रवाह गर्न कार्यक्रम आयोजना गरिएको बताउनुभयो।
कार्यक्रममा सहभागी अन्य वक्ताहरूले पनि जातीय विभेद अन्त्यका लागि सोच र व्यवहार दुवैमा परिवर्तन आवश्यक रहेको धारणा राखेका थिए। दलित हेल्प डेस्कका प्रतिनिधि कालिबहादुर नेपालीले सहभोज सामाजिक रूपान्तरणको महत्वपूर्ण अभियान भएको उल्लेख गर्दै विभेदरहित समाज निर्माणका लागि सबै पक्ष एकजुट हुनुपर्नेमा जोड दिनुभयो।
यो खबर पढेर तपाईलाई कस्तो महसुस भयो ?
0
Like
Like
1
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
निजामती सेवामा व्यापक पुनःसंरचनाको तयारी
धान बालीमा कृषि यान्त्रीकरण :
फिफा विश्वकप २०२६ हेर्न डिशहोमको
भेडा-भेडासँग बाख्रा-बाख्रासँग
मध्यपूर्वको अवस्था सहज भएसँगै पेट्रोलियम
मुगुमा जातीय विभेद अन्त्यका लागि