शारजाहबाट कराँची जाँदै गरेको कार्गो विमान बेपत्ता

हिमालय टाइम्स

Wednesday July 8, 2026

हिमालय टाइम्स

Wednesday July 8, 2026

Read Time = 3 mins

सिफारिस

मुद्गल महापुराण संक्षिप्त चर्चा

डिजिटल संस्करण

विदेश

A A- A+

काठमाडौं । संयुक्त अरब इमिरेट्स (यूएई) को शारजाहबाट पाकिस्तानको कराँचीका लागि उडेको के२ एयरवेजको कार्गो विमान सम्पर्कविहीन भएको छ । बेपत्ता भएको उक्त बोइङ ७३७ विमानमा चालक दलका पाँच सदस्य सवार रहेको अन्तर्राष्ट्रिय सञ्चारमाध्यम बीबीसी उर्दूले जनाएको छ ।

बीबीसी उर्दूका अनुसार पाकिस्तान एयरपोर्ट अथोरिटीले मंगलबार राति पाकिस्तानी समयअनुसार ९ः१८ बजे विमानको नेभिगेसन प्रणालीमा समस्या देखिएको जानकारी प्राप्त गरेको थियो । त्यसपछि कराँची एरिया कन्ट्रोल सेन्टरले विमानलाई सुरक्षित मार्गनिर्देशन गर्ने प्रयास थालेको थियो ।

अथोरिटीका अनुसार राति ९ः२१ बजे रडारमा विमान अस्वाभाविक रूपमा तीव्र गतिमा तल झरिरहेको देखिएको थियो । सोही क्रममा विमानले आफ्नो दिशा पनि अचानक परिवर्तन गरेको बताइएको छ । त्यसको केही क्षणपछि कराँचीबाट करिब १५५ नटिकल माइल पश्चिम क्षेत्रमा पुगेपछि विमानसँगको रडार तथा रेडियो सम्पर्क पूर्ण रूपमा विच्छेद भएको जनाइएको छ ।

विमानको अवस्थाबारे यकिन हुन नसकेपछि पाकिस्तान सरकारले व्यापक खोज तथा उद्धार अभियान सञ्चालन गरेको छ। पाकिस्तानी नौसेना, वायुसेना तथा अन्य सम्बन्धित निकायहरूलाई खोजी अभियानमा परिचालन गरिएको अधिकारीहरूले बताएका छन् ।

खोजी कार्यका लागि पाकिस्तानी नौसेनाको युद्धपोत पीएनएस जुल्फिकार सम्भावित दुर्घटनास्थलतर्फ पठाइएको छ। त्यसैगरी, नौसेनाको एटीआर विमानले तुर्बतबाट उडान भरेर हवाई खोजी थालेको छ भने पाकिस्तान नेशनल शिपिंग कर्पोरेसनको व्यावसायिक जहाज लाहोर पनि खोज तथा उद्धार अभियानमा सहभागी भएको छ ।

हालसम्म विमानको अवस्थाबारे कुनै आधिकारिक पुष्टि भएको छैन। सम्बन्धित निकायहरूले खोजी कार्यलाई तीव्र बनाउँदै सम्भावित दुर्घटनास्थलको पहिचान गर्ने प्रयास जारी रहेको बताएका छन् ।

यसअघि सन् २०२० मा पनि पाकिस्तानमा ठूलो हवाई दुर्घटना भएको थियो। त्यतिबेला पाकिस्तान इन्टरनेशनल एयरलाइन्स (पीआईए) को आन्तरिक यात्रुवाहक विमान कराँची विमानस्थलमा अवतरणको क्रममा दुर्घटनाग्रस्त हुँदा विमानमा रहेका ९९ जनामध्ये दुई जना मात्र जीवित उद्धार भएका थिए ।

यो खबर पढेर तपाईलाई कस्तो महसुस भयो ?