काठमाडौं । नेपाली राष्ट्रिय क्रिकेट टोलीले १६ वर्षपछि जर्सीविरुद्ध ५० ओभरको एकदिवसीय क्रिकेट खेल्दैछ । आगामी आइसिसी क्रिकेट विश्वकप लिग-२ अन्तर्गत नेदरल्याण्ड्स भ्रमणको तयारीस्वरूप नेपालले जर्सीसँग दुई एकदिवसीय अभ्यास खेल खेल्ने कार्यक्रम रहेको छ । त्यसअन्तर्गत पहिलो खेल आज (सोमबार) नेपाली समयअनुसार दिउँसो ४ः४५ बजे सुरु हुनेछ ।
नेपाल र जर्सीबीचको यो भेट केवल अभ्यास खेलमात्र नभई दुई टोलीबीच ५० ओभरको क्रिकेटमा लामो अन्तरालपछि हुने प्रतिस्पर्धा पनि हो । दुवै टोलीले पछिल्ला वर्षहरूमा अन्तर्राष्ट्रिय क्रिकेटमा उल्लेखनीय प्रगति गरेका छन् । त्यसैले यो खेलले आगामी लिग–२ प्रतियोगिताका लागि दुवै टोलीको तयारीको स्तर मापन गर्ने अवसर प्रदान गर्नेछ ।
नेपालले जर्सीविरुद्ध पछिल्लो पटक सन् २०१० मा घरेलु भूमिमा आयोजित आइसिसी विश्व क्रिकेट लिग डिभिजन-५ अन्तर्गत ५० ओभरको खेल खेलेको थियो । भक्तपुरस्थित वीरेन्द्र सैनिक विद्यालयको मैदानमा भएको उक्त खेलमा नेपालले ६ विकेटको सहज जित निकालेको थियो । त्यो खेलमा जर्सीले पहिले ब्याटिङ गर्दै १७४ रन बनाएको थियो । १७५ रनको लक्ष्य पछ्याएको नेपालले ३८ ओभरमै ४ विकेट गुमाएर लक्ष्य पूरा गर्दै प्रभावशाली जित दर्ता गरेको थियो । त्यसयता दुई टोलीबीच ५० ओभरको क्रिकेटमा कुनै भेट भएको थिएन ।
यद्यपि, नेपाल र जर्सीबीच ट्वान्टी-२० अन्तर्राष्ट्रिय छनोटमा भने एक पटक प्रतिस्पर्धा भइसकेको छ । सन् २०१५ मा आयरल्याण्डमा आयोजित आइसिसी ट्वान्टी-२० विश्वकप ग्लोबल छनोटमा जर्सीले नेपाललाई ७ विकेटले पराजित गरेको थियो । उक्त प्रतियोगितामा नेपाल पहिलो चरणबाटै बाहिरिएको थियो, जुन नेपाली क्रिकेटका लागि निराशाजनक नतिजामध्ये एक मानिन्छ । यसपटकको भेट भने फरक सन्दर्भमा हुँदैछ । नेपाल हाल विश्वकप लिग-२ अन्तर्गतका महत्त्वपूर्ण खेलहरूको तयारीमा रहेको छ । नेदरल्याण्ड्स भ्रमणअघि हुने यी दुई अभ्यास खेलले टोली संयोजन, ब्याटिङ क्रम, बलिङ आक्रमण तथा खेलाडीहरूको लय परीक्षण गर्ने अवसर दिनेछ ।
पछिल्ला केही महिनामा नेपाली टोलीले अन्तर्राष्ट्रिय क्रिकेटमा राम्रो प्रदर्शन गर्दै आएको छ भने जर्सी पनि एसोसिएट राष्ट्रहरूबीच प्रतिस्पर्धात्मक टोलीका रूपमा स्थापित हुँदै गएको छ । त्यसैले आजको खेल रोमाञ्चक हुने अपेक्षा गरिएको छ । १६ वर्षअघि ५० ओभरको भेटमा नेपाल विजयी भएको इतिहास दोहोर्याउने लक्ष्यमा हुनेछ भने जर्सी पुरानो हारको बदला लिँदै आफ्नो क्षमता प्रमाणित गर्न मैदान उत्रिनेछ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
समता शुल्क फिर्ता भएपछि निजी
वडाध्यक्ष सञ्जय पटेल पक्राउ
पूर्व महानिर्देशक प्रदीप अधिकारीविरुद्ध भ्रष्टाचार
गण्डकीमा ट्राफिक कारबाहीबाट डेढ करोडभन्दा
कीर्तिपुरमा कारभित्र जलेर मृत्यु हुने
बिजुलीमा लगाइएको मूल्य अभिवृद्धि कर