काठमाडौं । नेपालको भलिबल इतिहासमा पहिलो पटक आयोजना हुन लागेको पुरुष फ्रेन्चाइज प्रतियोगिता नेपाल भलिबल लिग (एनभिएल) ले महत्त्वपूर्ण तयारी पूरा गर्दै सबै सहभागी ६ फ्रेन्चाइज टोलीका मुख्य प्रशिक्षकको टुंगो लगाएको छ । प्रतियोगिताको प्राविधिक पक्षलाई व्यवस्थित र प्रतिस्पर्धालाई थप गुणस्तरीय बनाउने उद्देश्यसहित काठमाडौंस्थित होटल क्राउन इम्पेरियलमा आयोजित विशेष कार्यक्रममा प्रशिक्षकहरूको औपचारिक घोषणा गरिएको हो ।
नेपाल भलिबल संघको समन्वयमा नेपाल भलिबल लिगको नियमावलीअनुसार सम्पन्न प्रशिक्षक छनोट प्रक्रिया निष्पक्ष, पारदर्शी तथा आपसी सहमतिका आधारमा गरिएको आयोजकले जनाएको छ । कार्यक्रममा सहभागी सबै फ्रेन्चाइज टोलीका आधिकारिक प्रतिनिधिहरूले प्रशिक्षक बाँडफाँट प्रक्रियाप्रति पूर्ण सहमति जनाउँदै निर्णयमा हस्ताक्षरसमेत गरेका थिए । यसले प्रतियोगिताको विश्वसनीयता र व्यावसायिक व्यवस्थापनप्रति आयोजकको प्रतिबद्धता झल्काएको छ ।
घोषणाअनुसार सगरमाथा स्म्यासर्सको मुख्य प्रशिक्षकमा उत्सव खड्का नियुक्त हुनुभएको छ । मधेस वारियर्सको नेतृत्व भारत यादवले गर्नुहुनेछ भने काठमाडौं रेड्सको मुख्य प्रशिक्षकको जिम्मेवारी निपाबहादुर बिकेले पाउनुभएको छ । यस्तै, अन्नपूर्ण स्पाइकर किंग्सको मुख्य प्रशिक्षकमा रमेश केसी, कर्णाली शिवराजको मुख्य प्रशिक्षकमा चन्द्रबहादुर कुँवर तथा खप्तड फाल्कन्सको मुख्य प्रशिक्षकमा रूपेशकुमार विष्ट नियुक्त हुनुभएको छ । अनुभवी तथा राष्ट्रियस्तरमा योगदान पुर्याएका प्रशिक्षकहरूको नेतृत्वमा टोलीहरू मैदान उत्रिने भएपछि प्रतियोगिताको प्रतिस्पर्धा थप रोमाञ्चक हुने अपेक्षा गरिएको छ ।
फ्रेन्चाइज टोली र मुख्य प्रशिक्षक
सगरमाथा स्म्यासर्स- उत्सव खड्का
मधेस वारियर्स- भारत यादव
काठमाडौं रेड्स- निपाबहादुर बिके
अन्नपूर्ण स्पाइकर किंग्स- रमेश केसी
कर्णाली शिवराज- चन्द्रबहादुर कुँवर
खप्तड फाल्कन्स- रूपेशकुमार विष्ट
नेपालमा क्रिकेट, फुटबल र बास्केटबलपछि अब भलिबल पनि व्यावसायिक फ्रेन्चाइज मोडेलमा प्रवेश गर्न लागेको छ । देशकै लोकप्रिय खेलमध्ये एक मानिने भलिबललाई संस्थागत, व्यवसायिक र प्रतिस्पर्धात्मक बनाउने लक्ष्यसहित सुरु हुन लागेको नेपाल भलिबल लिगले खेलाडी, प्रशिक्षक तथा व्यवस्थापकका लागि नयाँ अवसर सिर्जना गर्ने विश्वास गरिएको छ ।
यस लिगमार्फत् राष्ट्रिय टोलीका खेलाडीले उच्चस्तरीय प्रतिस्पर्धात्मक वातावरणमा खेल्ने अवसर पाउनेछन् भने युवा प्रतिभाले अनुभवी प्रशिक्षकसँग सिक्ने र आफ्नो क्षमता प्रदर्शन गर्ने मञ्च पनि प्राप्त गर्नेछन् । निजी क्षेत्रको लगानी, व्यवस्थित प्रतियोगिता र दर्शकको बढ्दो आकर्षणसँगै नेपाली भलिबलको विकासमा नेपाल भलिबल लिग कोसेढुंगा साबित हुने अपेक्षा गरिएको छ ।
पहिलो संस्करणको तयारी तीव्र पारिरहेको आयोजकले आगामी दिनमा खेलाडी ड्राफ्ट, प्रशिक्षण तालिका तथा प्रतियोगिताको विस्तृत कार्यसूची सार्वजनिक गर्ने जनाएको छ । नेपालको घरेलु भलिबलमा पहिलो पटक सुरु हुन लागेको पुरुष फ्रेन्चाइज लिगले खेलप्रेमीमा उत्साह थपेको छ भने यसले नेपाली भलिबललाई नयाँ उचाइमा पुर्याउने विश्वास खेल क्षेत्रले व्यक्त गरेको छ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
समता शुल्क फिर्ता भएपछि निजी
वडाध्यक्ष सञ्जय पटेल पक्राउ
पूर्व महानिर्देशक प्रदीप अधिकारीविरुद्ध भ्रष्टाचार
गण्डकीमा ट्राफिक कारबाहीबाट डेढ करोडभन्दा
कीर्तिपुरमा कारभित्र जलेर मृत्यु हुने
बिजुलीमा लगाइएको मूल्य अभिवृद्धि कर