काठमाडौं । अन्तर्राष्ट्रिय क्रिकेट परिषद् (आइसिसी) ले पुरुष टी-२० विश्वकप र एकदिवसीय विश्वकपको प्रतियोगिता ढाँचा परिवर्तन गर्दै थप प्रतिस्पर्धात्मक बनाउने निर्णय गरेको छ । स्कटल्याण्डको एडिनबर्गमा सम्पन्न आइसिसी बोर्ड बैठकले सन् २०२८ देखि लागू हुने नयाँ संरचना अनुमोदन गरेको हो ।
नयाँ व्यवस्थाअनुसार सन् २०२८ को पुरुष टी-२० विश्वकपमा हालको ‘सुपर एट’ चरण हटाएर ‘सुपर १०’ लागू गरिनेछ । प्रतियोगिताको सुरुवाती चरणमा २० टोलीलाई चार-चार टोलीका पाँच समूहमा विभाजन गरिनेछ । प्रत्येक समूहका शीर्ष दुई टोली दोस्रो चरणमा प्रवेश गर्नेछन् । दोस्रो चरणमा १० टोलीलाई पाँच-पाँच टोलीका दुई समूहमा विभाजन गरिनेछ । दुवै समूहका विजेता टोली सिधै सेमिफाइनलमा पुग्नेछन् भने दोस्रो र तेस्रो स्थानमा रहने टोलीबीच ‘क्रसओभर इलिमिनेटर’ खेल हुनेछ । एउटा समूहको दोस्रो टोलीले अर्को समूहको तेस्रो टोलीसँग प्रतिस्पर्धा गर्नेछ र विजेता टोलीले सेमिफाइनलमा स्थान बनाउनेछ ।
नयाँ ढाँचाअनुसार समूह चरणका खेल ४० बाट घटेर ३० हुनेछन् भने दोस्रो चरणका खेल १२ बाट बढेर २० पुग्नेछन् । यसबाहेक दुई इलिमिनेटर खेल थपिनेछन् । आइसिसीका अनुसार प्रतियोगिताको अन्तिम चरणसम्म प्रत्येक खेललाई अर्थपूर्ण र रोमाञ्चक बनाउन इलिमिनेटर प्रणाली समावेश गरिएको हो ।
आइसिसीले सन् २०२८ को टी-२० विश्वकपका लागि नयाँ छनोट प्रणाली पनि स्वीकृत गरेको छ । सन् २०२६ को विश्वकप खेलेका तर स्वतः छनोट हुन नसकेका आठ टोली क्षेत्रीय छनोट नखेली सिधै ग्लोबल क्वालिफायरमा पुग्नेछन् । नेपाल पनि यस व्यवस्थाअनुसार सिधै ग्लोबल क्वालिफायरमा पुगेको छ ।
आइसिसी बोर्डले सहयोगी सदस्य राष्ट्रका लागि १६ टोली सहभागी हुने नयाँ विश्वस्तरीय प्रतियोगिताको अवधारणालाई पनि समर्थन गरेको छ । टी-२० विश्वकपअघि आयोजना गर्ने प्रस्ताव गरिएको उक्त प्रतियोगिताले सहयोगी राष्ट्रलाई उच्चस्तरीय अन्तर्राष्ट्रिय प्रतिस्पर्धा र विश्वकप तयारीको अवसर प्रदान गर्ने अपेक्षा गरिएको छ । यद्यपि, प्रतियोगिताको अन्तिम स्वीकृति भने आगामी नोभेम्बरमा बस्ने आइसिसीको वित्त तथा व्यावसायिक मामिला समितिको समीक्षापछि बोर्डले दिनेछ ।
आइसिसीले १४ टोली सहभागी हुने पुरुष एकदिवसीय विश्वकपको ढाँचामा पनि परिवर्तन गरेको छ । अब समूह चरणअघि ‘सुपर सिरिज’ नामक नयाँ चरण समावेश गरिनेछ । यसले सुरुवाती चरणका खेललाई अझ महत्त्वपूर्ण बनाउने र प्रतियोगितालाई थप प्रतिस्पर्धात्मक बनाउने आइसिसीको विश्वास छ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
समता शुल्क फिर्ता भएपछि निजी
वडाध्यक्ष सञ्जय पटेल पक्राउ
पूर्व महानिर्देशक प्रदीप अधिकारीविरुद्ध भ्रष्टाचार
गण्डकीमा ट्राफिक कारबाहीबाट डेढ करोडभन्दा
कीर्तिपुरमा कारभित्र जलेर मृत्यु हुने
बिजुलीमा लगाइएको मूल्य अभिवृद्धि कर