कैलाली । सुदूरपश्चिम प्रदेश सरकारले चालु आर्थिक वर्ष २०८३/८४ का लागि ल्याएको बजेट प्रदेश सभाबाट पारित हुन नसकेपछि फेल भएको छ । आजदेखि सुरु भएको नयाँ आर्थिक वर्षसँगै प्रदेश सरकार आंशिक बजेट शून्यताको अवस्थामा पुगेको छ ।
नेकपा एमालेले सरकारलाई दिएको समर्थन फिर्ता लिएपछि सरकारले बजेट पारित गर्न नसकेको हो । मुख्यमन्त्री कमलबहादुर शाहले एमाले मन्त्रीहरूलाई बर्खास्त गरेपछि एमालेले सरकारलाई दिएको समर्थन फिर्ता लिएको थियो ।
एमाले सरकारबाट बाहिरिएपछि मुख्यमन्त्री शाहले प्रमुख प्रतिपक्षी नेपाली कम्युनिष्ट पार्टी (नेकपा) को साथ खोजेका थिए । तर, नेकपाले पनि बजेट यथास्थितिमा पारित गर्न नसकिने अडान लिएपछि सरकार थप अप्ठ्यारोमा परेको थियो । सरकार स्पष्ट रूपमा अल्पमतमा परेपछि आर्थिक मामिला मन्त्री विक्रमसिंह धामीले गत असार १ गते प्रदेश सभामा प्रस्तुत गरेको ३७ अर्ब रुपैयाँ बराबरको बजेट पारित हुन सकेन ।
बजेट फेल भएसँगै शुक्रवारदेखि प्रदेश सरकारअन्तर्गतका कार्यालयमा बजेट शून्यताको अवस्था सिर्जना भएको छ । यद्यपि, प्रदेश सरकारले राजस्व संकलनसम्बन्धी विशेष व्यवस्था गरेकाले पूर्ण बजेट शून्यता भने नआएको जनाएको छ । प्रदेश सरकारले यसअघि नै सामयिक राजस्व संकलन ऐन, २०८१ लागू गरिसकेकाले राजस्व सङ्कलन गर्न समस्या नभए पनि बजेट पारित नभएकाले सरकारी खर्च गर्न भने नसकिने अवस्था बनेको छ ।
आर्थिक मामिला मन्त्रालयका उपसचिव धनबहादुर रोकायाले चालु आर्थिक वर्षको बजेट प्रदेश सभाबाट पारित हुन नसके पनि प्रदेश पूर्ण बजेट शून्यताको अवस्थामा नपुगेको बताउनु भयो । उहाँकाअनुसार विशेष परिस्थितिका लागि प्रदेश सरकारले यसअघि नै सामयिक राजस्व संकलन ऐन, २०८१ लागू गरिसकेको छ ।
उक्त ऐनअनुसार आजदेखि प्रदेश सरकारअन्तर्गतका कार्यालयहरूले राजस्व संकलन गर्न सक्नेछन् । बजेट पारित नभएकाले भने अघिल्लै व्यवस्थाअनुसार राजस्व संकलन गर्नुपर्ने उहाँले बताउनु भयो ।
ऐनको दफा ३ ले विशेष परिस्थितिमा राजस्व संकलनको व्यवस्था गरेको छ । दफा ३ को उपदफा १ मा प्रदेशमा विशेष परिस्थितिको समयमा राजस्व संकलन गर्न विशेष परिस्थिति सिर्जना हुनुअघि कायम रहेको दरअनुसार नै राजस्व संकलन कार्यलाई निरन्तरता दिनुपर्नेछ भन्ने व्यवस्था गरिएको छ ।
यसै व्यवस्थाअनुसार राजस्व संकलन गर्न आर्थिक मामिला मन्त्रालयले मातहतका कार्यालयहरूलाई परिपत्र गर्ने तयारीसमेत गरेको छ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
समता शुल्क फिर्ता भएपछि निजी
वडाध्यक्ष सञ्जय पटेल पक्राउ
पूर्व महानिर्देशक प्रदीप अधिकारीविरुद्ध भ्रष्टाचार
गण्डकीमा ट्राफिक कारबाहीबाट डेढ करोडभन्दा
कीर्तिपुरमा कारभित्र जलेर मृत्यु हुने
बिजुलीमा लगाइएको मूल्य अभिवृद्धि कर