काठमाडौं । नेपाल आदिवासी जनजाति महासंघले ३२औँ विश्व आदिवासी दिवसको सम्पूर्ण तयारी पूरा भएको जनाएको छ । बिहीबार काठमाडौंमा आयोजित पत्रकार सम्मेलनमार्फत् महासंघले दिवसका अवसरमा देशभरका आदिवासी जनजातिहरूको व्यापक सहभागितासहित सांस्कृतिक, सचेतनामूलक तथा अधिकारमुखी कार्यक्रम आयोजना गरिने जानकारी दिएको हो ।
महासंघका महासचिव विमल सारु मगरले यस वर्षको विश्व आदिवासी दिवस ‘प्राप्त अधिकारको रक्षा आजको आवश्यकता, पहिचानसहितको समावेशी र न्यायपूर्ण नेपाल निर्माणमा हाम्रो साझा प्रतिबद्धता’ भन्ने मूल नाराका साथ मनाइने जानकारी दिनुभयो । उहाँका अनुसार साउन २४ गते आइतबार काठमाडौंको टुँडिखेलस्थित खुलामञ्चमा मूल समारोह आयोजना गरिनेछ । कार्यक्रममा देशभरका विभिन्न समुदायका आदिवासी जनजातिहरू आफ्ना मौलिक तथा परम्परागत भेषभूषा, बाजागाजा, सांस्कृतिक झाँकी, लोकगीत, परम्परागत नृत्य तथा हस्तकलासहित सहभागी हुनेछन् ।
भृकुटीमण्डपबाट सुरु हुने र्याली भद्रकाली, शहीदगेट, सुन्धारा, वीर अस्पताललगायतका मुख्य सडक हुँदै टुँडिखेलस्थित खुलामञ्चमा पुगेर मूल समारोहमा परिणत हुने महासंघले जनाएको छ । महासचिव मगरले संविधानले परिकल्पना गरेको समावेशी लोकतन्त्र, सामाजिक न्याय तथा समान अवसरको मर्मअनुसार आदिवासी जनजातिहरूको अर्थपूर्ण सहभागिता सुनिश्चित गर्नु वर्तमान आवश्यकता भएको उल्लेख गर्नुभयो । संविधानमा व्यवस्था गरिएका अधिकारहरूको प्रभावकारी कार्यान्वयन हुन नसकेको भन्दै ती अधिकारको संरक्षण र कार्यान्वयनका लागि दिवसले थप दबाब सिर्जना गर्ने उहाँको भनाइ छ ।
कार्यक्रमको उद्घाटन उपराष्ट्रपति रामसहायप्रसाद यादवले गर्ने कार्यक्रम रहेको छ । साथै विभिन्न राजनीतिक दलका शीर्ष नेताहरू, जनप्रतिनिधि, कूटनीतिक नियोगका प्रतिनिधि, नागरिक समाज तथा विभिन्न संघ-संस्थाका प्रतिनिधिहरूको पनि सहभागिता रहने महासंघले जनाएको छ । मूल समारोहमा विभिन्न जातीय समुदायका मौलिक सांस्कृतिक प्रस्तुति प्रदर्शन गरिनुका साथै रैथाने परिकार, परम्परागत खाद्य संस्कृति, हस्तकला तथा स्थानीय उत्पादनहरूको प्रदर्शनी एवं बिक्री-वितरणको व्यवस्था गरिनेछ ।
त्यसैगरी, विज्ञहरूसँग आदिवासी जनजातिको अधिकार, भाषा, संस्कृति, पहिचान, परम्परागत ज्ञान तथा समसामयिक चुनौतीबारे प्यानल छलफल आयोजना गरिने कार्यक्रम छ । महासंघका अनुसार कार्यक्रममा ४० भन्दा बढी अन्तर्राष्ट्रिय सञ्चारमाध्यमले प्रत्यक्ष प्रसारण गर्नेछन् ।
महासंघले आदिवासी जनजातिहरूको भाषा, संस्कृति, सभ्यता, इतिहास, परम्परागत ज्ञान, भूमि तथा प्राकृतिक स्रोतसँगको सम्बन्ध संरक्षण गर्नु राज्य र समाजको साझा दायित्व भएको जनाएको छ । साथै संविधानमा व्यवस्था भएका समानुपातिक समावेशी प्रतिनिधित्व, सामाजिक न्याय, समान अवसर, मातृभाषाको संरक्षण, सांस्कृतिक अधिकार, पहिचान तथा आदिवासी जनजातिहरूको सम्मानजनक सहभागितासम्बन्धी प्रावधानको पूर्ण कार्यान्वयन गर्न सरकारसँग माग गरेको छ ।
महासंघले विश्व आदिवासी दिवसको मूल समारोहमा मात्र सीमित नरही सप्ताहव्यापी रूपमा विविध सांस्कृतिक, बौद्धिक तथा सचेतनामूलक कार्यक्रम सञ्चालन गरिने पनि जनाएको छ । दिवसमार्फत् आदिवासी जनजातिको पहिचान, अधिकार, भाषा र संस्कृतिको संरक्षणसँगै समावेशी तथा न्यायपूर्ण नेपालको निर्माणमा राष्ट्रिय प्रतिबद्धतालाई थप सुदृढ बनाउने उद्देश्य रहेको महासंघले स्पष्ट पारेको छ ।
यो खबर पढेर तपाईलाई कस्तो महसुस भयो ?
1
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
घरपझोङ जलवायु परिवर्तन सम्मेलन सुरु
खर्क व्यवस्थापनमा नेपालले भुटानबाट सिक्नुपर्छ
सुनचाँदीको मूल्य घट्यो, आज प्रतिताेला
सर्लाहीमा भर्याङबाट लडेर महिलाको मृत्यु
भोटेकोशी बाढीपछि एक हजार ३९९
भक्तपुरमा पनि रात्रिकालीन सार्वजनिक यातायात