काठमाडौं । जनमत पार्टीका अध्यक्ष डा. सीके राउतले देशमा संकट, अत्याचार र विभेद बढेका बेला फरक–फरक विचारधारा बोकेका राजनीतिक शक्ति एक ठाउँमा आएर संघर्ष गरेको इतिहास रहेको बताउनुभएको छ।
सात राजनीतिक दलले संयुक्त रूपमा घोषणा गरेको ‘अग्रगामी मोर्चा’को उद्घाटन समारोहलाई सम्बोधन गर्दै अध्यक्ष राउतले विगतका राजनीतिक आन्दोलनमा पनि राजनीतिक मतभेदलाई केही समय थाती राखेर परिवर्तनका लागि विभिन्न शक्ति एकजुट भएको बताउनुभएको हो।
उहाँले २००७ सालको परिवर्तनदेखि २०३६, २०४६ तथा २०६२/६३ सालका आन्दोलनसम्म फरक राजनीतिक विचारधारा भएका शक्ति एक ठाउँमा आएर संघर्ष गरेको स्मरण गर्नुभयो।
अध्यक्ष राउतले अग्रगामी मोर्चा कुनै एउटा विचारधारा वा दलको गठबन्धन मात्र नभएको स्पष्ट पार्नुभयो। देश र जनताको अपेक्षा पूरा गर्न तथा सबै जातजाति, समुदाय, वर्ग र क्षेत्रको प्रतिनिधित्व हुने गरी मोर्चा निर्माण गरिएको उहाँको भनाइ छ।
मोर्चाले दशकौँ लामो संघर्षबाट प्राप्त प्रजातन्त्र, लोकतन्त्र, गणतन्त्र, संघीयता, समानुपातिक समावेशिता, धर्मनिरपेक्षता, प्रेस स्वतन्त्रता र मानव अधिकारलगायतका उपलब्धिको रक्षा गर्ने उद्देश्य राखेको उहाँले बताउनुभयो।
देश संविधान, विधि र कानुनी शासनका आधारमा सञ्चालन हुनुपर्नेमा जोड दिँदै अध्यक्ष राउतले मौखिक कानुनका आधारमा नभई संविधान र प्रचलित कानुनअनुसार राज्य सञ्चालन गर्न अग्रगामी मोर्चा गठन गरिएको बताउनुभयो।
विगतमा राजनीतिक दल तथा मोर्चाबाट भएका कमजोरीको समीक्षा गर्दै आगामी दिनमा सुधारसहित अघि बढ्नुपर्ने आवश्यकता रहेको पनि उहाँले औँल्याउनुभयो।
मोर्चा गठनपछि सत्तामा रहेका केही व्यक्तिले आफ्नो पद धरापमा परेको ठानेको हुनसक्ने उल्लेख गर्दै अध्यक्ष राउतले मोर्चा सत्ता प्राप्तिका लागि नभएको स्पष्ट पार्नुभयो।
‘यो मोर्चा संघर्षका लागि बनेको हो, सत्ता प्राप्तिका लागि गठबन्धन गरेका होइनौँ,’ उहाँले भन्नुभयो।
सत्तामा रहेका व्यक्तिहरूलाई ढुक्क भएर काम गर्न आग्रह गर्दै उहाँले आफूहरूको उद्देश्य कसैको कुर्सी खोस्नु नभएको बताउनुभयो। तर, सरकार संविधानवाद, संघीय लोकतान्त्रिक गणतन्त्रका मूल्य–मान्यता र लोकतान्त्रिक पद्धतिअनुसार चल्नुपर्ने उहाँको भनाइ छ।
‘हामी तपाईंहरूको कुर्सीबाट फाल्नका लागि यहाँ आएका होइनौँ। संविधानवादमा चल्नुस्, संघीय लोकतान्त्रिक गणतन्त्रका मूल्य–मान्यताअनुसार चल्नुस्। त्यसको रक्षा गर्न लड्नुस्, हाम्रो सहकार्य र सहयोग रहन्छ,’ अध्यक्ष राउतले भन्नुभयो।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
नेपाल एसिसी इमर्जिङ टिम्स एसिया
रास्वपा महामन्त्रीको प्रश्न : सिंहदरबार
बिल तिर्न नसक्दा अस्पतालबाहिर सुत्केरी
सांसद बिष्टको आरोप– सामाजिक सञ्जालमा
प्रधानमन्त्री र सचिवालयले हुकुमी शैलीमा
नेपाल एसबीआई बैंकद्वारा प्रधानमन्त्री दैवी