सिंहदरबार जलाएर पुगेन र ? अब इतिहास नै मेटाउने प्रयास किन ? : सांसद घतानी

हिमालय टाइम्स

Monday August 10, 2026

हिमालय टाइम्स

Monday August 10, 2026

Read Time = 4 mins

डिजिटल संस्करण

समाचार

A A- A+

काठमाडौं । नेकपा (एमाले)की सांसद नीता घतानीले सिंहदरबारको नाम परिवर्तन गर्नुपर्ने सत्तारुढ दलका सांसद हरि ढकालको अभिव्यक्तिप्रति आपत्ति जनाउँदै इतिहास मेटाउने प्रयास नगर्न चेतावनी दिनुभएको छ ।

सोमबार प्रतिनिधिसभाको बैठकमा बोल्दै सांसद घतानीले सांसद ढकालले आइतबार एक सार्वजनिक कार्यक्रममा सिंहदरबारको नाम परिवर्तन गरी ‘अनामनगर दरबार’ राख्नुपर्ने बताउनुभएको प्रसङ्ग उल्लेख गर्दै आपत्ति जनाउनुभएको हो ।

‘सिंहदरबार जलाएर घाइते बनाउने काम पर्याप्त भएन र ? अब यसको नाम मेटाएर यसको इतिहास नै मेटाउने चलखेल हुँदैछ । बन्द गरियोस्,’ उहाँले भन्नुभयो ।

सांसद घतानीले देशमा जनताको निराशा बढ्दै गए पनि सरकार गम्भीर नबनेको आरोप लगाउनुभयो । जनतामा बढ्दो असन्तुष्टिबीच सरकारलाई के कुराले ढुक्क बनाएको हो भन्दै उहाँले प्रश्न गर्नुभयो ।

उहाँले बजारमा देखिएको खाना पकाउने ग्यासको अभाव तत्काल समाधान गर्न, स्वास्थ्य बीमा कार्यक्रमलाई प्रभावकारी बनाउन र सहकारीपीडितको बचत फिर्ताको सुनिश्चितता गर्न सरकारको ध्यानाकर्षण गराउनुभयो ।

त्यस्तै, किसानलाई सहज रूपमा रासायनिक मल तथा कृषि उपजको बजार उपलब्ध गराउन, युवालाई रोजगारी सिर्जना गर्न र व्यवसायीलाई सहज रूपमा व्यापार गर्ने वातावरण बनाउन उहाँले सरकारसँग माग गर्नुभयो ।

राहदानी, सवारी चालक अनुमतिपत्र तथा अस्पतालमा देखिएको लामो लाइनको समस्या समाधान गर्न पनि सांसद घतानीले आग्रह गर्नुभयो ।

उहाँले सुकुम्बासी, सहकारीपीडित, किसान, शिक्षक, दलित तथा युवाका समस्या सम्बोधन गर्न सरकार गम्भीर हुनुपर्ने बताउनुभयो ।

‘सुकुम्बासी, सहकारीपीडित, किसान, शिक्षक, दलित, युवा सबैको एउटै प्रश्न छ– सरकार हामीलाई कहिले देख्छौँ ? राज्य छ भन्ने अनुभूति नेपाली नागरिकले कहिले पाउने ?’ उहाँले प्रश्न गर्नुभयो ।

सांसद घतानीले प्रधानमन्त्रीको सीमासम्बन्धी विवादित अभिव्यक्ति संसद्को अभिलेखबाट हटाउनसमेत माग गर्नुभयो । साथै, जनताका दैनिक समस्या समाधान गरी राज्यप्रति नागरिकको भरोसा बढाउनेतर्फ सरकार केन्द्रित हुनुपर्ने उहाँको भनाइ थियो ।