हामीसँग भएको समय नै सबैभन्दा मूल्यवान् सम्पत्ति हो : रोजिका पोखरेल

टेलिभिजन होष्ट तथा सञ्चारकर्मी रोजिका पोखरेल नेपाली सञ्चार क्षेत्रमा परिचित नाम हो । सन् २०१७ मा ‘मिस टिन नेपाल’को विजेता बनेपछि सार्वजनिक रूपमा चिनिनुभएकी पोखरेलले त्यसपछि आफ्नो यात्रा मोडलिङमा मात्र सीमित राख्नुभन । टेलिभिजन कार्यक्रम प्रस्तुति, सञ्चारकर्म र विभिन्न सार्वजनिक कार्यक्रमको होष्टिङलाई उहाँले आफ्नो व्यावसायिक यात्राको महत्त्वपूर्ण हिस्सा बनाउनुभयो । उहाँ नेपाल टेलिभिजन प्लसमा कार्यक्रम प्रस्तुतकर्ताका रूपमा कार्यरत हुनुहुन्छ । नेपाली र अंग्रेजी दुवै भाषामा सहज रूपमा कार्यक्रम सञ्चालन गर्नसक्ने उहाँको क्षमताले उहाँलाई प्रस्तोताका रूपमा अलग पहिचान दिएको छ । विभिन्न कार्यक्रम तथा ‘ग्ल्याम शो’ र टक शोमासमेत प्रस्तोताको भूमिका निर्वाह गर्दै आउनुभएको छ । थुप्रै कार्यक्रम होस्टिङ गर्नुभएकी पोखरेलले पछिल्लो समय भारतीय गायक अभिजित भट्टाचार्यको होष्टिङ गर्ने अवसरसमेत पाउनुभएको छ । मनोविज्ञानमा पद्मकन्या क्याम्पसबाट स्नातकोत्तर अध्ययन गर्नुभएकी पोखरेल सञ्चार क्षेत्रमा आफ्नो ज्ञान र अनुभवलाई पनि प्रयोग गर्दै आउनुभएको छ । करिब सात वर्षदेखि नेपाल टेलिभिजनसँग जोडिएर काम गरिरहनुभएकी उहाँ युवापुस्ताले आफूसँग भएको समयलाई खेर फाल्न नहुने धारणा राख्नुहुन्छ । हामीसँग भएको समय नै सबैभन्दा मूल्यवान् सम्पत्ति हो भन्नुहुने रोजिका पोखरेलसँग हिमालय टाइम्सका लागि गीता अधिकारीले गर्नुभएको संवादको संक्षिप्त अशःं-

यहाँ कुशल प्रस्तोता, टेलिभिजन होष्ट तथा सञ्चारकर्मीका रूपमा परिचित हुनुहुन्छ, आफूलाई कसरी चिनाउनुहुन्छ ?
म आफूलाई टेलिभिजन प्रस्तोता तथा सञ्चारकर्मीका रूपमा परिचय दिन रुचाउँछु । मेरो यात्रा एउटा क्षेत्रमा मात्र सीमित छैन । मोडलिङबाट सार्वजनिक जीवनमा आए, त्यसपछि टेलिभिजन कार्यक्रम प्रस्तुति र सञ्चार क्षेत्रमा निरन्तर काम गरिरहेकी छु । मेरो लागि प्रस्तोता हुनुभनेको केवल क्यामेराअगाडि उभिएर बोल्नुमात्र होइन । एउटा कार्यक्रमलाई कसरी दर्शकमाझ पुर्‍याउने, अतिथिसँग कसरी संवाद गर्ने, विषयलाई कसरी रोचक बनाउने र दर्शकलाई कार्यक्रमसँग कसरी जोड्ने भन्ने कुरा महत्त्वपूर्ण हुन्छ । यही कुरा सिक्दै र अनुभव गर्दै अगाडि बढिरहेकी छु ।

म आफूलाई टेलिभिजन प्रस्तोता तथा सञ्चारकर्मीका रूपमा परिचय दिन रुचाउँछु । मेरो यात्रा एउटा क्षेत्रमा मात्र सीमित छैन । मोडलिङबाट सार्वजनिक जीवनमा आए, त्यसपछि होष्टिङ, टेलिभिजन कार्यक्रम प्रस्तुति र सञ्चार क्षेत्रमा निरन्तर काम गरिरहेकी छु । मेरो लागि कार्यक्रम सञ्चालन गर्नु, प्रस्तोता हुनुभनेको केवल अगाडि उभिएर बोल्नुमात्र होइन । एउटा कार्यक्रमलाई कसरी दर्शकमाझ पुर्‍याउने, अतिथिसँग कसरी संवाद गर्ने, विषयलाई कसरी रोचक बनाउने र दर्शकलाई कार्यक्रमसँग कसरी जोड्ने भन्ने कुरा महत्त्वपूर्ण हुन्छ । यही कुरा सिक्दै र अनुभव गर्दै अगाडि बढिरहेकी छु ।

तपाईंको करिअरको सुरुवात ‘मिस टिन नेपाल-२०१७’बाट भयो त्यो अनुभव कस्तो थियो ?
‘मिस टिन नेपाल-२०१७’ मेरो जीवनको एउटा महत्त्वपूर्ण मोड थियो । त्यतिबेला ३१ जना प्रतिस्पर्धी सहभागी थिए । त्यति धेरै प्रतिस्पर्धीबीच आफूलाई प्रस्तुत गरेर अगाडि बढ्नु आफैंमा चुनौतीपूर्ण थियो । त्यो प्रतियोगिताले मलाई आत्मविश्वासमात्र दिएन, अनुशासन, व्यक्तित्व विकास, सार्वजनिक रूपमा प्रस्तुत हुने तरिका र आफ्नो क्षमतालाई पहिचान गर्ने अवसर दियो । अन्ततः विजेता बन्न सफल भएँ । त्यो क्षण मेरो व्यक्तिगत जीवनका लागि मात्रै होइन, त्यसपछि सुरु भएको व्यावसायिक यात्राका लागि महत्त्वपूर्ण रह्यो ।

‘मिस टिन नेपाल’ पछि मोडलिङमै केन्द्रित नभई सञ्चार क्षेत्रमा आउनुभयो ?
मलाई सानैदेखि मानिससँग संवाद गर्न, नयाँ विषयबारे जान्न र आफ्ना कुरा प्रस्तुत गर्न रुचि थियो । मोडलिङले मलाई सार्वजनिक रूपमा प्रस्तुत हुने अवसर दियो । तर, त्यसपछि मेरो रुचि प्रस्तुति र सञ्चारतर्फ अझ बढ्दै गयो । टेलिभिजनमा काम गर्दा हरेक दिन नयाँ मानिस, नयाँ विषय र नयाँ अनुभवसँग जोडिन पाइन्छ । त्यसैले मैले यसलाई आफ्नो करिअरको महत्त्वपूर्ण क्षेत्र बनाउने निर्णय गरेँ । अहिले आएर हेर्दा त्यो निर्णय सही थियो भन्ने लाग्छ । करिब सात वर्षदेखि यस क्षेत्रमा काम गरिरहेकी छु ।

यहाँ नेपाली र अंग्रेजी दुवै भाषामा होष्टिङ गर्न पोख्त हुनुहुन्छ । भाषाले प्रस्तोताको काममा कति फरक पार्छ ?
भाषाले धेरै फरक पार्छ । तर, भाषा जान्नुमात्र पर्याप्त हुँदैन । आफूले बोलिरहेको कुरा बुझेर, त्यसलाई सहज रूपमा दर्शकसम्म पुर्‍याउन सक्नुपर्छ । नेपाली हाम्रो आफ्नै भाषा भएकाले यसमा भावनात्मक रूपमा जोडिन सहज हुन्छ । अंग्रेजीमा कार्यक्रम सञ्चालन गर्दा अन्तर्राष्ट्रियस्तरको प्रस्तुति शैली र फरक दर्शकसँग संवाद गर्ने अवसर मिल्छ । दुवै भाषामा सहज हुनु मेरो कामका लागि एउटा अतिरिक्त क्षमता हो भन्ने लाग्छ ।

यहाँले भारतीय गायक अभिजित भट्टाचार्यको होष्टिङ गर्ने अवसर पनि पाउनुभयो । त्यो अनुभव कस्तो रह्यो ?
अभिजित भट्टाचार्यजस्तो स्थापित कलाकारको कार्यक्रम होष्ट गर्नु मेरा लागि राम्रो अनुभव थियो । चर्चित कलाकारसँग काम गर्दा प्रस्तोताका रूपमा आफ्नो तयारी अझ बलियो हुनुपर्छ । त्यस्तो कार्यक्रममा कलाकारको परिचय, उहाँको करिअर र कामबारे जानकारी हुनुका साथै कार्यक्रमलाई सहज र मनोरञ्जक ढंगले अगाडि बढाउनुपर्ने हुन्छ । मैले त्यो अवसरलाई चुनौतीका रूपमा लिएँ र धेरै कुरा सिक्ने प्रयास गरेँ ।

यहाँले धेरै चर्चित कार्यक्रम होष्टिङग गर्नुभयो, सबैभन्दा ठूलो चुनौती के जस्तो लाग्छ ?
सबैभन्दा ठूलो कुरा तयारी हो । कार्यक्रम जति ठूलो भए पनि प्रस्तोताले आफूलाई कमजोर महसुस गर्नु हुँदैन । तर, त्यसका लागि विषयवस्तुबारे राम्रो जानकारी हुनुपर्छ ।

तपाईंले मनोविज्ञानमा पनि अध्ययन गर्नुभएको छ । मनोविज्ञान र होष्टिङबीच कस्तो सम्बन्ध देख्नुहुन्छ ?
मनोविज्ञानको अध्ययनले मलाई मानिसलाई बुझ्न धेरै सहयोग गरेको छ । प्रस्तोताका लागि मानिसको व्यवहार र मनोविज्ञान बुझ्नु निकै उपयोगी हुन्छ । क्यामेराअगाडि सबै मानिस एउटै तरिकाले प्रस्तुत हुँदैनन् । कोही खुलेर बोल्नुहुन्छ, कोही सुरुवातमा अलि असहज हुनुहुन्छ । अतिथिको अवस्था बुझेर कुराकानीलाई सहज बनाउनु प्रस्तोताको जिम्मेवारी हो । मनोविज्ञानको अध्ययनले मलाई मानिसको व्यवहारलाई अलि गहिराइबाट बुझ्ने अवसर दिएको छ । त्यसको प्रभाव मेरो प्रस्तुति र संवादमा परेको छ ।

आजका युवाका लागि के भन्नुहुन्छ ?
हामीसँग भएको समय नै सबैभन्दा मूल्यवान् सम्पत्ति हो । पैसा कमाउन सकिन्छ, तर बितेको समय फर्केर आउँदैन । त्यसैले आफूले पाएको समय खेर फाल्नु हुँदैन । हरेक दिन केही न केही नयाँ सिक्नुपर्छ । आफूलाई विकास गर्ने काममा समय लगाउनुपर्छ । सामाजिक सञ्जालमा घण्टौं बिताउनेभन्दा केही समय आफ्नो क्षमता विकास गर्न प्रयोग गर्न सकिन्छ ।

‘आफूसँग भएको समय नै पैसा हो’ भन्ने तपाईंको भनाइलाई कसरी व्याख्या गर्नुहुन्छ ?
हामी समयलाई पैसा जत्तिकै मूल्यवान् ठान्दैनौं । तर, वास्तवमा समय नै हाम्रो सबैभन्दा ठूलो पूँजी हो । पैसा गुम्यो भने कमाउन सकिन्छ, समय गुमेपछि फिर्ता ल्याउन सकिँदैन । त्यसैले ‘आफूसँग भएको समय खेर नफालौं’ भन्ने मेरो सोच हो । विद्यार्थी हो भने पढाइमा, कलाकार आफ्नो सिर्जनामा, व्यवसायी आफ्नो काममा र सञ्चारकर्मी हो भने आफ्नो ज्ञान र क्षमतामा समय लगाउनुपर्छ भन्ने मान्यता राख्दछु । सानो–सानो कुरामा निरन्तरता दिँदा ठूलो उपलब्धि हासिल गर्न सकिन्छ ।

तपाईंको आगामी योजना ?
कार्यक्रम होष्टलाई अझ उचाइमा लैजाने, अझ राम्रो प्रस्तोता बन्ने र आफूले गरिरहेको कामलाई थप व्यावसायिक बनाउने मेरो लक्ष्य छ । नयाँ विषय, नयाँ ढाँचा र नयाँ पुस्ताका दर्शकसँग जोडिने कार्यक्रम गर्न चाहन्छु । सञ्चार क्षेत्र निरन्तर परिवर्तन भइरहेको छ । त्यसैले मैले पनि आफूलाई समयानुसार परिवर्तन र परिमार्जन गर्दै लैजानुपर्छ । भविष्यमा टेलिभिजनसँगै सञ्चारका अन्य माध्यममा पनि नयाँ प्रयोग गर्ने इच्छा छ । हामीसँग आज भएको समय भोलि हुँदैन । त्यसैले आजको समयलाई अर्थपूर्ण बनाऔं । समयलाई खेर नफालौं, समयलाई आफ्नो भविष्य निर्माण गर्ने माध्यम बनाऔं ।