६ गोल्ड मेडल जितेकी डा. प्रार्थनाको सफलता : बुवाको सपना पूरा भयो, तर खुसी देख्न पाउनुभएन

काठमाडाैं । नेपाली चिकित्सक डा. प्रार्थना सुवेदीले एमबीबीएस अध्ययनका क्रममा ६ विधामा सर्वोत्कृष्ट हुँदै ६ वटा गोल्ड मेडल जित्नुभएको छ। असाधारण शैक्षिक सफलताले उहाँलाई खुसी दिएको छ, तर यही सफलतासँग जोडिएको एउटा गहिरो पीडा पनि छ—उहाँलाई चिकित्सक बनेको देख्ने बुवाको सपना पूरा भए पनि उहाँले छोरीको यो सफलता आफ्नै आँखाले देख्न पाउनुभएन।

२०७९ सालमा नेपाली सेना स्वास्थ्य विज्ञान प्रतिष्ठानबाट एमबीबीएस पूरा गर्नुभएकी डा. सुवेदी ६ विधामा उत्कृष्ट हुँदै गोल्ड मेडल प्राप्त गर्न सफल हुनुभएको हो।

तर, उहाँले आफ्नो सफलताको खबर नेपालमा हुँदा होइन, बेलायत पुगेको करिब चार महिनापछि पाउनुभएको थियो। “दिदी, तपाईंले एमबीबीएसमा ६ वटा गोल्ड मेडल पाउनुभएको छ” भन्ने सन्देश पाएपछि उहाँ भावुक बन्नुभयो। त्यो खुसीको क्षणमा उहाँका आँखाबाट आँसु रोकिएनन्।

किनकि त्यो सफलता केवल शैक्षिक उपलब्धि थिएन। त्यो दिवंगत बुवाको सपना पूरा भएको क्षण पनि थियो । डा. सुवेदीको सफलताको पछाडि लामो समयको निरन्तर मेहनत र अनुशासन छ। कक्षा १२ पछि एमबीबीएस अध्ययन सुरु गर्नुभएकी उहाँले अध्ययनका क्रममा बिहानै उठेर पढ्ने बानी बसाल्नुभएको थियो ।

बिहान ४ बजेदेखि नियमित अध्ययन गर्ने र निरन्तर मेहनत गर्ने उहाँको बानीले शैक्षिक यात्रामा उत्कृष्ट नतिजा हासिल गर्न महत्वपूर्ण भूमिका खेल्यो । बाल्यकालमै परिवारका सदस्यलाई क्यान्सरका कारण गुमाउनुपरेको अनुभव र अस्पतालसँगको नजिकको सम्बन्धले पनि उहाँलाई चिकित्सक बन्न प्रेरित गरेको थियो।

एमबीबीएस अध्ययन पूरा गर्ने क्रममा डा. सुवेदीका लागि व्यक्तिगत जीवनमा पनि कठिन समय आयो। उहाँका बुवामा स्टेज–४ क्यान्सर पुष्टि भयो । इन्टर्नसिपको व्यस्त समय चलिरहेकै बेला उहाँले दुई महिनाको ब्रेक लिनुभयो। त्यो समय उहाँले बुवाको उपचार र हेरचाहमा बिताउनुभयो ।

चिकित्सा अध्ययन, अस्पतालको जिम्मेवारी र परिवारमा आएको गम्भीर स्वास्थ्य समस्याबीच पनि उहाँले आफ्नो अध्ययनलाई निरन्तरता दिनुभयो ।

पछि मेडिकल अफिसरका रूपमा काम सुरु गर्नुभएको केही महिनामै क्यान्सरका कारण उहाँका बुवाको निधन भयो । बुवाले छोरी विश्वविद्यालयमा पहिलो भएको खबर थाहा पाउनुभएको थियो। तर, छोरीले हासिल गर्नुभएका ६ वटा गोल्ड मेडल भने उहाँले आफ्नै आँखाले देख्न पाउनुभएन ।

यही कारण डा. सुवेदीका लागि आफ्नो शैक्षिक सफलता खुसीसँगै बुवाको सम्झना र पीडासँग पनि जोडिएको छ । बुवाको निधनपछि केही समय नेपालमै अनुसन्धानमा संलग्न हुनुभएकी डा. सुवेदी अहिले बेलायतमा अनुसन्धानको क्षेत्रमा सक्रिय हुनुहुन्छ।

उहाँ हाल अक्सफोर्ड विश्वविद्यालयको क्लिनिकल रिसर्च टिममा काम गरिरहनुभएको छ। न्युरोसर्जरी तथा ब्रेन ट्युमरसँग सम्बन्धित अनुसन्धानमा उहाँको विशेष रुचि रहेको छ।

एमबीबीएसमा उत्कृष्ट सफलता हासिल गरेपछि पनि उहाँको लक्ष्य चिकित्सकीय अभ्यासमा मात्र सीमित छैन। उच्च अध्ययन र अनुसन्धानमार्फत विशेषज्ञता हासिल गर्ने र त्यसपछि नेपाल फर्किएर देशको स्वास्थ्य क्षेत्रमा योगदान गर्ने उहाँको लक्ष्य छ।

बुवाको सपना बोकेर अघि बढ्दै

डा. सुवेदीको यात्रा केवल एउटा चिकित्सकले हासिल गरेको शैक्षिक सफलताको कथा होइन। यो पारिवारिक प्रेरणा, संघर्ष, निरन्तर मेहनत र व्यक्तिगत पीडाबीच लक्ष्य प्राप्त गरेको कथा पनि हो।

बुवाले देख्नुभएको चिकित्सक बन्ने सपना उहाँले पूरा गर्नुभयो। बुवाले छोरीको शैक्षिक सफलता आफ्नै आँखाले देख्न नपाए पनि उहाँले हासिल गरेको उपलब्धि अहिले उहाँकै सपनाको निरन्तरता बनेको छ।

६ वटा गोल्ड मेडलबाट सुरु भएको यो यात्रा अहिले बेलायतको अनुसन्धानसम्म पुगेको छ। उच्च अध्ययन र अनुसन्धानपछि नेपाल फर्किएर स्वास्थ्य सेवामा योगदान गर्ने लक्ष्यसहित डा. सुवेदी आफ्नो यात्रा अघि बढाइरहनुभएको छ।

उहाँको कथा मेहनत, समर्पण र पारिवारिक प्रेरणाले कठिन परिस्थितिमा पनि सफलता हासिल गर्न सकिन्छ भन्ने उदाहरण बनेको छ।