एमाले आधारभूत वर्ग र समुदायबाट टाढिँदै गएको छ : शंकर पोखरेल

हिमालय टाइम्स

Sunday August 16, 2026

हिमालय टाइम्स

Sunday August 16, 2026

Read Time = 5 mins

डिजिटल संस्करण

समाचार

A A- A+

काठमाडौं । नेकपा (एमाले)का महासचिव शंकर पोखरेलले एमाले आधारभूत वर्ग र समुदायबाट टाढिँदै गएको स्वीकार गर्नुभएको छ ।

आइतबार काठमाडौंमा आयोजित ‘वामपन्थी आन्दोलन अब के गर्ने ?’ विषयक राष्ट्रिय बहसमा बोल्दै महासचिव पोखरेलले गत प्रतिनिधिसभा निर्वाचनमा एमालेले पार्टी सदस्य र उनीहरू वरपरको समुदायमा आधारित जनमतबाहेक व्यापक जनसमर्थन हासिल गर्न नसकेको बताउनुभयो ।

उहाँले वामपन्थी शक्तिहरू पूर्वाधार विकासमा बढी केन्द्रित हुँदा सामाजिक विकास, सामाजिक न्याय, शिक्षा, स्वास्थ्य तथा रोजगारीका मुद्दामा अपेक्षाकृत प्रभावकारी हुन नसकेको बताउनुभयो ।

“पार्टी सदस्य र उसको निकटको सदस्य आधारित जनमतबाहेक अन्य जनमत हामीले हासिल गर्न सकेनौँ । त्यसअर्थ अहिले हामी आधारभूत वर्ग र समुदायबाट पनि टुटेको अवस्थामा छौँ,” पोखरेलले भन्नुभयो ।

आधारभूत वर्ग र समुदायसँगको सम्बन्ध कमजोर हुनुका कारणबारे समीक्षा गर्नुपर्ने बताउँदै उहाँले पूर्वाधार विकाससँगै सामाजिक न्याय र नागरिकका आधारभूत आवश्यकतामा केन्द्रित हुन नसक्नु प्रमुख कारण भएको बताउनुभयो ।

महासचिव पोखरेलले नेपालको ठूलो श्रमशक्ति कृषिमा निर्भर रहे पनि कृषक परिवारका शिक्षित युवाहरू कृषि पेसामा फर्कन नचाहँदा शैक्षिक बेरोजगारी बढेको बताउनुभयो ।

उहाँका अनुसार कृषिमा आधारित परिवारका शिक्षित पुस्तालाई कृषि तथा उत्पादनमूलक क्षेत्रमा जोड्न नसक्दा उनीहरू रोजगारीको खोजीमा विदेश पलायन हुने र राज्यप्रति असन्तुष्ट बन्ने अवस्था सिर्जना भएको छ ।

“कृषिलाई पेसा मान्ने समुदायभित्रको लेखपढ गरेको पुस्ताले कृषिमा फर्कन मानेन । त्यो शैक्षिक बेरोजगारका रूपमा समाजमा उपस्थित भयो । आफूलाई शैक्षिक बेरोजगार बस्दाको असन्तुष्टि र विद्रोह वैदेशिक पलायन र राज्यविरुद्धको घृणामा बदलियो,” उहाँले भन्नुभयो ।

मुलुकको वर्तमान संकटको एउटा प्रमुख कारण शिक्षित पुस्तामा बढेको बेरोजगारी र त्यसबाट उत्पन्न असन्तुष्टि रहेको उहाँको विश्लेषण थियो ।

पोखरेलले पार्टीको समग्र पुनर्गठन आजको आवश्यकता भएको बताउनुभयो । वामपन्थी कार्यकर्तामा देखिएको निराशालाई उत्साह र गतिशीलतामा बदल्नुपर्ने उहाँको भनाइ थियो ।

उहाँले आगामी दिनमा वामपन्थी दलहरूले जनतासँगको सम्बन्धलाई थप बलियो र सुदृढ बनाउनुपर्नेमा जोड दिनुभयो ।

जनताको दैनिक जीवनसँग जोडिएका शिक्षा, स्वास्थ्य, रोजगारी, सामाजिक न्याय र उत्पादनका सवाललाई राजनीतिक प्राथमिकतामा राखेर अघि बढ्न सके मात्रै वामपन्थी आन्दोलनले पुनः जनविश्वास हासिल गर्न सक्ने उहाँको धारणा थियो ।