राजविराज । रसुवामा बुधबार बिहान आएको भीषण बाढी र पहिरोपछि हाइड्रोपावर तथा विभिन्न क्षेत्रमा कार्यरत सप्तरीका थुप्रै युवा सम्पर्कविहीन भएका छन् । आफन्तसँग सम्पर्क टुटेपछि सप्तरीका विभिन्न गाउँ-बस्तीमा रहेका परिवारजन यतिबेला चिन्तामा डुबेका छन् ।
सम्पर्कविहीन हुनेमध्ये सप्तरीको बोदेबरसाइन नगरपालिका-८, काचनटोलका एकै परिवारका तीन दाजुभाइ पनि रहेका छन् । ३१ वर्षीय देवकुमार यादव, ३५ वर्षीय शिवकुमार यादव र २५ वर्षीय सचित यादव बुधबार बिहानदेखि परिवारको सम्पर्कमा नआएको उनका बुवा लालबहादुर यादवले जानकारी दिनुभयो ।
तीनै जना रसुवा क्षेत्रमा रहेको हाइड्रोपावर आयोजनामा कार्यरत थिए । देवकुमार इन्जिनियर, सचित ओभरसियर र शिवकुमार सुपरभाइजरका रूपमा काम गर्दै आएका थिए ।
परिवारकाअनुसार उनीहरू उत्तरगया गाउँपालिका-५ स्थित क्षेत्रमा कार्यरत थिए भने बसोबास बेत्रावतीमा गर्दै आएका थिए । बुधबार बिहान करिब ८ः३० बजे बुहारी सुरेखासँग अन्तिम पटक टेलिफोन सम्पर्क भएको परिवारजनले बताएका छन् । त्यसपछि उनीहरूको मोबाइल सम्पर्क हुन नसकेको जनाइएको छ ।
यस्तै, अपर त्रिशूली-१ हाइड्रोपावरमा सब-इन्जिनियरका रूपमा कार्यरत सप्तरीको राजगढ गाउँपालिका-२, बनैनियाका राजीवकुमार सिंह पनि हालसम्म सम्पर्कविहीन रहेका छन् ।
रसुवा बाढी-पहिरोपछि शम्भुनाथ नगरपालिका-८ निवासी साजन चौधरी पनि सम्पर्कविहीन भएका छन् । उनी रसुवामा निर्माणाधीन सिनो हाइड्रोपावरमा कार्यरत रहेको परिवारजनले बताएका छन् । बाढी र पहिरोपछि उनी परिवार तथा आफन्तको सम्पर्कबाहिर रहेका छन् ।
त्यस्तै, सशस्त्र प्रहरी बल (एपीएफ)मा कार्यरत सप्तरीको कञ्चनपुर निवासी अनुशा चौधरी पनि रसुवामा आएको बाढीपछि सम्पर्कविहीन रहेको जानकारी प्राप्त भएको छ ।
कञ्चनपुरकै अपर त्रिशूली पावरहाउसमा कार्यरत प्रमोद मण्डलको अवस्थाबारे पनि परिवारजन अनभिज्ञ छन् । उनीसँग समेत सम्पर्क हुन नसकेको बताइएको छ ।
यसैगरी, सप्तरीको तिलाठी कोइलाडी गाउँपालिका-६, बभनगामा निवासी अशोककुमार मण्डल पनि रसुवास्थित २१६ मेगावाट क्षमताको हाइड्रोपावर आयोजनामा कार्यरत रहेको र बाढीपछि उनको अवस्थाबारे यकिन जानकारी प्राप्त हुन नसकेको परिवारजनले जनाएका छन् ।
रसुवामा अचानक आएको विनाशकारी बाढी र पहिरोले सञ्चार तथा यातायात सम्पर्क प्रभावित भएपछि हाइड्रोपावर आयोजनामा कार्यरत सप्तरीका युवाहरूको अवस्था अज्ञात बनेको हो ।
एकपछि अर्को गर्दै सप्तरीका युवाहरू सम्पर्कविहीन भएको खबर आउन थालेपछि जिल्लामा चिन्ता बढेको छ । परिवारजनले सम्बन्धित निकायसँग उनीहरूको खोजी तथा उद्धारलाई प्राथमिकता दिन आग्रह गरेका छन् ।
बाढीग्रस्त क्षेत्रमा उद्धार तथा खोजी कार्य जारी रहे पनि सम्पर्कविहीन भएकाहरूको अवस्था अझै स्पष्ट हुन सकेको छैन । परिवारजन भने सकुशल रहेको एउटा खबरको प्रतीक्षामा छन् ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
रवि लामिछानेले संसदमा सम्बोधनका लागि
ठुलै परिवर्तन भैसक्याे साथी…
बाढीबाट अवरुद्ध विद्युत् जडान तीव्र
सुनसान छन् सौराहाका होटल, पर्यटक
ब्याज मिनाहा गरी ऋण नविकरण
भदौ २४ को घटना नेपालको