एसिसी प्रिमियर कप क्रिकेट : बहराइनमाथि नेपालको सात विकेटको जित

हिमालय टाइम्स

Monday August 31, 2026

हिमालय टाइम्स

Monday August 31, 2026

Read Time = 3 mins

डिजिटल संस्करण

क्रिकेट

खेलकुद

A A- A+

काठमाडौँ । एसिसी प्रिमियर कप क्रिकेट प्रतियोगितामा नेपालले विजयी सुरुआत गरेको छ । मलेसियाको बाङ्गीमा आज भएको खेलमा नेपालले बहराइनलाई सात विकेटले पराजित गरेको हो ।

बहराइनले दिएको ८८ रनको सामान्य लक्ष्य नेपालले २१ ओभरमा तीन विकेट गुमाएर पूरा गर्‍यो । नेपालको जितमा अर्जुन कुमालले अविजित ३६ रन बनाए । उनले ५८ बलमा पाँच चौका प्रहार गरे ।

त्यस्तै रोहितकुमार पौडेल १९ रनमा अविजित रहँदा आसिफ शेखले १८ र देव खनालले १० रन बनाए । बहराइनका इमरान जाभेद अनवारले तीन विकेट लिए ।

यसअघि टस हारेर पहिले ब्याटिङ गरेको बहराइन नेपाली बलरसामु टिक्न नसक्दा ३६.२ ओभरमा ८७ रनमा अलआउट भएको थियो । बहराइनका लागि फिआज अहमेदले सर्वाधिक १५ तथा मुहम्मद वासिमले १३ रन बनाए । अन्य कुनै पनि ब्याटरले दोहोरो अंकमा रन बनाउन सकेनन् ।

बहराइनको इनिङ ध्वस्त पार्ने क्रममा नेपालका कप्तान सन्दीप लामिछानेले पाँच विकेट लिए । उनले उत्कृष्ट बलिङ गर्दै बहराइनको मध्य तथा तल्लो क्रमलाई धराशायी बनाए । ललितनारायण राजवंशीले तीन तथा करण केसीले दुई विकेट लिए ।

जितसँगै नेपालले प्रतियोगितामा सुखद सुरुआत गरेको छ । नेपालले समूह चरणको दोस्रो खेल यही भदौ १८ गते आयोजक मलेसियासँग खेल्नेछ ।