काठमाडौं । अग्रज पत्रकार एवं गोरखापत्र संस्थानका पूर्वमहाप्रबन्धक वसन्तप्रकाश उपाध्यायको निधन भएको छ । ५५ वर्षीय उपाध्याय मंगलबार पर्साको वीरगञ्ज महानगरपालिका–४ स्थित गहवामाई मन्दिरअगाडिको चौतारोमा अचेत अवस्थामा भेटिनुभएको थियो । अचेत अवस्थामा भेटिनुभएका उपाध्यायलाई स्थानीयले प्रहरीलाई खबर गरेपछि वडा प्रहरी कार्यालय विर्ताबाट खटिएको प्रहरी टोलीले उद्धार गरी उपचारका लागि नारायणी अस्पताल वीरगञ्ज पुर्याएको थियो । जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक चक्रबहादुर मल्लका अनुसार अस्पताल पुर्याएपछि उहाँको निधन भएको हो ।
तनहुँको भानु नगरपालिका-१ भन्सारपुल स्थायी घर हुनुभएका उपाध्याय हाल काठमाडौंको कलंकीस्थित ढुंगेअड्डामा बस्दै आउनुभएको थियो । उपाध्यायले २०४८ साल फागुनमा गोरखापत्रमा उपसम्पादकका रूपमा पत्रकारिता सेवा सुरु गर्नुभएको थियो । लामो समय गोरखापत्रमा कार्यरत उहाँले गोरखापत्र दैनिकको कार्यकारी सम्पादकको जिम्मेवारीसमेत सम्हाल्नुभएको थियो ।
२०७४ मंसिर २५ गते गोरखापत्र संस्थानको महाप्रबन्धकमा नियुक्त हुनुभएका उपाध्यायले भने पूरा कार्यकाल महाप्रबन्धकका रूपमा जिम्मेवारी निर्वाह गर्न पाउनुभएन । उहाँले संस्थानको सञ्चालक समिति सदस्य तथा सञ्चालक समिति सचिवको जिम्मेवारीसमेत सम्हाल्नुभएको थियो । त्यस्तै, उहाँले गोरखापत्र संस्थानबाट प्रकाशित युवामञ्च र मधुपर्कको सम्पादकका रूपमा पनि काम गर्नुभएको थियो ।
नेपाल प्रेस युनियनमा लामो समय सक्रिय उपाध्याय राम्रो लेखनशैली भएका पत्रकार एवं साहित्यकारको रुपमा समेत चिनिनुहुन्थ्यो । उहाँको निधनमा पत्रकारका विभिन्न संघसंस्था र व्यक्तित्वहरूले श्रद्धाञ्जलि अर्पण गरेका छन् ।
उपाध्यायको निधनमा नेपाल पत्रकार महासंघ हिमालय हिमालय टाइम्स प्रतिष्ठानले पनि श्रद्धाञ्जलि अर्पण गर्दै शोक सन्तप्त परिवारजनप्रति समवेदना व्यक्त गरेको छ । २०२५ साल वैशाख १५ गते तनहुँमा जन्मिनुभएका उपाध्यायका श्रीमती, एक छोरा र एक छोरी हुनुहुन्छ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
कति छ आज विदेशी मुद्राको
दग्नामका यामबहादुरको ५८ वर्षपछि पारिवारिक
चुमनुब्रीस्थित थेराङखोलाको बाढीले चार घर
भोटेकोशी बाढी : आठ जिल्लामा
एसिसी प्रिमियर कप : साउदीविरुद्ध
देशभर मनसुनी गतिविधि सक्रिय, यी