काठमाडौं । डोमिनिकन रिपब्लिककी जोहेरी मोला डोमिन्गेजले ‘मिस वर्ल्ड २०२६’को उपाधि चुम्नुभएको छ । शनिबार भियतनामको न्हा ट्राङमा आयोजित ७३औं मिस वर्ल्डको ग्राण्ड फिनालेमा मोला डोमिन्गेजले विश्व सुन्दरीको ताज आफ्नो पोल्टामा पार्नुभएको हो । उहाँले विश्वभरबाट सहभागी प्रतिस्पर्धीलाई पछि पार्दै उपाधि हात पार्नुभएको हो ।
मोला डोमिन्गेजको जितसँगै डोमिनिकन रिपब्लिकले ४४ वर्षपछि दोस्रोपटक मिस वर्ल्डको उपाधि जितेको छ । यसअघि सन् १९८२ मा मारियासेला अल्भारेजले डोमिनिकन रिपब्लिकका लागि पहिलोपटक मिस वर्ल्डको ताज जित्नुभएको थियो । प्रतियोगितामा स्पेनकी एलिजाबेथ रेयनेस अलाबेर्न फर्ष्ट रनरअप बन्नुभयो भने मलेसियाकी तानुसिया चेट्टी सेकेण्ड रनरअप घोषित हुनुभयो ।
प्रतियोगितामा नेपालबाट लुना लुइँटेल सहभागी हुनुभएको थियो । लुना ट्यालेन्ट विधामा उत्कृष्ट प्रदर्शन गर्दै २३ फाइनलिष्टमध्ये स्थान बनाउन सफल हुनुभएको थियो । लुनाले टप ६ मा स्थान बनाउन असफल हुनुभयो । यद्यपि, १११ देशका सुन्दरी सहभागी प्रतियोगितामा नेपालको प्रतिनिधित्व गर्दै उहाँले सामाजिक अभियान, प्रतिभा र उद्देश्यपूर्ण सौन्दर्यको अवधारणामार्फत अन्तर्राष्ट्रिय मञ्चमा नेपालको पहिचान प्रस्तुत गर्नुभयो ।
यसपटकको मिस वर्ल्ड प्रतियोगितामा सौन्दर्यसँगै सामाजिक कार्यलाई समेत विशेष प्राथमिकता दिइएको थियो । मोला डोमिन्गेजले ‘ब्युटी विथ अ पर्पज’ अभियानअन्तर्गत अवसरबाट वञ्चित बालबालिकालाई अंग्रेजी भाषा सिकाउने अभियानमा सक्रियता जनाउनुभएको छ । सान्तो डोमिंगोकी २४ वर्षीया जोहेइरी मोला शिक्षिका, पत्रकार तथा सामुदायिक अभियन्ता हुनुहुन्छ । उहाँले युनिभर्सिडाड इबेरो अमेरिकानाबाट बिजनेस म्यानेजमेन्ट एण्ड एडमिनिस्ट्रेसनमा स्नातक गर्नुभएको छ ।
इरिट्रिया, मलेसिया, भियतनाम, डोमिनिकन रिपब्लिक, स्पेन र दक्षिण अफ्रिकाका प्रतियोगी अन्तिम ६ मा पुगेका थिए । मिस वर्ल्ड अर्गनाइजेसनकी सीईओ जुलिया मोर्लीले विजेता तथा रनरअपहरूको घोषणा गर्नुभएको थियो । गत वर्षकी विजेता ओपल सुचाताले ७३औं मिस वर्ल्ड विजेता जोहेइरी मोलालाई ताज पहिर्याइदिनुभएको थियो ।
मिस वर्ल्ड प्रतियोगिताले आफ्नो ७५औं वार्षिकोत्सव मनाइरहँदा भियतनाममा ७३औं संस्करण आयोजना गरिएको हो । १११ प्रतिस्पर्धीसहित अगष्ट ८, २०२६ मा सुरु भएको प्रतियोगिता सेप्टेम्बर ५, २०२६ मा सम्पन्न भएको हो । प्युर्टो रिकोका मिष्टर वर्ल्ड २०२४ ड्यानियल मेहिया र मिस वर्ल्ड २०१६ स्टेफनी डेल भ्यालेले कार्यक्रम सञ्चालन गर्नुभएको थियो ।
प्रतियोगिताको सुरुवात १११ देशका प्रतिस्पर्धीले इभिनिङ गाउन लगाएर गरेका थिए । त्यसपछि उनीहरू भियतनामी ‘आओ दाइ’ शैलीका पोसाकमा प्रस्तुत भए । त्यसलगत्तै आयोजकले शीर्ष ४० प्रतिस्पर्धीको घोषणा गरेका थिए । शीर्ष ४० को सूचीमा टप मोडल, ब्युटी विथ अ पर्पस, ट्यालेन्ट, स्पोर्ट्स, पिपुल्स च्वाइस अवार्ड र निर्णायकको छनोटबाट आएका विजेताहरू समावेश थिए ।
मिस वर्ल्डको ७४औं संस्करण पूर्वी अफ्रिकी मुलुक तान्जानियामा आयोजना हुनेभएको छ । यससँगै जोहेइरी मोलाले आगामी एक वर्ष मिस वर्ल्डका रूपमा विभिन्न सामाजिक तथा मानवीय अभियानमा सहभागी हुँदै विश्वभर प्रतिनिधित्व गर्नुहुनेछ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
बाढीपछि त्रिशूलीका सहायक खोलामा बालुवा
हुप्सेकोटको घाँगी भीरमा निरन्तर धुँवाको
त्रिभुवनराजपथ भासिएपछि एकतर्फी यातायात सञ्चालन
नयाँ कोष थप्ने होइन, एकीकृत
बाढीपीडितलाई सहयोग गर्ने सन्देशसहित सांस्कृतिक
मकवानपुरमा ट्राफिक कारबाही बढ्दा पनि