काठमाडौँ । नेपाली सेनाले बाढीबाट क्षति पुगेका जलविद्युत् आयोजनाका टनेलमा ‘ब्रेक थ्रु’ नभएसम्म खोज तथा उद्धारकार्य जारी राख्ने जनाएको छ। बाढी प्रभावित जलविद्युत् आयोजनाका टनेलमा करिब १२१ जना नागरिक फसेको हुनसक्ने अनुमान गर्दै सेनाले खोज तथा उद्धारलाई तीव्रता दिएको हो।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले आज आयोजना गरेको पत्रकार सम्मेलनमा सहायक रथी सुवाशजङ्ग थापाले सरकारले काम रोक्ने निर्णय नगरेसम्म टनेलमा ‘ब्रेक थ्रु’ नभएसम्म खोज तथा उद्धारकार्य जारी रहने बताउनुभयो। उहाँका अनुसार टनेलमा तीव्रताका साथ निरन्तर खोजी भइरहेको छ।
सहायक रथी थापाका अनुसार रसुवागढी जलविद्युत् आयोजनामा खोज तथा उद्धार टोली र आयोजनाका प्रतिनिधिसहितको टोली पावरहाउस तथा कन्ट्रोल प्वाइन्टसम्म पुगेर खोजी गरेको छ।
नेपाली सेनाले विपद् प्रभावित क्षेत्रमा खोज तथा उद्धारकार्यलाई हवाई, जमिन र टनेल गरी तीन क्षेत्रमा विभाजन गरेर अघि बढाएको जनाएको छ।
सेनाका प्रवक्ता एवं सहायक रथी राजाराम बस्नेतले नेपाल सरकारको निर्देशनबमोजिम विपद्सँग सम्बन्धित सबै निकायसँग समन्वय र सहकार्य गरी खोज तथा उद्धारकार्य भइरहेको जानकारी दिनुभयो।
“नेपाली सेनाले नेपाल सरकारको निर्देशनबमोजिम विपद्मा सहयोग गर्ने सम्बन्धित सबै निकायसँग समन्वय र सहकार्य गरेर कार्य गरिरहेको छ। हवाई, जमिन र टनेल खोज तथा उद्धार गरी तीन क्षेत्रमा बाँडेर काम गरिरहेका छौँ”, उहाँले भन्नुभयो।
सहायक रथी बस्नेतले विदेशबाट नेपाल आएका उद्धारकर्मीसँग समेत सहकार्य गरी उद्धारकार्य अघि बढाइएको बताउनुभयो। उहाँका अनुसार विपद्का क्रममा नेपाली सेनाका ४५ जना सैनिकसमेत बेपत्ता भएका छन्।
यसैबीच, प्राधिकरणका कार्यकारी प्रमुख डा. धर्मराज उप्रेतीले बाढी प्रभावित अधिकांश क्षेत्रमा राहत सामग्री पुगिसकेको जानकारी दिनुभयो। अहिले हेलिकप्टरलाई खोज तथा उद्धारमा प्राथमिकता दिइएकाले हेलिकप्टरमार्फत राहत पुर्याउनुपर्ने केही स्थानमा भने राहत लैजान नसकिएको उहाँले बताउनुभयो।
त्यस्ता क्षेत्रमा त्रिशूली, रसुवालगायत हेलिकप्टर पुग्न सक्ने नजिकका स्थानबाट खाद्य सामग्री पठाउने प्रयास भइरहेको उहाँले जानकारी दिनुभयो। स्थानीय सरकारसँग निरन्तर समन्वय गरी राहत वितरणको काम अघि बढाइएको उहाँले उल्लेख गर्नुभयो।
विपद् प्रभावित क्षेत्रमा खोज तथा उद्धारकार्य निरन्तर भइरहेको जानकारी दिँदै डा. उप्रेतीले छिमेकी मुलुकसँग समन्वय गरी खोज, उद्धार तथा राहतका लागि आवश्यक सहयोग लिइरहेको बताउनुभयो।
राज्यका तर्फबाट खोज, उद्धार र राहतमा कुनै कसर बाँकी नराखी सुरक्षा निकायलाई चौबीसै घण्टा परिचालन गरिएको उहाँले जानकारी दिनुभयो।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
1
Excited
Excited
0
Angry
Angry
जापानिज इन्सेफ्लाइटिसविरुद्ध खोप अभियान सञ्चालन
बाढीबाट भएको क्षतिको यथार्थ मूल्याङ्कन
म्याग्दी नदीमाथि झोलुङ्गे पुल निर्माण
भम्लु खोलामा सुख्खा पहिराले कर्णाली
भोटेकोशी बाढी : लुम्बिनीका २४८
रवि लामिछानेले संसदमा सम्बोधनका लागि